Qanunçuluğa və intizama ciddi əməl olunmalıdır

Bu barədə Laçın Rayon İcra Hakimiyyəti başçısı yanında keçirilmiş şura iclasında konkret tədbirlər planı müəyyən edilmişdir

Laçın Rayon İcra Hakimiyyəti başçısı yanında şura iclasında respublika Nazirlər Kabinetinin 2010-cu ilin sosial-iqtisadi inkişafının yekunlarına həsr olunmuş iclasında Azərbaycan Respublikasının Prezidenti İlham Əliyevin rüşvətxorluq və korrupsiya hallarının qarşısının alınması və bütün sahələrdə şəffaflığın təmin edilməsi ilə bağlı verdiyi tapşırıqlar, eyni zamanda, Azərbaycan Respublikası Prezidenti Administrasiyasının rəhbəri, Korrupsiyaya qarşı Mübarizə üzrə Komissiyanın sədri Ramiz Mehdiyevin sədrliyi ilə 27 yanvar 2011-ci il tarixdə keçirilmiş iclasda qarşıya qoyulmuş vəzifələr geniş müzakirə edilmiş, əməli fəaliyyət proqramı müəyyən olunmuşdur.

Məlumdur ki, respublika Prezidenti "Şəffaflığın artırılması və korrupsiyaya qarşı mübarizə üzrə milli strategiyasının təsdiq edilməsi barədə" sərəncam imzalamışdır. Həmin sənədə uyğun olaraq ötən müddət ərzində rayonun aidiyyəti orqanları korrupsiyanın mahiyyəti, səbəbləri və onun doğurduğu təhlükələr haqqında vətəndaşlar arasında maarifləndirmə işləri aparmışdır. Ötən müddətdə korrupsiyaya şərait yaradan halların aradan qaldırılması və qabaqlayıcı tədbirlərin görülməsi, vəzifəli şəxslərin və dövlət qulluqçularının vicdanlı xidmət və peşəkarlıq sahəsində nümunəvi davranışının gücləndirilməsi istiqamətində bir sıra zəruri tədbirlər həyata keçirilmişdir.

Belə ki, 2007-ci ilin dekabr ayınadək rayonda bütün əmək haqqı, pensiya, müavinət və digər ödənişlər nağd qaydada paylanılmış və bu zaman ciddi qanun pozuntularına yol verilmişdir. Həyata keçirilən tədbirlər nəticəsində 2008-ci ildən əmək haqqı və digər ödənişlərin bütünlüklə plastik kartlarla ödənilməsi təmin edilmişdir. Bundan əlavə, respublika üzrə ilk dəfə 121 saylı Dairə Seçki Komissiyası üzvlərinin əmək haqlarının kartlarla verilməsi təmin edilmişdir. Ödənişlər zamanı əvvəllər yol verilən nöqsanlar tamamilə aradan qaldırılmışdır.

"Məcburi köçkünlərə yemək xərci müavinətinin paylanmasına dair təlimat"ın tələblərinə uyğun olaraq, 2008-ci il tarixdə rayon komissiyası yaradılmış, yeni tərkib müəyyən edilərək siyahıların üzləşdirilməsi aparılmışdır. Bu zaman ciddi nöqsanların olduğu müəyyən edilmiş, 2008 və 2009-cu illərdə rayon üzrə yemək xərci müavinəti almaq hüququ olmayan 2000 nəfər aşkara çıxarılmışdır.

Taxtakörpü ərazisində məskunlaşmış məcburi köçkünlərə humanitar yardımların paylanılmasında şəffaflığın təmin edilməsi məqsədilə, 2008-ci ilin əvvəlində komissiya yaradılmışdır. 1700 nəfərə qanunsuz humanitar yardım ödənilməsinin qarşısı alınmışdır. Kənd təsərrüfatı istehsalçılarına yanacaq və motor yağlarına görə kompensasiyaların verilməsi ilə bağlı da araşdırma aparılmışdır. Siyahıya qanunsuz daxil edilmiş 267 hektar əkin sahəsinə görə 10680 manat büdcə vəsaiti ödənişinin qarşısı alınmışdır.

Rayon Təhsil Şöbəsində yol verilmiş nöqsanların aradan qaldırılması istiqamətində də ciddi tədbirlər həyata keçirilmişdir. Belə ki, rayon üzrə şagirdlərin və müəllimlərin adları xüsusi proqram əsasında kompyuterə yığılmış, şagirdlərin məktəb şəbəkəsinə daxil olunması ərazi icra nümayəndələrinin arayışları əsasında həyata keçirilmişdir. Nəticədə, rayon üzrə 185 sinif komplekti ləğv olunmuş, 8 məktəbin və 19 filialın fəaliyyəti dayandırılmışdır. Bununla da dövlətə il ərzində dəyəcək 500 min manatdan çox ziyanın qarşısı alınmışdır. Araşdırma zamanı məktəb şəbəkələrinə qanunsuz və formal olaraq yazılmış, adı rayonun iki, bəzən də üç ümumtəhsil məktəbinin şəbəkəsinə daxil edilmiş 3000-ə yaxın şagird müəyyən edilmişdir. 2008-ci ilin avqust-oktyabr aylarında Dövlət Sosial Müdafiə Fondu Laçın rayon şöbəsində yoxlama aparılmış, nəticədə, 80 min manatadək qanunsuz ödənişə yol verildiyi müəyyən olunmuşdur. Bununla bağlı şöbənin müdiri, eləcə də digər məsul işçilər yol verdikləri nöqsanlara görə daşıdıqları vəzifədən azad edilmişlər. Yoxlama sənədləri Azərbaycan Respublikası Baş Prokuroru yanında Korrupsiyaya Qarşı Mübarizə İdarəsinə göndərilmişdir.

Rayon əhalisi arasında narazılıq yaradan hallardan biri də bütün icra strukturlarının Taxtakörpü ərazisində yerləşməsinə baxmayaraq, bəzi idarə və müəssisələrin Bakı, Ağcabədi şəhərlərində fəaliyyət göstərmələri olmuşdur. 2007-ci ildən ötən müddət ərzində Sosial Müdafiə Fondunun rayon şöbəsinin, Vergilər idarəsinin, sığorta şöbəsinin və digər müəssisələrin Taxtakörpü qəsəbəsinə köçürülməsi təmin edilmişdir.

2007-ci ildən ötən dövrdə vətəndaşların qəbulu, ərizə və şikayətlərə baxılmasına, xüsusilə, səyyar görüş-qəbulların keçirilməsinə diqqət artırılmış, bu iş daha ardıcıl və sistemli xarakter almışdır. Əvvəlki illərlə müqayisədə ərizə və şikayətlərin, xüsusilə təkrar şikayətlərin sayı azalmış, müraciətlər daha çox təklif və minnətlardıq xarakteri almışdır.

2010-cu ildə Laçın Rayon İcra Hakimiyyəti Başçısı Aparatına vətəndaşların cəmi 1098 yazılı müraciəti daxil olmuşdur. Bunun 455-i Prezidentin Administrasiyasından, 36-sı Milli Məclisdən, 206-sı Nazirlər Kabinetindən, 159-u digər respublika təşkilatlarından, 242-si vətəndaşların özləri tərfəfindən göndərilmişdir. Müraciətlərdən 34-ü aidiyyəti üzrə göndərilmiş, 179-u müsbət həll olunmuş, 298-i əsassız sayılmışdır. 587 müraciət müəlliflərinə isə müvafiq izahatlar verilmişdir.

Ötən il təsdiq edilmiş qrafikə uyğun, hər gün rayon icra hakimiyyətinin başçısı, onun müavinləri və aparatın şöbə müdirləri tərəfindən vətəndaşların qəbulu təşkil olunur. Bu vaxtadək 1573 nəfər rayon icra hakimiyyətinin başçısı tərəfindən qəbul edilmişdir. İşin məhz bu cür təşkil edilməsinin nəticəsidir ki, 2009 - 2010-cu illərdə Prezident Administrasiyasının ümumi şöbəsinin hazırladığı illik hesabatda Laçın rayonunda müsbət təcrübə qazanıldığı qeyd edilmişdir.

Rayon icra hakimiyyəti başçısı yanında şura iclası bütün idarə, müəssisə və təşkilat rəhbərlərindən, şəhər, qəsəbə və kənd ərazi nümayəndələrindən qəti şəkildə tələb etmişdir ki, Azərbaycan Respublikasının Prezidenti İlham Əliyevin Nazirlər Kabinetinin 2010-cu ilin sosial-iqtisadi yekunlarına həsr olunmuş iclasındakı nitqindən irəli gələn vəzifələri rəhbər tutaraq, son 3 ildə aparılan müsbət meyilləri davam etdirməklə, rüşvətxorluğa və korrupsiyaya qarşı mübarizəni daha da gücləndirsinlər. İclasda bütün sahələrdə şəffaflığın təmin edilməsi və maliyyə nəzarətinin gücləndirilməsi, vətəndaşların müraciətlərinə baxılmasına diqqətlə yanaşılması, vəzifədən sui-istifadə hallarının aradan qaldırılması ciddi vəzifə borcu kimi qarşıya qoyulmuşdur.

Ziyəddin SULTANOV

Xalq qəzeti.- 2011.- 16 mart.- S. 5.