Ordumuzun maddi-texniki təminatı daha da gücləndirilir

İldən-ilə ölkəmizin iqtisadiyyatı gücləndikcə, ordumuzun maddi-texniki təminatının və hərbi qulluqçuların sosial müdafiəsinin gücləndirilməsinə də diqqət artırılır. Hazırda dövlətimizin illik hərbi xərcləri işğalçı Ermənistanın dövlət büdcəsinə bərabərdir. Təkcə bu faktın özü Azərbaycanın ordu quruculuğuna göstərdiyi böyük diqqətin bariz nümunəsidir. Dəfələrlə Prezident İlham Əliyev bəyan edib ki, ordu quruculuğu onun siyasi kursunun əsas prioritet istiqamətlərindən biridir.

Son illərdə Müdafiə Nazirliyinin hərbi şəhərciklərində yerinə yetirilmiş tikinti, yenidənqurma, təmir və abadlıq işləri dövlətin hərbi qulluqçulara göstərdiyi diqqət və qayğının ən bariz nümunəsidir. Ordu mənsubları bu qayğıya əməli işlə - yüksək döyüş hazırlığına yiyələnmək və nizam-intizamla cavab verirlər.

Hazırda quruculuq işləri uğurla davam etdirilir. Növbəti illər üçün yerinə yetiriləcək quruculuq planları da daim diqqət mərkəzində dayanan məsələlərdəndir. Müdafiə Nazirliyinin 43 hərbi şəhərciyində tikinti, yenidənqurma və təmir işlərinin təxmini statistikası kifayət qədər ürəkaçandır.

Ümumi sahəsi 124380 kvadratmetr olan 8 əsgər yataqxanası, 2 əsgər yeməkxanası, 2 qərargah, 2 tibb məntəqəsi, 3 yaşayış binası, 2 qazanxana, hamam, camaşırxana, cərrahiyyə korpusu və bir neçə inzibati binalar tikilərək hərbi qulluqçuların ixtiyarına verilmişdir.

158.570 kvadratmetr ümumi sahəsi olan 5 əsgər yataqxanasının, 2 əsgər yeməkxanasının, 2 qərargahın, 2 tibb məntəqəsinin, 6 yaşayış binasının, 2 qazanxana, hamam, camaşırxananın tikintisi isə hazırda həyata keçirilir.

Ümumi sahəsi 79 845 kv olan klub-yeməkxanada, cərrahiyyə şöbəsində, 8 mərtəbəli müalicə korpusunda, yataq və tədris korpusunda əsaslı təmir işləri yerinə yetirilir.

Ümumi sahəsi 922 kvadratmetr olan 15 qazanxana binası inşa edilmiş, müasir tipli texnoloji avadanlıqlar ilə təchiz olunmuş, ümumi uzunluğu 17 850 metr olan ərazidaxili istilik xətləri və 52 binada binadaxili istilik sistemləri çəkilmişdir.

Müxtəlif hərbi şəhərciklərdə yerləşən 5-dən çox qazanxana binaları tam təmir olunmuş, 14 binanın daxili istilik sistemləri yenidən qurulmuşdur..

Hərbi şəhərciklərdə ümumi uzunluğu 7 500 metr olan magistral yüksək gərginlikli elektrik xətləri çəkilmişdir.

Bir neçə hərbi şəhərciklərdə 8 əsgər yataqxanası və 8 əsgər yeməkxanasında daxili təmir işləri yerinə yetirilib. Ümumi sahəsi 18 750 kv.m olan 24 "texniki" binanın dam örtüyü isə tam təmir olunub.

Tikintisi yekunlaşmaq üzrə olan yeni yeməkxanalarda da bir çox işlər artıq başa çatıb, hazırda içəridə üzlük işləri gedir. 2500-3000 nəfər üçün nəzərdə tutulmuş yeni əsgər yeməkxanalarında şəxsi heyətin böyük hissəsi bir dəfəyə yemək yeyə biləcək. Burada, iş icraçılarının bildirdiyinə görə, yeməkxana fəaliyyəti üçün lazım olan avropa standartlarına uyğun ən müasir avadanlıqlar quraşdırılacaq. Hətta təzə iaşə obyektlərində çörək bişirib şəxsi heyəti təmin etmək planlaşdırlıb.

Yeni yataqxanalar yeni layihələr əsasında tikilən binalardır. Taxta döşəmələrə malik hər otaqda on nəfərlik heyət qalacaq. Burada şəxsi heyətin rahat yaşaması üçün bütün şərait yaradılmışdır. Yataqxanalar mərkəzləşdirilmiş, istilik sistemilə təmin olunduğundan qışda binaların qızdırılması ilə bağlı heç bir problem olmayacaq. Hər mərtəbədə iki tərəfdə sanitar qovşaqları - tualet, əsgərlərin yuyunması üçün əlüzyuyan və duşlar olacaq. Təzə yataqxanalar daimi isti və soyuq su ilə təmin ediləcək. Həmçinin əsgərlərin məşğul olması üçün müasir tipli sinif otaqları da inşa edilməkdədir. Bir sözlə, həyata keçirilən layihələrdə hər şey xırdalıqlarına qədər nəzərə alınıb.

Yeni əsgər kazarmalarının tikinti işlərini həyata keçirən təşkilatın nümayəndələri söhbət zamanı bildirdilər ki, hərbçi ailələri üçün beşmərtəbəli əlavə yaşayış binaları da inşa edilir. Bakı,Gəncə, Şəmkir, Gədəbəy, Bərdə, Beyləqan, Ağstafa, Şamaxı və başqa bölgələrdə də hərbi hissələrin və hərbi şəhərciklərin yenidən qurulması istiqamətində mühüm tikinti-təmir layihələri həyata keçirilir. Şəxsi heyətin nümayəndələri görülən irimiqyaslı quruculuq işlərinə görə dövlətimizin rəhbərliyinə dərin minnətdarlıq hisslərini ifadə etdilər.

Ümumiyyətlə, ordumuzun maddi-texniki təminatı əsaslı dərəcədə yaxşılaşdırılmış, bu sahədə ən qabaqcıl texnologiyalara üstünlük verilmişdir. Bu gün şəxsi heyətin ərzaq təminatı, kalorilik baxımından da müasir tələblər səviyyəsindədir. Artıq əksər əsgər yeməkxanalarında xidmət personalı mülki şəxslərdən ibarətdir ki, bu da hazırlanan yeməklərin keyfiyyətində özünü göstərir. Bundan əlavə, əsgər yeməkxanalarında müasir Avropa standartlarına cavab verən avadanlıqlar quraşdırılıb. Hazırda müvafiq sahədə aparılan işlər uğurla davam etdirilir.

İsa İSMAYILOV,

polkovnik-leytenant

Xalq qəzeti.- 2011.- 20 mart.- S. 8.