Giləzidən Altıağaca

2011-ci il "Turizm ili"dir

2010-cu ilin "Ekologiya", 2011-ci ilin isə "Turizm" ili elan edilməsi heç də təsadüfi deyildir. Bu, möhtərəm Prezidentimizin rəhbərliyi altında respublikamızda gedən sosial-iqtisadi inkişafla, ekologiya və turizm anlayışlarının məna və məzmun etibarı ilə qarşılıqlı əlaqədə olmasından irəli gələn tədbirlər planlarının növbəti mərhələsidir.

"Ekologiya ili" respublikamızın bir çox yerlərində, xüsusən də Bakı şəhəri və onun ətraf ərazilərində kütləvi yaşıllaşdırma, təmizləmə işlərinin aparılması ilə yadda qaldı və bu işlər bu gün də davam etdirilməkdədir.

"Turizm ili"ndə isə qarşıda duran ümdə məsələlərdən biri turizm marşrut və məkanlarının seçilməsi, daha çox turistlərin cəlb edilməsi ilə bu sahənin sürətlə və intensiv şəkildə inkişaf etdirilməsindən ibarətdir.

Son illər Ekologiya və Təbii Sərvətlər Nazirliyinin Milli Geoloji Kəşfiyyat Xidmətinin Abşeron-Qobustan və Xəzəryanı Geoloji Axtarış Ekspedisiyası tərəfindən respublikamızın qərbi Xəzəryanı hissəsində turizm obyektlərinin, o cümlədən nadir geoloji obyektlərin aşkarlanması, qorunması və istifadəsi məqsədi ilə aparılan ardıcıl və məqsədyönlü işlərin nəticəsində Giləzi-Altıağac yolu müayinədən keçirilmişdir. Bu yol Bakı, Sumqayıt kimi iri sənaye şəhərlərinə ən yaxın və hər cür infrastrukturu: nadir geoloji obyektləri, rahat yolu, yol boyunca mehmanxanaları və gediş-gəliş üçün nəqliyyatı olan, yerli və xarici turistlər üçün bir turizm marşrutu kimi seçilmişdir.

Giləzi-Altıağac marşrutu Bakı-Siyəzən yolunun 42-ci kilometrliyindən , Giləzidən dağlara tərəf olan yolayrıcından başlayır. Yolayrıcından Xızı şəhərinə tərəf irəlilədikcə Tuğçayın sağ yamacında təbiətin yaratdığı möcüzələrdən birinə rast gəlmək mümkündür ki, bu da ağımtıl-boz rəngli bentonit tipli gillər ilə qırmızımtıl rəngli adi gillərin növbələşməsindən əmələ gəlmiş bir sənət "əsəridir". Ərazinin bəzi sahələrində tektonik hərəkətlərin təsirindən laylar sürüşmələrə məruz qalmaqla ilkin forma və yatım elementlərini dəyişmiş və müxtəlif amplitudalı fleksuraya bənzər formalar əmələ gətirmişdir ki, bunlar da yamac boyu müxtəlif bəzək formalarını xatırlatmaqla göz oxşayır. Yol boyunca diqqəti cəlb edən obyektlərdən biri də relyefi, suyu, havası, sosial-iqtisadi durumunun yeniləşməsi, inkişafı nəzərə çarpan Xızı şəhəridir. Burada yolüstü dincəlmək, ədəbiyyatımızın M.Müşfiq,C.Cabbarlı kimi klassiklərini yad etməklə Xızı dağlarının seyrinə dalmaq imkanı vardır.

Yolun davamı Ataçay dərəsi boyuncadır və burada dərənin sol və sağ yamacında geoloji proseslər nəticəsində əmələ gəlmiş bir çox nadir obyektləri müşahidə etmək mümkündür. Bu obyektlərdən biri Baxşılı kəndi ərazisində yerləşən sürüşmədir. Sürüşmə özünün ölçüləri ilə kənardan diqqəti cəlb edir. Onun eni 50 metrdən çox, uzunluğu isə bir neçə kilometrdir.

Ümumiyyətlə, bu ərazi üçün sürüşmələr xarakterikdir . Bu da burada çökmə mənşəli süxurların (gillərin, qumların, çaqılların, çınqılların, onların qarışıqlarının) daha geniş yayılmsı ilə əlaqədardır. Sürüşmələr özlərinin nəhəng miqyası, aldığı forma, görkəmi ilə diqqəti cəlb edir və insanı yer qabığında gedən proseslər haqqında düşünməyə vadar edir.

Dağlara tərəf irəlilədikcə Altıağac Milli Parkı daha çox maraq doğurur, çünki sözün əsl mənasında park ərazisinin canlandığı müşahidə olunur. Burada hər bir xırda kolun belə pöhrələndiyini gormək çətin deyildir. Park ərazisinə daxil olarkən burada ekoloji tarazlığın bərpası hiss olunur və meşənin sıxlığı, yaşıllığı, quşların səsi buralara xüsusi gözəllik verməklə insanı yaşamağa səsləyir.

Giləzi-Altıağac turizm marşrutunun ən gözəl istirahət obyektlərindən biri Altıağac kəndi yaxınlığında salınmış "Cənnət bağı" istirahət kompleksidir.

Kompleks meşə ətəyində sakit bir guşədədir. Burada ilin bütün fəsillərində istirahət etmək üçün hər cür şərait yaradılmışdır. Belə ki, burada yüksək zövq ilə tikilmiş mehmanxana, kotteclər, restoranlar, yay kino-konsert meydançası, açıq havada təmiz suyu olan hovuz, zoopark, uşaqlar üçün müxtəlif əyləncə obyektləri, meşə ərazisində inşa edilmiş çayxana və s. vardır.

Bütün bunlarla bərabər, "Cənnət bağı" istirahət kompleksində göstərilən yüksək səviyyəli xidmətləri gördükdən sonra insan, doğrudan da, özünü başqa bir aləmdə hiss edir.

"Cənnət bağı" kompleksində turistlərin istirahəti üçün maksimum şərait yaradılmışdır və burada insanların xoş istirahəti naminə yeni-yeni abadlıq, quruculuq işləri davam etdirilir. Respublikamızın gəzməli, görməli yerlərində belə komplekslərin olması bizi də çox sevindirir. Belə obyektlərin çoxluğu turist axınının çoxalmasına səbəb olur ki, bu da öz növbəsində iqtisadi inkşafın amillərindən biridir.

Giləzi-Altıağac marşrutu boyunca müxtəlif nadir geoloji obyektlərə rast gəlindiyindən marşrutun iri şəhərlərimizə yaxınlığı, rahatlığı, onun ilin bütün fəsillərində fəaliyyət göstərməsinə ehtiyacın olduğunu göstərir. Elə bu baxımdan marşrut boyunca gündəlik ekskursiyalar, bir necə günlük və daha çox vaxta istirahət turları təşkil etmək məqsədə uyğun olardı.

Fəxrəddin ABDULLAYEV,

geoloq

Xalq qəzeti.- 2011.- 19 mart.- S. 6.