Savab əməllərin ünvanı

"Uşaqların xoşbəxt gələcəyi" İctimai Birliyinin 15 yaşı tamam oldu

Həyatda xeyirxahlığı özü üçün gündəlik yaşayış normasına çevirmək, savab əməllər sahibi kimi tanınmaq çox az adama nəsib olur. Bu cür insanlar barədə, adətən, belə deyirlər: o, savab əməlləri ilə bu dünyada hörmət, axirətdə isə cənnəti qazanmışdır....

Haqqında söhbət açacağım "Uşaqların xoşbəxt gələcəyi" İctimai Birliyinin təsisçisi və rəhbəri Nərgiz Kərimova belə xoşbəxt insanlardandır. Körpələrimizin sağlam həyatı üçün əlindən gələni əsirgəməyən bu Azərbaycan xanımının atdığı hər bir addımı alqışlamamaq olmur. Fəaliyyətini sistemləşdirmək üçün 1995-ci ildə "Uşaqların xoşbəxt gələcəyi" İctimai Birliyini yaradan Nərgiz Kərimova quruma xeyriyyəçiliyi ilə seçilən şəxsləri bu nəcib işə yardım göstərməyə dəvət edir. Qısa müddət ərzində ana nəvazişindən , ana qayğısından məhrum olan və fiziki cəhətdən qusurlu uşaqlara yardım göstərməyə başlayır. Təşkilat uşaqların sağlamlığına və sosial ehtiyaclarına qayğı göstərmək üçün respublikamızda və xaricdəki müxtəlif xəstəxanalar, klinikalar, sağlamlıq və reabilitasiya mərkəzləri ilə sıx əməkdaşlıq yaradaraq, ürək qüsuru, böyrək çatışmazlığı olan, uşaq siribral iflicindən və digər xəstəliklərdən əziyyət çəkən və müalicəyə maddi imkanı olmayan 450-dən çox uşağın əməliyyat və ya müalicəsinin həyata keçirilməsini təmin edir. Nərgiz xanımın rəhbərliyi ilə Ukrayna, Rusiya və İranın xəstəxanalarına müalicəyə aparılan uşaqlar sağalıb Vətənə qayıtmışlar. Ukrayna xəstəxanaları ilə qurulan sıx əməkdaşlıq sayəsində bu respublikanın kardiologiya mərkəzinin tanınmış kardioloqu Todurov həkim briqadası ilə Bakıya gələrək 265 uşağı müayinədən keçirmişdir.

Bütün bunlarla qane olmayan təşkilatın üzvləri il ərzində ölkəmizdə keçirilən bütün bayramlar ərəfəsində valideyn qayğısından məhrum olaraq uşaq evlərinə sığınmış körpələrə baş çəkir, onlara hədiyyələr verir, təbəssüm bəxş edirlər.

"Uşaqların xoşbəxt gələcəyi" İctimai Birliyi həftədə bir gün 2, 3, 11 saylı uşaq evlərinə və Sarayda yerləşən ruhi-əsəb dispanserinə baş çəkərək onlara sevincli anlar yaşadır. Təşkilatın səyi sayəsində Nizami rayonunda 3 saylı lal-kar internat məktəbinin əsaslı təmirinə və məktəb binasına istilik sisteminin qoşulmasına vəsait ayrılıb. Birliyin son tədbirlərindən biri isə 8 Mart - Beynəlxalq Qadınlar Günü münasibətilə "Əziz bacım" kampaniyası olub. Bu kampaniya çərçivəsində fevralın 18-dən martın 6-dək kimsəsiz və valideyn himayəsindən məhrum olmuş uşaq evlərində böyüyən qızlara hədiyyələr toplanıb. Bu hədiyyələr 8 Mart - Beynəlxalq Qadınlar Günündə onlara təqdim edllib.

Xalqımızın milli bayramı olan Novruz günlərində də təşkilat öz xeyriyyəçilik ənənəsinə sadiq qalaraq uşaq evlərinə baş çəkib. Təşkilatın topladığı sovqatlar sayəsində uşaq evlərinə yardımlar paylanıb, qocalar evinə ziyarətlər təşkil olunub.

Novruz bayramı ərəfəsində ombudsman Elmira Süleymanova və təşkilat üzvləri bəstəkar Şəfiqə Axundovanın evində qonaq olublar. Şəhid Fərid Əhmədovu da unutmayan Nərgiz Kərimova və həmkarları şəhidin evinə gedərək onun valideynləri ilə görüşmüşlər.

Bu gün ölkəmizdə xeyriyyəçilik adı ilə yaradılan qurumlar çoxdur. Arzu edərdik ki, onların hamısı sözdə yox, əməldə bu nəcib işlə məşğul olsun. "Uşaqların xoşbəxt gələcəyi" İctimai Təşkilatı kimi.

İsmayıl CƏBİYEV

Xalq qəzeti.- 2011.- 1 may.- S. 7.