Azərbaycan dövləti elmin inkişafı üçün lazım olan bütün addımları atır

Bütövlükdə, akademiyanın maddi-texniki bazasının möhkəmləndirilməsi işində konkret addımlar atılır. Bu siyasət bundan sonra da davam etdiriləcəkdir. Elə etməliyik ki, akademiyanın bütün ehtiyacları təmin olunsun və maddi-texniki bazası daha da gücləndirilsin.

Azərbaycan Respublikasının Prezidenti İlham Əliyevin AMEA-nın illik ümumi yığıncağındakı giriş nitqindən

Bakı, 26 aprel 2011-ci il

Azərbaycan Respublikasının Prezidenti İlham Əliyevin sərəncamı ilə bu ilin payızında ölkəmizin dövlət müstəqilliyinin bərpa olunmasının 20 illiyi təntənəli surətdə qeyd ediləcək. Xalqımız həmin əlamətdar hadisəyə böyük ruh yüksəkliyi ilə hazırlaşır. Təbii ki, cəmiyyət həyatının bütün sahələrində çalışan insanlar ümummilli lider Heydər Əliyevin siyasi müdrikliyi nəticəsində qorunub saxlanılan, əbədiləşdirilən dövlət müstəqilliyimizin ikinci onilliyinin də uğurla başa çatmasını xüsusi bayram kimi qeyd edəcəklər.

Daim xalqın önündə olan Azərbaycan elm ictimaiyyəti, xüsusən, Milli Elmlər Akademiyamız da dövlət başçısının sərəncamı ilə yubiley tədbirlərinin həyata keçirilməsi üçün digər dövlət orqanları ilə bərabər məsul təşkilat kimi müəyyənləşdirilib. Alimlər bu addımı Prezidentin akademiyaya göstərdiyi böyük etimad kimi qəbul edirlər. Dövlət başçısının akademiyanın illik ümumi yığıncağına dəvət edilməsi və elm adamlarımızın son bir ildə əldə etdiyi nailiyyətlər barədə bilavasitə Prezidentin iştirakı ilə hesabat vermək istəyi də məhz onlara göstərilən etimadın cavabı kimi qiymətləndirilirdi. Eyni zamanda, Prezidentin Elmlər Akademiyasına gəlişi akademiya binasının 2007-ci ildən başlanan əsaslı təmir və yenidənqurma işlərinin başa çatması ilə də əlaqədar idi. Milli Elmlər Akademiyasının prezidenti Mahmud Kərimovun söylədiyi bu əsaslandırmalarla yanaşı dövlət başçımızın elm adamlarına göstərdiyi qayğı və diqqətin miqyasını aydınlaşdırmaq üçün xüsusi bir siyahı tərtib etmək zərurəti yaranar. Ən başlıcası isə odur ki, Prezident İlham Əliyev də ulu öndər Heydər Əliyev kimi, vaxtaşırı alimlərin qonağı olur, onların arzu-istəklərinin, reallaşdırmaq istədikləri elmi layihələrlə maraqlanır.

Heydər Əliyev Azərbaycan tarixinin ən ağır dövrlərindən olan 1993-cü ilin iyun ayında Milli Elmlər Akademiyasının alimləri ilə görüşmüş, cəmiyyətin bəlalardan, məhrumiyyətlərdən xilas edilməsi üçün alimlərin nə düşündüyünü şəxsən öyrənmişdi. Prezident İlham Əliyev isə Azərbaycanın ən iti sürətlə inkişaf etdiyi, beynəlxalq aləmdə özünəməxsus nüfuz qazandığı bir zamanda alimlərin yanındadır, onların arzu-istəklərini öyrənir. Ekspertlərin fikrincə, burada çox incə bir məqam var. Yəni Azərbaycan dövləti həm çətin məqamda, həm də xoş gündə elmə güvənir, həm dövlətin zəif vaxtında, həm də qüdrətli günlərində alimə, elmə qayğı göstərir. Bu gün elə bir tədbir olmaz ki, Prezident İlham Əliyev çıxış edərkən "biz bütün inkişaf proqramlarımızı elmi şəkildə əsaslandırırıq" ifadəsini işlətməsin. Yəni cəmiyyət inkişaf etdikcə elmə, alim təfəkkürünə daha böyük ehtiyac yaranır. Prezident İlham Əliyev kosmosa ilk Azərbaycan rabitə peykinin göndərilməsi üçün gedən hazırlıq işlərindən tutmuş, hansısa ucqar kənd məktəbində informasiya-kommunikasiya texnologiyalarının tətbiqinə qədər bütün məsələlərdə alimlərin üzərinə böyük vəzifələr düşdüyünü qeyd edir, onlara böyük etimad göstərir. Xüsusən, müasir dünyanın ən aktual məsələlərindən olan qloballaşma prosesinə münasibətdə - Azərbaycanın bunun prosesindən kənarda qalmaması və qloballaşmanın Azərbaycana mənfi təsir göstərməməsi üçün elm adamlarının üzərinə böyük vəzifələr düşdüyü qeyd olunur.

Bir sözlə, bu gün Azərbaycan dövləti müstəqilliyinin ilk illərində olduğu kimi, kor-koranə deyil, elmi şəkildə əsaslandırılmış prinsiplərlə idarə olunur. İdarəetmənin elmi metodlarından məhrum olan Ermənistandan fərqli olaraq Azərbaycan tərəqqinin xüsusi modelini - Azərbaycan nümunəsini formalaşdırmışdır. Bütün bunların təməlində isə ulu öndər Heydər Əliyevin siyasi müdrikliyi dayanır. Aprelin 26-da akademiyada keçirilən illik ümumi yığıncaqda bu arqumentlər dönə-dönə yada salındı, konkret faktlarla qeyd edildi.

Prezident İlham Əliyev öz giriş nitqində alimlərin diqqətini bir tarixi məqamın üzərinə yönəltdi: "...Siz yəqin ki, bunu yaxşı xatırlayırsınız, - 1992-ci ildə akademiyanın ləğvi barədə, bağlanması haqqında təkliflər irəli sürülmüşdü. Əgər 1993-cü ildə Heydər Əliyev xalqın tələbi ilə Azərbaycanda siyasi hakimiyyətə qayıtmasaydı, yəqin ki, akademiyanın taleyi çox acınacaqlı ola bilərdi. Məhz Heydər Əliyevin Azərbaycan elminə bütün dövrlərdə göstərdiyi diqqət və qayğı nəticəsində elmin inkişafı sürətlə aparıldı". Bəs bəzi diletantların ləğv etmək, bağlamaq istədiyi Azərbaycan Milli Elmlər Akademiyasına bugünkü münasibət necədir? Həmin sualın cavabını da Prezident İlham Əliyevin yuxarıda qeyd etdiyimiz giriş nitqi əsasında veririk: "2009-cu ildə Elmin İnkişafı üzrə Milli Strategiya və Dövlət Proqramı qəbul edilmişdir, ondan sonra Elmin İnkişafı Fondu yaradılmışdır. Bu fondun xətti ilə nəinki müasir avadanlığın alınması öz həllini tapır, eyni zamanda müxtəlif qrantlar verilir ki, biz Azərbaycanda elmi araşdırmaları stimullaşdıraq". Cəmi 20 il ərzində Azərbaycan elminə göstərilən iki münasibət göz qabağındadır.

Yığıncağın açılış anlarında AMEA-nın prezidenti Mahmud Kərimovun söylədiyi giriş sözündə bugünkü Azərbaycan dövlətinin elmə münasibəti daha aydın şəkildə qeyd olunurdu: "Xüsusi olaraq qeyd etmək istərdim ki, son illərdə akademiyanın elmi-tədqiqat müəssisələrinin maddi-texniki bazasının gücləndirilməsi, binalarının əsaslı təmiri və yenidən qurulması intensiv hal almışdır... Azərbaycan Milli Elmlər Akademiyasının Şamaxı Astrofizika Rəsədxanasının, Milli Azərbaycan Tarixi muzeyinin, Nizami Gəncəvi adına Ədəbiyyat Muzeyinin əsaslı təmirini misal gətirmək olar".

Mahmud Kərimov iclasdakı çıxışında günümüz üçün əlamətdar olan daha bir məsələyə - ötən il Azərbaycan Respublikasının Dövlət mükafatlarının verilməsi ənənəsinin bərpa olunmasına toxunmuş və həmin mükafatlardan ikisini akademiyanın təmsilçilərinin almasını fəxrlə yada salmışdır: "...Qeyd etmək istəyirəm ki, müstəqil dövlətimizin tarixində ilk dəfə verilən Azərbaycan Respublikasının Dövlət mükafatlarını "Cənubi Xəzər hövzəsinin palçıq vulkanizmi və neft-qazlılığı" elmi nəşrlər silsiləsinə görə Geologiya İnstitutunun əməkdaşları, "Heydər Əliyev və Azərbaycan ədəbiyyatı" kitabına görə isə Ədəbiyyat İnstitutunun əməkdaşları almışlar. Fərəhli haldır ki, laureatlara Dövlət mükafatlarını Azərbaycan Respublikasının Prezidenti şəxsən özü təqdim etmişdir".

Bir sözlə, Azərbaycan dövləti öz elminin inkişafı, tərəqqisi üçün heç nəyi əsirgəmədiyi kimi, alimlərimiz də müstəqil Azərbaycanın adına layiq elmi nailiyyətlərə, yeni nəticələrə imza atırlar. Region ölkələrinin əksər alimləri Azərbaycanda elmə göstərilən qayğını və diqqəti özləri üçün əlçatmaz hesab edirlər. Azərbaycan alimləri isə bu gün onlar üçün yaradılmış şəraitin gələn il, sonrakı illərdə daha yüksək səviyyəyə qalxacağına əmindirlər. Bunu söyləyən alimlər Prezident İlham Əliyevin alimlərdən gələn istənilən təşəbbüsü, təklifi dəstəkləməsinə istinad edirlər. Prezident özü də akademiyadakı giriş nitqində bu məsələyə toxunmuşdu: "Elmin İnkişaf Fondunun yaradılması, Azərbaycan Elminin İnkişafı üzrə Strategiyanın və Dövlət Proqramının qəbul edilməsi də alimlər tərəfindən verilmiş təşəbbüslər idi".

İttifaq MİRZƏBƏYLİ

Xalq qəzeti.- 2011.- 1 may.- S. 1.