Gəncliyə diqqət gələcəyə qayğıdır

"Gəncliyə qayğı dövlətin gələcəyinə qayğıdır" prinsipini rəhbər tutan dövlət proqramlarının həyata keçirilməsi nəticəsində gənclərimizin nəinki ölkə daxilində, eləcə də beynəlxalq aləmdə öz bacarıq və qabiliyyətlərini uğurla nümayiş etdirmələrinə hərtərəfli şərait yaradılmışdır. Minnətdarlıq hissi ilə qeyd edirik ki, gəncliyə belə bir diqqət respublikamızda yaradılmış ictimai-siyasi sabitlik, sağlam demokratik cəmiyyət quruculuğunun məntiqi nəticəsidir. Bu gün Azərbaycan gəncləri ölkəmizin ictimai-siyasi, iqtisadi və mədəni həyatında fəal rol oynayır, dövlətimizin idarə olunmasında yaxından iştirak edirlər.

Ölkə gənclərinin hərtərəfli inkişafını daim diqqətdə saxlayan Prezident İlham Əliyevin bu günlərdə imzaladığı "Azərbaycan gəncliyi 2011-2015-ci illərdə" Dövlət Proqramı haqqında sərəncam gənclərə olan diqqət və qayğının təzahürüdür. Biz bunu ulu öndər Heydər Əliyevin gənclər siyasətinin davamı və yeni inkişaf mərhələsi kimi qiymətləndiririk.

Yeni dövlət proqramı layihəsinin hazırlandığı ərəfədə ölkə rəhbərinin respublikamızın müxtəlif sahələrində uğurlar qazanmış bir qrup gənci və tələbə gənclər təşkilatının nümayəndələrini qəbul edərək geniş görüş keçirməsi, dövlət gənclər siyasəti haqqında mövqeyini bir daha açıqlaması, gənclərin arzu, istək və təkliflərinin proqramda mütləq əksini və həllini tapacağına dəstək verməsi bizi ürəkdən sevindirdi. Azərbaycanda yeni Gənclər Fondu və Bakı şəhərində beynəlxalq standartlara cavab verəcək Gənclər Mərkəzinin yaradılması ideyası barədə Prezidentin verdiyi tapşırıqlar müasir Azərbaycan gənclərinin inkişafı baxımından xüsusi əhəmiyyət kəsb etməklə, hər birimizdə gələcəyə böyük inam və nikbinlik hissi yaratmışdır.

Görüşdə gənclərin məşğulluğunun, yaşayış şəraitinin, sağlamlığının və intellektual səviyyəsinin daha da yaxşılaşdırılması, ölkəmizdə yaradılmış çoxsaylı sənaye müəssisələri və digər beynəlxalq səviyyəli müasir obyektlərdə işləyəcək gənc, hərtərəfli hazırlığa malik texniki kadrların hazırlanması istiqamətində Prezident İlham Əliyevin verdiyi tapşırıqlar biz laçınlı məcburi köçkün gəncləri də ürəkdən sevindirdi. Məmnunluq hissi ilə qeyd edirik ki, ölkəmizdə idmanın inkişafına yüksək önəm verilməsi gənclərimizin sağlam, güclü və gözəl böyüməsində əhəmiyyətli rol oynayır, həmçinin çoxsaylı idmançılarımız ölkəmizə yüzlərlə şərəfli qələbə gətirirlər.

Prezidentin gənclərlə görüşdə Dağlıq Qaradağ probleminə dair qəti və dəyişməz mövqeyini bir daha açıqlaması, bu istiqamətdə böyük uzaqgörənliklə və məharətlə apardığı daxili və xarici siyasət müharibə meydanında yüzlərlə şəhid vermiş, beş Milli Qəhrəmanı olan laçınlı məcburi köçkün gənclərdə də işğal olunmuş torpaqlarımızın azadlığı uğrunda mübarizə əzmini artırır, onları hər an döyüşə hazır olmağa səfərbər edir. Laçınlı məcburi köçkün gənclər qəti əmindirlər ki, tezliklə Ali Baş Komandan İlham Əliyevin rəhbərliyi altında zəfər bayrağımız Şuşada, Laçında və digər işğaldan azad ediləcək tarixi torpaqlarımızda dalğalanacaqdır.

Bu gün hər bir azərbaycanlı kimi, biz gənclər də Azərbaycan dövlətinin vətəndaşı olmağımızdan şərəf duyur və ölkəmizin daha da çiçəklənməsi naminə bütün qüvvə və bacarığımızı sərf etməyə hazırıq.

Laçınlı məcburi köçkün gənclər adından:

Gülnar ƏLİYEVA,

Orxan CƏBRAYILOV,

Xaliq MUSAYEV və başqaları

Xalq qəzeti.- 2011.- 1 may.- S. 3.