Ağsuda silsilə tədbirlər davam edir

Ağsu rayon Mərkəzi xəstəxanasında "Heydər Əliyev və Azərbaycan səhiyyəsi" mövzusunda keçirilmiş tədbiri giriş sözü ilə açan Şəhrəbanı Məlikova ümummilli lider Heydər Əliyevin Azərbaycan səhiyyəsinə göstərdiyi diqqət və qayğıdan danışdı.

YAP Ağsu rayon təşkilatında "Heydər Əliyev və Azərbaycan gəncliyi" mövzusunda keçirilmiş tədbirdə rayon təşkilatının sədri Əli Hüseynov məruzə ilə çıxış etdi. Sonra Ağsu Rayon İcra Hakimiyyəti başçısının Ağsu şəhəri üzrə nümayəndəsi Cavan Cavadov ümummilli lideri davamçısı, Azərbaycan Respublikasının Prezidenti cənab İlham Əliyevin bu rayona diqqət və qayğısından danışdı. Tədbirin sonunda Yeni Azərbaycan Partiyasına qəbul olmuş ağsululara partiyanın üzvülük biletləri təqdim olundu.

Rayon təhsil şöbəsində "Heydər Əliyev və Azərbaycan təhsili mövzusunda keçirilən tədbiri giriş sözü ilə Rayon Təhsil Şöbəsinin müdiri Tahir Xasi açdı. Sonra təhsil şöbəsinin müdir müavini Adil Kərimov, Bico kənd orta məktəbinin direktoru Yaşar Qarayev, 4 saylı orta məktəbin direktoru Şəfəq Vəliyeva çıxış etdilər.

Rayon Mədəniyyət və Turizm şöbəsində "Mədəniyyətimizin hamisi" mövzusundakı tədbir Ağsu rayon mərkəzləşmiş kitabxana sisteminin direktoru Cəbrayıl Bədəlovun sədrliyi ilə keçirildi. Tədbirdə orta məktəb şagirdləri ümummilli lider Heydər Əliyevə həsr olunmuş bədii kompozisiya ilə çıxış etdilər.

Rayon Gənclər və İdman İdarəsi, Müharibə, Əmək və Silahlı qüvvələr və Hüquq mühafizə orqanları vetetanları komitəsinin Ağsu rayon təşkilatı ilə birlikdə "Azərbaycan gənclərinin qəlbində daim yaşayan lider" mövzusunda tədbir keçirdi. Tədbirin maraqlı cəhəti ondan ibarət idi ki, yaşlı nəsil ümummilli lider Heydər Əliyevlə bağlı xatirələrini gənc nəsillə bölüşdü.

Rayondakı Heydər Əliyev Mərkəzində "Dünya durduqca yaşayan lider" mövzusunda tədbir keçirilmişdir. Tədbiri giriş sözü ilə Mərkəzin direktoru Reyhanə Tağızadə açdı. Sonra Azərbaycan Respublikasının Dövlət himni oxundu. Çıxış edən rayon ağsaqqalları Şahnəzər Nəzərov, Mirqədir Abdullayev, Səlim Allahverdiyev və Muradlı bələdiyyəsinin sədri Sehrayə Hümbətova ümummilli lider Heydər Əliyevin Ağsuya səfərləri zamanı onunla görüşdükləri zaman aldıqları təəssüratları danışdılar. Tədbirdə bədii kompozisiya ilə çıxış edən orta məktəb şagirdlərinə qiymətli hədiyyələr təqdim olundu.

Həmçinin Hacı Mustafaşah adına Qaraqoyunlu kənd orta məktəbinin açılış mərasimi olmuşdur. Təməli 2008-ci ildə qoyulmuş 2 mərtəbəli, 220 şagird yerlik məktəb binası Heydər Əliyev Fondunun vəsaiti hesabına tikilmişdir. Tədbiri giriş sözü ilə Ağsu rayon İcra Hakimiyyətinin başçısı Ənvər Seyidəliyev açmışdır. Ardınca məktəbin məzunları - İqtisad Universitetinin kafedra müdiri, professor Sifariz Səbzəliyev və "Sobsan şirkətinin nümayəndəsi Söhrab Səbzəliyev çıxış etdilər. Söhrab Səbzəliyev məktəbin açılışı münasibəti ilə şagirdlərə 2 kompyuter dəsti hədiyyə etmişdir.

Bütün tədbirlər ulu öndər Heydər Əliyevin abidəsi önünə əklil və tər gül dəstələrinin qoyulması ilə başlanmışdır. Tədbirlərin sonunda ulu öndər Heydər Əliyevə həsr olunmuş filmlər nümayiş etdirilmişdir.

İ.MUSAOĞLU

Xalq qəzeti.- 2011.- 7 may.- S. 11.