Ümummilli lider Heydər Əliyevin anadan olmasının 88-ci ildönümü münasibətilə Ağsu rayonunda Şirvan aşıqlarının birinci yaradıcılıq festivalı keçirilmişdir

Ümummilli lider Heydər Əliyevin anadan olmasının 88-ci ildönümü ilə əlaqədar Ağsu rayonunun Çiyni kəndində Heydər Əliyev Fondunun dəstəyi ilə tikilmiş 100 yerlik Mədəniyyət Sarayının Ağsu Rayon İcra Hakimiyyəti başçısının Çiyni kənd ərazi dairəsi üzrə icra nümayəndəliyinin inzibati binasının və Çiyni kənd idman kompleksinin açılış mərasimi olmuşdur.

Açılış mərasimindən sonra Respublika Uşaq Fondunun, Respublika Aşıqlar Birliyinin və Ağsu Rayon İcra Hakimiyyətinin birgə layihəsi əsasında Şirvan aşıqlarının birinci yaradıcılıq festivalı keçirilmişdir. Tədbiri giriş sözü ilə Ağsu Rayon İcra Hakimiyyətinin başçısı Ənvər Seyidəliyev açaraq bildirdi ki, festivalın ulu öndər Heydər Əliyevin anadan olmasının 88-ci ildönümü ərəfəsində keçirilməsi heç də təsadüfi deyil. Çünki müasir Azərbaycan mədəniyyətinin formalaşması məhz ümummilli lider Heydər Əliyevin adı ilə bağlıdır. Milli Məclisin deputatı Gülər Əhmədova dövlətimizin mədəniyyətin bütün sahələrinə, xüsusilə aşıq sənətinə diqqət və qayğısından söz açdı. Sonra respublikamızın tanınmış xanəndələrinin və aşıqlarının iştirakı ilə geniş konsert proqramı təqdim edildi. Mədəniyyət nümayəndələrinin çıxışları tədbir iştirakçılarında xoş əhval-ruhiyyə yaratdığından gur alqışlarla qarşılandı. Hər bir çıxışçıya festivalın xatirə hədiyyələri təqlim olundu. Tədbirin sonunda xalq şairi Baba Vəziroğlunun ulu öndər Heydər Əliyevə həsr olunmuş şeiri tədbir iştirakçılarının ayaq üstə alqışları ilə qarşılandı.

Həmin gün həm də Ağsu rayon Gənclər və İdman İdarəsinin təşkilatçılığı ilə Azərbaycan Respublikası Gənclər və İdman Nazirliyi tərəfindən təsdiq olunmuş tədbirlər planına əsasən Ağsu rayonunda Ağsu, Şamaxı, Göyçay, Ağdaş, Zərdab, İsmayıllı və Yevlax rayonlarının komandalarının iştirakı ilə keçirilən ümummilli lider Heydər Əliyevin doğum gününə həsr olunmuş taekvando üzrə açıq rayon çempionatına start verilmişdir. Çempionat öz işini 9 may 2011-ci ildə başa çatdıracaqdır.

İlqar HƏSƏNOV

Xalq qəzeti.- 2011.- 8 may.- S. 16.