Tələbə Qəbulu üzrə Dövlət Komissiyasında mətbuat konfransı

Mətbuat konfransında TQDK-nın sədri Məleykə Abbaszadə geniş məruzə ilə çıxış etdi. O bildirdi ki, ali təhsil müəssisələrinə və tam orta təhsil bazasında orta ixtisas təhsili müəssisələrinə qəbul imtahanlarında iştirak etmək üçün ərizə qəbulu davam edir.

2011-2012-ci tədris ili üçün Azərbaycan Respublikasının ali təhsil müəssisələrinə və tam orta təhsil bazasında orta ixtisas təhsili müəssisələrinə qəbul imtahanlarında iştirak etmək üçün abituriyentlər mayın 31-dək internet vasitəsilə elektron ərizələrini doldurmalı və tələb olunan sənədləri Sənəd Qəbulu Komissiyalarına (SQK) təqdim edərək ərizələrini təsdiq etdirməlidirlər.

Məleykə xanım xüsusi qabiliyyət tələb edən ixtisaslar üzrə təhsil almaq istəyən abituriyentlərin seçmə turlarda iştirak etmələri barədə də məlumat verdi. O bildirdi ki, ali təhsil və tam orta təhsil bazasında orta ixtisas təhsili müəssisələrinin xüsusi qabiliyyət tələb edən ixtisasları üzrə təhsil almaq istəyən abituriyentlər qəbul imtahanlarında iştirak etmək üçün ilk növbədə ümumi qaydada elektron ərizə formasını doldurmalı, onu təsdiq etdirməli və seçdikləri ixtisasa müvafiq Qabiliyyət İmtahanı Komissiyasında (QİK) mayın 31-dək TQDK tərəfindən mərkəzləşdirilmiş qaydada keçiriləcək seçmə turda iştirak etməli və müvəffəqiyyət qazandıqları təqdirdə qeydiyyatdan keçməlidirlər. Seçmə tur təsviri sənət, musiqi sənəti, memarlıq və dizayn, teatr, kino və xoreoqrafiya sənətləri, bədən tərbiyəsi və idman istiqamətləri üzrə keçirilir.

Qabiliyyət imtahanlarının proqramları, qiymətləndirmə meyarları, tapşırıq nümunələri və metodiki tövsiyələr bu il "Abituriyent" jurnalının xüsusi buraxılışı olan "Təsviri sənət", "Musiqi sənəti", "Memarlıq və dizayn", "Teatr, kino və xoreoqrafiya sənəti", "Bədən tərbiyəsi və idman" adlı vəsaitlərdə çap olunmuşdur.

Məleykə xanım dedi ki, rus bölməsinə sənəd verən abituriyentlər üçün "Azərbaycan dili" fənnindən imtahan iki dəfə - 2011-ci il mayın 22-də Bakı şəhərində və digər bölgə mərkəzlərində, iyunun 26-da isə yalnız Bakı şəhərində keçiriləcək. Mayın 22-də keçirilən imtahanda iştirak etmək istəyənlər ərizələrini mayın 16-dan gec olmayaraq müvafiq SQK da təsdiq etdirməlidirlər.

Həmçinin vurğulandı ki, mayın 15-də respublikanın 25 şəhərində sınaq imtahanı keçiriləcək.

Mətbuat konfransında bildirildi ki, Rusiya Federasiyası ali təhsil müəssisələrində Azərbaycan Respublikası vətəndaşları üçün ayrılmış yerlərin müsabiqəsində iştirak etmək istəyən abituriyentlər Azərbaycan Respublikası ali təhsil müəssisələrinin qəbul imtahanında iştirak etmək üçün doldurduqları "Elektron ərizə"ni təsdiq etdirdikdən sonra TQDK-da təşkil edilmiş Sənəd Qəbulu Komissiyasında qeydiyyatdan keçməlidirlər.

TQDK dövlət orqanlarına işə qəbul imtahanları keçirilməsi barədə də mətbuat konfransında məlumat verildi.

Mətbuat konfransında, həmçinin qeyd olundu ki, "Abituriyent" jurnalının xüsusi buraxılışı olan "Ali təhsil müəssisələrinin bakalavr ixtisasları" adlı vəsait oxucuların istifadəsinə verilmişdir.

Məleykə xanım sonda jurnalistlərin çoxsaylı suallarını cavablandırdı.

Mehdi MÜKƏRRƏMOĞLU

Xalq qəzeti.- 2011.- 14.-may.- S. 1.