Azərbaycan "Eurovision" telemusiqi yarışmasının qalibi oldu

Xalqımız öz dostları ilə birlikdə möhtəşəm bir qələbə sevinci yaşadı

Arzu olunduğu və gözlənildiyi kimi, "Eurovision" telemusiqi yarışmasının final mərhələsinə çıxmış Azərbaycan təmsilçiləri Eldar Qasımov və Nigar Camal ölkəmizə birincilik qazandırdılar. Xalqımız nə qədər ürəkdən arzulasa da, ekspertlərin söylədikləri rəylər nə qədər yüksək olsa da bu, inanılmaz, Tanrı töhfəsi kimi bir qələbə oldu. İstəklərimiz, diləklərimiz Eldar və Nigar duetinin məftunedici çıxışı, təşkilatçıların qətiyyəti, Yerdə haqsevər insanların dəstəyi, Göydə Ulu Yaradanın razılığı ilə gerçəkləşdi.

Sayca 56-cı, 43 ölkənin qatıldığı, dünya teleməkanında canlı izlənilən, ən populyar beynəlxalq musiqi müsabiqəsində yarışmaya cəmi dördüncü dəfə qoşulan Azərbaycanın bu qələbəsi nə qədər inanılmazdırsa, bir o qədər də təbiidir, mütləqdir. Ölkəmiz bu müsabiqəyə birinci iştirakdan böyük inamla, əzmlə, məsuliyyətlə girişdi. Birinci il onluğa düşməklə qələbəyə inamı çoxaldı. İkinci il üçüncü yeri qazanmaqla əzmini artırdı. Üçüncü il dördüncü yer daha böyük məsuliyyət yaratdı. Nəhayət, bu inam, əzm və məsuliyyət yeni bir qəlibdə birləşib Azərbaycanı yarışmanın zirvəsinə yüksəltdi.

İştirakçıların "yaxşıların yaxşılarının yaxşıları" meyarı ilə seçilməsi, yarışmaya ən yüksək hazırlıq, təşkilatçı qurumların daxildə və kənarda apardığı dəqiq, ardıcıl iş "Eldar və Nigar" cütlüyünün Düsseldorf müsabiqəsində qələbəsini təmin etdi. Bununla dövlət müstəqilliyinin 20-ci ilində gənc Azərbaycan Respublikası 56-cı "Eurovision" yarışmasına ev sahibliyi etmək hüququ qazandı. Mayın 14-ü qədim, zəngin Azərbaycan mədəniyyətinin yeni tarixinə parlaq, şərəfli gün kimi yazıldı.

Tarixi haqlarına bütün sahələrdə - dərinliyi və genişliyi ilə sahib çıxan, uğurları ilə dünya dövlətləri və xalqları sırasında layiqli yerini tutan Azərbaycan bu qələbəsi ilə yüksək mədəni dəyərlər ölkəsi olduğunu təsdiqlədi. Ayağı misilsiz saz sənətinə dayanan, qəlbi muğam hikmətləri ilə döyünən Odlar Yurdunun başı Avropa musiqisinin zirvəsinə çatdı. Saz və muğam sənətini bəşəri musiqi kimi dünya mədəni irsinə ərməğan edən xalqımız Avropanın musiqi aləmini onun öz dəyərləri ilə fəth etdi. Bu, Azərbaycanın mədəni qatın dərinliyi, çoxqatlığı, zənginliyi üzərində ucalan bir məmləkət olduğunu bir daha dünyaya göstərdi.

Belə bir qələbəyə, özünütəsdiqə, dostları sevindirməyə, düşmənləri düşündürməyə Azərbaycan çoxdan möhtac idi. Faciələr, fəlakətlər silsiləsindən sıyrılıb çıxan, dirçələn, dikəlib yüksəlişə səmtlənən bir ölkə belə bir uğurun qazanılmasına artıq məhkum idi. Xalqımız dünyada boy verən, dəyərləndirilən belə bir qələbənin sevincinə təşnə idi. "Eurovision" mübarizəsi Azərbaycanın nəyə qadir olduğunu dünyaya göstərib, qəbul etdirmək, qalib gəlmək yürüşü kimi uğurla nəticələndi və böyük qələbəmizin mümkünlüyünə, qarşısıalınmazlığına ümumxalq inamını qüvvətləndirdi.

Bu sənət triumfu 9 milyonluq Azərbaycan Respublikasının adını ulduz yüksəkliyinə çatdırdı. Bu qələbənin sevinci 9 milyonu misilsiz bir mərhəmliklə ən yüksək duyğuların ağuşuna aldı. Eyni məmnunluq, coşğunluq, mənəvi yüksəklik uşaqlı-böyüklü, iqtidarlı-müxalifətli, sevincli-hüznlü, zövqlü- zövqsüz hər kəsi duyğulandırdı, hamını həmrəyləşdirdi. Azərbaycanlı olmağımızdan könül dolusu öyünc duyduq. Qəlbimizdə illərdən bəri qurum bağlamış ağrı-acıların hisi-pası bir anda qopub töküldü. Ruhumuz sevinc qanadlarında qələbənin ulduz yüksəkliyinə qanad açdı. Qarabağ müharibəsində qəlbi yaralanmış şəhid analarının da eyni açıldı, qələbə sorağından qəddi dikəldi.

Bu qələbə qonşu dövlətlərdə, yaxın-uzaqlarda yaşayan 50 milyonluq azərbaycanlıları, 80 milyonluq qardaş Türkiyəni, 300 milyonluq türk dünyasını türk balalarının xalqlar yarışmasında ən yüksək pilləyə qalxmasından doğan bir məmnunluqla sevindirdi, hamıya bir türklük iftixarı gətirdi. Bu yarışmada xalqımızın dostları və düşmənləri, havadarları və bədxahları da açıq-aydın göründü. Eldarla Nigarın ifa etdiyi "Ürküb-qaçan" adlı duet müsabiqənin ən cazibəli, təsirli ifası kimi qabaqcadan etiraf olunsa da, finalda şahanə məharətlə təqdim olunsa da, həqiqi qiymətin qeydə alınması bundan da artıq diqqət, ədalət tələb edirdi.

Azərbaycan nümayəndə heyəti və onun arxasında dayanmış rəsmi və ictimai qurumlarımız xaricdə nəvazişlə "El and Nikki" adlandırılan cütlüyə layiq olduğu qiyməti qazandırdı. Azərbaycanın hesabına yazılan 221 balın 36-nı 12 ballarla - Türkiyə, Rusiya və Malta; 50-ni 10 ballarla Ukrayna, Rumıniya, Moldova, Xorvatiya və San-Marino; 72-ni 8 ballarla - Gürcüstan, Albaniya, Polşa, Avstriya, Portuqaliya, İslandiya, Kipr, Estoniya və Litva verdi. Beləliklə, 18 dövlətin 158 balı ümumi hesabın 72 faizini təşkil etdi.

Slovakiyanın və Macarıstanın 7 balları, Fransanın, Belarusun və Hollandiyanın 6 balları, Finlandiyanın və Yunanıstanın 6 balları rəqəmi 200-ə çatdırdı. İsrailin verdiyi 4, İsveçin və Belçikanın 3, Latviyanın 2 balları olmasaydı belə Azərbaycan 185 bal toplayan İsveçi və 189 bal yığan İtaliyanı geridə qoyaraq qalib gələcəkdi. Bu rəqəmlərin heç biri təsadüfi deyil, ya Azərbaycana, ya da sənətə verilən qiymətləri ifadə edir.

"Eurovision" təcrübəsi və sənət potensialı daha güclü olan qardaş Türkiyənin finala çıxa bilməməsi Azərbaycan komandasının üzərində ikiqat yük qoymuşdu. Bu həm də Azərbaycana Türkiyəyə verməli olacağı yüksək balla əlavə manevr imkanı qazandırdı. Türkiyə 12 balı qardaş Azərbaycana ürəkgenişliyi ilə bağışladı. Bu həm sənətə, həm də qardaşlığa sədaqət, sevgi nümunəsi oldu. Qələbə prizini əllərində yüksəldən Eldarla Nigarın səhnəyə Azərbaycan və Türkiyə bayraqları ilə çıxması bu sevginin duyğulu əvəzi, türklüyə ehtiram kimi diqqətdən yayınmadı.

Rusiyanın 12 balında yaxın keçmişin ortaq dəyərlərinin təsiri vardısa, uzaq və kiçik Malta öz 12 balı ilə onlara verdiyi yüksək sənət zövqünə görə Eldar və Nigarı mükafatlandırdı. Ukraynanın və Moldovanın 10, Gürcüstanın, Litvanın və Estoniyanın 8, Belarusun 6 balları da "köhnə qardaşlığın" unudulmaması kimi dəyərlidir. Hərçənd, Gürcüstan Rusiyadan nümunə götürüb 8 deyil, 12 bal versəydi "ümumi bazarlıq"da o qədər də uduzmazdı. Biz İsraildən 4 deyil, daha çox bal gözləyirdik. Orasını da deyək ki, səslərin hesablandığı həlledici anlarda bu ölkənin İsveçə verdiyi yüksək bal skandinaviyalıları irəliyə çıxarıb, Azərbaycanı dala atmaqla, hamımıza müvəqqəti həyəcan yaşatdı. O ki, qaldı İsveçrənin 1 balına, bunu, bəlkə də, anlamaq olar, lakin dostluq əlimizi çəkmədiyimiz Latviyanın 2 balı qonşuları Litva və Estoniyanın 8 balları ilə müqayisədə miskin göründü.

Rumıniyanın, Xorvatiyanın və San-Marinonun 10, Avstriyanın, İslandiyanın, Polşanın, Portuqaliyanın, Bosniya-Hersoqovinanın, Albaniyanın və Kiprin 8, Macarıstan və Sloveniyanın 7 balları da qədirbilənliklə qarşılandı. Almaniya, İspaniya, İngiltərə, İtaliya kimi nəhənglərin Azərbaycana, sənətə biganəliyi, "bazarlığa" önəm verməsi ilə müqayisədə Fransanın 6 balı bu ölkənin həm də yüksək musiqiyə hörmətinin göstəricisi oldu. Ümumən, 12 ölkənin yerdə qalan 30 dövlətin irili-xırdalı səsi ilə seçilmiş qaliblərin istedad və məharətini "görməməsi" onların ya zövqu, ya da obyektivliyi barədə şübhələnməyə əsas verir.

Yarışmanın finalındakı çıxışlar, səsvermə hələ çox təhlil olunacaq, hər ölkə özü üçün gərəkli, ibrətli nəticələr çıxaracaq. Tabloda səsvermənin bitməsi, birinci yerdə görünən Azərbaycan sözünün qarşısında "221" rəqəminin yazılması ilə xalqımızın aylardan bəri davam edən intizarına, gecəyarı yaşadığı həyəcanlı dəqiqələrə son qoyuldu. Həmin anda Almaniyadan canlı yayımı "İctimai" televiziyada izləyən soydaşlarımızın qəlbində sevinc vulkanları püskürməyə başladı.

Komandamızın üzvləri səhnəyə çıxıb sonsuz sevincini bu qələbəni gözləyənlərlə paylaşdılar, prizi misilsiz bir təntənə ilə qəbul edib başları üstünə qaldırdılar. Yarışma bitsə də, Azərbaycan nümayəndə heyətinin rəhbəri Adil Kərimlinin növbəti ev sahibliyinin sənədini müsabiqənin icraçı direktoru Jon Ola Sanddan qəbul etməsi ilə ölkəmizin yeni "Eurovision" ili başlandı.

Azərbaycanın "Eurovision" müsabiqəsinə böyük inamla qoşulması, yüksək hazırlıqla çıxışlar etməsi dördüncü il zəfərlə nəticələndi. Saz və muğam ölkəsi Avropa tələbələrini qısa müddətdə cavablandırmağı da bacardı. Avropa və dünya Azərbaycanın ənənəvi musiqi imicinin yeni bir mükəmməl çalarını da gördü. Dünya, ən azı, bir neçə saatlıq, bir günlük də olsa gördü ki, 23 ildən bəri tarixin son dövrünün ən dolaşıq münaqişəsinə tərəfdaş olmuş Azərbaycan xalqı necə bir mədəni səviyyənin daşıyıcısıdır. Müsabiqədən dərhal sonra keçirilən mətbuat konfransında Eldar və Nigarın verdikləri cavablardakı nəcabət və humanist mülahizələr də xalqımızın sivil, sülhsevər imicini Düsseldorfdakı diqqət zirvəsindən dünyaya sərgilədi.

Qələbə sorağı həmin gecə mürgüləri qovdu, gözlərdən sevinc yaşları süzüldü, yeniyetmələrin, gənclərin alqışlar səsləndirməkdən səsləri kallaşdı. Əvvəlcə Bakının boy verən ən qədim, ən əzəmətli tikilisi "Qız qalası"nin qarşısı təbii bir təntənənin, atəşfəşanlığın mərkəzi oldu. Yollardakı xətləri basıb keçən, siqnal verən, tıxac yaradan maşınların pəncərə və lüklərindən bayraqla bərabər bədənlərini də çıxaran gənclərin kütləvi surətdə "qaydapozma"larına yol polisi də qəribə bir nəvazişlə baxmalı oldu. Bu anların qüdsiyyəti, həm də rəmzi anlamı da diqqəti cəlb edirdi: xalqımızın ayağı "Qız qalası"nda, başı sivil mədəniyyətin zirvəsində görünürdü. İndiki nəsillər bu böyük sənət qələbəsinin müjdəsini babaların nişanələrini və dünənimizin izlərini yaşadan İşərişəhərə gətirməklə öz kökünə, milli varlığına bağlılığın möhtəşəm bir görüntüsünü yaratdılar.

Həmin dəqiqələrdə və saatlarda Azərbaycanın hər bucağı, hər şəhəri, kəndi bu təntənəni hamılıqla, müqəddəs bir coşğunluqla yaşayırdı. Türk ellərində də bayraqlar dalğalanır, alqışlar söylənir, nəhəng bir sevinc seli hamını ağuşuna alıb yırğalayırdı. "Aztelekom" İstesalat Birliyinin yarışmanı canlı izləməyə imkan verən telekommunikasiya xətləri sonrakı saatlarda da dünyanın hər yerinə təbriklər daşıyır, gözaydınlığı yayırdı.

Tanınmış sənət adamları, ziyalılar "İctimai" televiziyanın studiyasından qazanılmış qələbəyə isti-isti münasibətlərini bildirirdilər. İTV-nin səyyar çəkiliş qrupları Bakı şəhərinin müxtəlif yerlərindən göstərdiyi təntənə fraqmentləri ilə qəribə bir çəkisizliyə düşmüş, baş vermiş hadisənin mahiyyətini birdən-birə anlamaqda çətinlik çəkən insanlarda tarazlıq yaradırdı. Bu boyda şəhərdə, sanki, özünə yer tapa bilməyən izdiham Azərbaycanın "Eurovision" mərkəzinə çevrilmiş "İctimai" televiziyanın yerləşdiyi Yasamala üz tutdu.

Neçə gündən bəri gecə-gündüzü olmayan, sevincdən bir az da ayıq-sayıqlaşmış "İTV"çilər adi günlərdə hər kəsin xüsusi buraxılışla keçdiyi həyətin qapılarını izdihamın üzünə taybatay açdı. Bir neçə dəqiqədən sonra səsgücləndiricilər gənc aşıq İlham Aslanbəylinin sazla ifa etdiyi "Azərbaycan" havasını ətrafa yaydı. Dədə Qorqud yadigarı saz Azərbaycan balalarının modern bir yarışmada qələbəsini qutlamağa gəlmişdi.

Elə bu vaxt sökülən dan yerinin fonunda bir parça bulud "İTV"nin başı üstündə dayanıb nurunu yerə səpələdi. Göylərin sevinc yaşları gözlərdən axan "yağışa" qarışıb könülləri duyğulandırdı. Yallı, rəqs, mahnılar fonunda çxış edən ziyalılar "İTV"nin canlı yayımında xalqımıza gözaydınlığı ünvanladılar, qalibləri və onların arxasında dayanmış ölkə rəhbərliyini təbrik etdilər. Mədəniyyət və turizm, gənclər və idman nazirliklərinin, Heydər Əliyev Fondunun yarışmaya verdikləri dəstək, İctimai Teleradio Yayımları Şirkətinin yüksək, məqsədyönlü təşkilatçılığı minnətdarlıqla qeyd olundu.

Azərbaycan üçün "Eurovision - 2011" bitdi, onun sevincləri isə uzun müddət yaşayacaq. Bu il ölkəmizdə "Eurovision - 2012" hazırlığı gedəcək. Bir ildən sonra Azərbaycan dünyanın "Eurovision" mərkəzi olacaq. Bu, İslam mədəniyyəti paytaxtı olmuş Bakının, Şərq-Qərb dialoqunda önəmli rol oynayan Azərbaycanın XXI əsr reallığıdır, nəhayət, xoş sabahların müjdəsidir.

Tahir AYDINOĞLU

Xalq qəzeti.- 2011.- 17 may.- S. 4.