Qadınların fəallığı yüksəlir

Astarada rayonun fəal qadınları ilə görüş keçirilmişdir

Görüş iştirakçıları əvvəlcə ümummilli lider Heydər Əliyevin abidəsi önünə gül dəstələri qoymuş, sonra Heydər Əliyev Mərkəzini ziyarət etmişlər.

Tədbir rayon icra hakimiyyətinin geniş zalında davam etdirilmişdir. İcra hakimiyyətinin başçısı Taleh Qaraşov qadınlarla bu görüşün vacibliyini qeyd etmiş, rayonun sosial-iqtisadi inkişafı ilə əlaqədar görüləcək işlər və mövcud problemlərlə bağlı fəal qadınların sözünə, arzu, təklif və rəylərinə ehtiyac olduğunu bildirmişdir. Qeyd olunmuşdur ki, hər bir cəmiyyətin ictimai-siyasi həyatında, dövlətin və dövlətçiliyin möhkəmlənməsində qadınların rolu əvəzsizdir. Azərbaycan qadını haqqında, onun şərəfli, zəngin ömür yolu, fədakarlığı və misilsiz şücaəti barədə neçə-neçə əsərlər yazılmışdır. Qədim tarixdən indiyədək Azərbaycan qadınları bütün məsul vəzifələrdə ləyaqətlə çalışmış, müstəsna xidmətləri ilə tarix yazmışlar. Keçmişdə də, bu gün də Azərbaycanda qadın hörmət və izzət sahibi hesab edilmişdir. 1918-ci ildə Azərbaycan Xalq Cümhuriyyəti yarananda onun ilk tədbirlərindən biri qadınlara seçmək və seçilmək hüququnun verilməsi olmuşdur.

Bu gün həyatımızın bütün sahələrində qadınlar böyük rol oynayırlar. Ulu öndər Heydər Əliyev həmişə Azərbaycan qadını haqqında xöş sözlər söyləmiş, qadınlara inanmış, onları cəmiyyətin dayağı hesab etmişdir. Müstəqillik dövründə də qadınların fəal mövqe tutmalarına ulu öndər xüsusi önəm vermişdir. Onun siyasi kursunun layiqli davamçısı, Azərbaycan Respublikasının Prezidenti İlham Əliyev də bu ənənəni davam etdirir.

Rayon Qadınlar Şurasının sədri Bəsti Əliyeva, təhsil şöbəsinin müdiri Qızbəs Məmmədova, Səncərədi icra nümayəndəliyindən Sakitə Əliyeva, Dövlət Sığorta Filialının müdiri İlhamə Həşimova, Təhsil İşçiləri Həmkarlar İttifaqı rayon təşkilatının sədri Laləzar Qurbanova, Şahağac icra nümayəndəliyindən Solmaz Mirzəyeva, Kijəbə qəsəbə orta məktəbinin müəllimi Girdənaz Məmmədova çıxış edərək rayon qadınlarının ictimai-siyasi həyatda fəal mövqeyi, yeniyetmə və gənclərin tərbiyəsində mühüm rolu haqqında geniş məlumat vermiş, onları narahat edən məsələlər barədə təklif, rəy və arzularını bildirmişlər. Qeyd olunmuşdur ki, rayonun ümumtəhsil məktəblərində müəllimlərin 1226-sı, səhiyyə müəssisələrində həkim və kiçik tibb işçilərinin 718-i, mədəniyyət sahəsində çalışanların 267-si qadındır.

Tədbirdə rayonda qadınların işlə təmin olunmasından ötrü tikiş və toxuculuq fabriklərinin açılması, qızların asudə vaxtının səmərəli təşkili üçün müvafiq şəraitin yaradılması, gənclərin zərərli vərdişlərə meylinin qarşısının alınması, narkomaniyaya qarşı mübarizənin daha təsirli aparılması ilə bağlı təkliflər irəli sürülmüşdür.

İcra başçısı Taleh Qaraşov tədbirə yekun vuraraq görüşdən razı qaldığını, burada qaldırılan bütün məsələlərin yerinə yetirilməsi üçün rayon ictimaiyyəti ilə birlikdə ciddi səy göstəriləcəyini bildirmişdir.

Əli NƏCƏFXANLI

Xalq qəzeti.- 2011.- 21 may.- S. 6.