Vətən həsrəti, azadlıq eşqi

Azərbaycan diaspor hərəkatının liderlərindən biri, ədəbiyyatşünas və şair Qulamrza Səbri Təbrizi oxucularla yeni görüşə son illərdə qələmə aldığı şeirlərdən ibarət "Günəşə doğru" toplusu ilə gəlmişdir. Dünya Azərbaycanlılarını Əlaqələndirmə Şurasının qərargahında keçirilən təqdimat mərasimində şairin ictimai-mədəni fəaliyyətində olduğu kimi, poetik yaradıcılığında da azadlıq, insan haqları, Vətən həsrəti, milli həmrəylik, əmin-amanlıq və gözəllik mövzularının aparıcı yer tutduğu vurğulandı.

Filologiya elmləri doktoru, şair Sabir Əmirov bildirdi ki, Təbrizdə doğulub, mükəmməl filoloji təhsil almış Qulamrza Səbri Təbrizi Avropada Qərb ədəbiyyatının tədqiqatçısı, Edinburq Universitetinin professoru olmaqla yanaşı, həm də elmi-mədəni dairələrdə şərqşünas və azərbaycanşünas kimi tanınır. Uzun illər Vətəndən uzaqlarda yaşamağa məhkum olmuş soydaşımız Azərbaycan dövlət müstəqilliyi qazanandan sonra taleyini Arazın bu tayı, Bakı ilə sıx bağlamışdır. Dünyaya göz açdığı torpağı azad, Vətənini bütöv görmək istəyən şair Dünya azərbaycanlılarının etnik-mədəni birliyinin yaradılması yolunda fədakarlıqla çalışır.

Qulamrza Səbri Təbrizi Dünya Azərbaycanlıları Konqresinin fəxri sədri kimi mübarizəsini ədəbi-bədii platformada da davam etdirir. Onun "Vətən həsrəti", Mənim iki dünyam", "Fikir dalğaları", "Həyat fəlsəfəsi", "Sönməz ocaq", "Seçmə şeirlər", "Ümid çırağı", Qürbət harayı", "Xudafərin", "Körpü", "Səssiz haray", "Pozulmamış dünya" şeir kitabları, adlarından da göründüyü kimi, vətəndaşlıq poeziyasının susmaz səsini, istək və həyəcanlarını ardıcıl olaraq soydaşlarımıza ünvanlayıb. Yeni kitabında şair bu baxımdan daha qətiyyətlidir:

Azad olmaq üçün

Millət ayağa qalxmalıdı.

Qırmalıdı birdəfəlik

Köləlik buxovlarını,

Əsarət zəncirini.

Bir kimsəyə

ümid etməməlidir

Özgəyə arxayın olmamalıdı.

Öz gücüylə alışmalı,

Öz gücüylə yanmalıdı.

Sabir Əmirov yeni toplunun ideya-sənətkarlıq cəhətlərindən də söz açdı, şairin bədii uğurunu ətraflı səciyyələndirdi.

Tanınmış azərbaycanşünas Elməddin Əlibəyzadə, professor Məhəmməd Teymurlu, musiqişünas Səadət Qarabağlı, jurnalist Qüdrət Piriyev, pedaqoq Babaxan Muradov, filosof Eliza İsmayılova, şair Sədaqət Qarabağlı və digər natiqlər Qulamrza Səbri Təbrizinin elmi, bədii və ictimai fəaliyyətinin Vətənə məhəbbət və ona övladlıq borcunun qaytarılması çevrəsində bütövləşdiyini söylədilər, şairin estetik məramını poetik nümunələrlə açıqladılar.

Kitabın redaktoru Ənvər Börüsoy bildirdi ki, professor Qulamrza Səbri Təbrizi Vətəndən uzaqlarda həmişə ürəyində bütöv bir Azərbaycan yaşatmışdır. Azərbaycanın quzeyi dövlət müstəqilliyi qazanan gündən şair-ədəbiyyatşünas məmləkətinin istiqlal qazanmış parçasının xidmətindədir. Onun kitablarını oxuduqca hər bir misranın arxasında əyilməz bir mübariz dayandığını görürük. Bu əsərlərdə böyük bir insanın düşüncəsi, fikri və həyat fəlsəfəsinin çalarlarından ibarət möhtəşəm bir palitra ilə üz-üzə qalırıq.

Çağdaş dünya ədəbiyyatının bütün üslub və cərəyanlarını dərindən bilən, forma və məzmun baxımından yeni düşüncəyə söykənən deyim və ifadələr şairin özünəməxsus yolu olduğunu təsdiq edir. Onun hər bir yeni şeirində çağdaş sosial düşüncənin, ictimai qavramların, hər şeydən uca hesab etdiyi Vətən sevgisinin isti nəfəsi duyulur. O, sanki, bu şeirlərdə təkcə öz düşüncələrini deyil, həm də mənsub olduğu milləti təmsil edən milyonların diləklərini qələmə almışdır.

Təqdimat mərasiminin sonunda professor Qulamrza Səbri Təbrizi söylənən xoş sözlərə görə təşəkkürünü bildirdi, yeni yaradıcılıq planları və cari ictimai fəaliyyəti barədə məlumat verdi.

Tahir AYDINOĞLU

Xalq qəzeti.- 2011.- 22 may.- S. 7.