Azərbaycan üçün "Eurovision - 2011" bitdi, "Eurovision - 2012" başlandı

Avropa Yayımları İttifaqının Avropa teleməkanında 1956-cı ildən keçirdiyi "Eurovision" televiziya mahnı yarışması illər keçdikcə populyarlaşıb, nüfuzlu beynəlxalq musiqi müsabiqəsinə çevrilmişdir. Artıq bu yarışma musiqiçilərin və musiqisevərlərin çevrəsini aşıb xalqların və ölkələrin mədəni həyatında önəm daşıyan hadisəyə çevrilmişdir.

Ciddi məzmunu və populyar formanı çağdaş musiqisevərlərin modern zövqü, ultra tələbatı səviyyəsinə qaldıran, dünya teleməkanı ilə yüz milyonlarla tamaşaçını canlı iştirakçıya çevirən bu mahnı müsabiqəsi hələlik mövzu və janrına görə alternativsizdir. Bu yarışmada uğurlu çıxış öz ölkəsini məşhurlaşdırmaq, beynəlxalq mədəni arenada iri planda görüşmək, müasirlik, öncüllük imici qazanmaq şansı sayılır. Təsadüfi deyil ki, bu müsabiqədə ölksinin uğurlu çıxışını adi musiqisevərlərdən tutmuş dövlət başçılarınadək hamı eyni istək və coşğu ilə arzulayır. Bu yarışmada qələbəyə görə dövlət başçıları bir-birini təbrik edirlər.

Müstəqilliyinin 20-ci ildönümünü qeyd etməyə hazırlaşan gənc Azərbaycan dövlətinin adı "Eurovision" yarışmasında cəmi dördüncü ildir ki, çəkilir. Ölkəmizin bu yarışmaya inamla qoşulması, ilk ildən uğurlu iştirakı hər il finala çıxaraq "fəxri onluq"da yer tutması "Eurovision" tarixinin diqqətçəkən faktlarından biri kimi mənalandırılır. 2008-ci ildəki səkkizinci, 2009-cu ildəki üçüncü, 2010-cu ildəki beşinci və nəhayət, builki birinci yer bu yarışmaya verdiyi önəmin, apardığı ciddi hazırlığın və əzmkar çıxışların parlaq göstəriciləridir.

Mayın 14-də Almaniyanın Düsseldorf şəhərində keçirilən, 43 ölkənin iştirak etdiyi 56-cı yarışmada Azərbaycan təmsilçiləri Eldar Qasımovun və Nigar Camalın yüz milyonlarla seyrçini heyran qoyan çıxışının ən yüksək - 221 bal qazanması beynəlxalq auditoriya üçün gözlənilməz, xalqımız üçün misilsiz bir hadisə oldu. Son illər bir sıra qərb-şərq layihələrində mərkəzi fiqura çevrilən iqtisadi, sosial uğurları ilə önə çıxan Azərbaycanın "Eurovision" qələbəsi ölkəmizi qədərincə tanımayanları təəccübləndirsə də, ölkəmizin iqtisadi potensialından, sosial-mədəni səviyyəsindən xəbərdar olanlar bu qələbəni təbii qəbul etdilər. Necə deyərlər, Azərbaycan böyük, güclü dövlətlərin əlinin yetmədiyi zirvəyə parlaq istedadları, ciddi hazırlığı, qarşısıalınmaz cəhdi ilə yüksələ bildi.

Bu qələbə 50 milyonluq xalqımıza sonsuz bir sevinc yaşatdı. Xalqımızın dostları, ilk növbədə türkdilli ölkələr türk övladlarının bu çətin yarışmada inamla zirvəyə yüksəlməsindən öyünc duydu, qələbə sevicinə şərik çıxdı. Ölkəmizin və xalqımızın mədəni həyatında bu böyük hadisə dövlət səviyyəsində də ciddi uğur kimi qarşılandı.

Azərbaycan Prezidenti İlham Əliyev və "Eurovision" yarışmasına hamilik edən Heydər Əliyev Fondunun rəhbəri Mehriban Əliyevanın müsabiqə qaliblərini dərhal təbrik etmələri və Vətənə dönən gün - mayın 16-da qəbul edib xoş sözlər söyləmələri bu uğurun dövlətimiz üçün də əhəmiyyətli olduğunun təsdiqidir.

Prezident İlham Əliyev "Eurovision" müsabiqəsində Azərbaycan təmsilçilərini qəbul edərkən qalib ifaçılar Eldar Qasımova və Nigar Camala üz tutaraq dedi:

- Mən sizi ürəkdən təbrik edirəm. Siz "Eurovision" mahnı müsabiqəsində ölkəmizi çox məharətlə təmsil etmisiniz, böyük qələbə qazanmısınız. Bu qələbə ölkəmizin qələbəsidir, sizin qələbənizdir. Bu qələbə ilə siz bütün Azərbaycan xalqını sevindirmisiniz. Yəqin, bilirsiniz ki, qələbədən sonra dərhal minlərlə insan küçələrə çıxıb sizin qələbənizi qeyd etdi. Azərbaycan bayrağı dalğalanırdı. Biz çox gözəl anlar yaşadıq. Siz doğrudan da, ölkəmizi ləyaqətlə təmsil etdiniz.

Biz "Eurovision" müsabiqəsində dördüncü dəfədir ki, iştirak edirik. Bütün bu illərdə yaxşı nəticələr göstərmişik. Ancaq bu nəticə, əlbəttə ki, ən gözəl nəticədir və zirvədir".

Qalib Eldar Qasımov beynəlxalq musiqi yarışmasında ölkəmizə qələbə qazandırdığına görə Prezident İlham Əliyevin sərəncamı ilə "Azərbaycan Respublikası Prezidentinin fəxri diplomu" ilə təltif edildi. Qardaş Türkiyənin Baş naziri Rəcəb Tayyib Ərdoğan, Gürcüstan Prezidenti Mixeil Saakaşvili dövlətimizin başçısı İlham Əliyevi "Eurovision" qələbəsinə görə təbrik etdilər, ölkəmizin bu uğuruna sevindiklərini bildirdilər. Müsabiqədən sonrakı günlərdə dünyanın aparıcı kütləvi informasiya vasitələri gənc Azərbaycan dövlətinin nüfuzlu beynəlxalq musiqi yarışmasındakı çətin və şərəfli qələbəsini ölkəmizin dünya birliyinə inteqrasiyası yönündə əhəmiyyətli hadisə kimi dəyərləndirdilər. Həmin günlərdə Azərbaycan adı musiqisevərlərin dillərində dolaşdı. İllərdən bəri düşmənlərimizin, bədxahlarımızın böhtan və qarayaxmalarla gözdən salmağa çalışdıqları Azərbaycan son dərəcə sivil bir ölkə kimi diqqət və rəğbətlər zirvəsində dolaşdı.

"Eurovision" yarışmasının başqa bir önəmli uğuru ölkəmizin növbəti, 2012-ci il müsabiqəsinə ev sahibliyi etmək hüququnu qazanması oldu. Azərbaycan üçün "Eurovision 2011" qələbə ilə bitdi, məsul "Eurovision - 2012" ili başlandı. Bu şərəfli missiyanı uğurla başa çatdırmaq ölkəmizi dünyada yüksək inkişaf etmiş mədəniyyət diyarı kimi tanıdacaq. Şübhəsiz, önəmli Qərb-Şərq dialoqunda yüksək təşəbbüslər göstərən, bir sıra xoşməramlı beynəlxalq məclisləri yüksək səviyyədə təşkil edib keçirən Azərbaycan bu populyar beynəlxalq yarışmanın ev sahibliyi missiyasının da öhdəsindən layiqincə gələcək.

Prezident İlham Əliyev mayın 19-da "Eurovision 2012" mahnı müsabiqəsinin Bakı şəhərində keçirilməsi haqqında sərəncam imzaladı və təşkilati işlərə start verdi. YUNESKO-nun xoşməramlı səfiri, Heydər Əliyev Fondunun prezidenti Mehriban Əliyevanın sədrliyi ilə yaranan nüfuzlu təşkilat komitəsi müsabiqənin keçirilməsi ilə bağlı zəruri tədbirləri həyata keçirəcək.

Yarışma bitsə də, üstündən bir həftə keçsə də xalqımızın sevinci səngimir, xoş həyəcanlar haqlı öyünc duyğuları, ciddi və dəyərli mülahizələrlə tamamlanır. Bu günlərdə Almaniyanın Hannover şəhərində müalicə olunan xalq şairi Zəlimxan Yaqub telefonla təbriklərini xalqımıza çatdırmağı xahiş edərək bildirdi:

- Başı çox müsibətlər çəkmiş, 23 ildən bəri dözülməz Qarabağ dərdi çəkən, 20 Yanvarda gülləbarana tuş olan, sinəsi Xocalı yarası ilə dağlanan Azərbaycan xalqının hamılıqla sevinməyə, hansısa qələbə sevinci yaşamağa böyük ehtiyacı var idi. Xalqımızın gözü aydın olsun. Bu qələbəni hamı arzulayırdı. Deməli, hamının istədiyi qələbə qarşısıalınmazdır. Mən xalqımıza Qarabağ savaşında qalib gəlməyin sevincini arzulayıram.

Qarşıdakı bir il növbəti müsabiqəyə hazırlıq dövrüdür. Dövlətimiz bu işin ağırlığını öz üzərinə götürdü. Mən arzu edirəm ki, Azərbaycanı dünyaya tanıtmaq işində bu müsabiqənin ev sahibi olmaq imkanından da bacarıqla istifadə edək. Ulu öndər Heydər Əliyev ölkəmizi, xalqımızı dünyada tanıtmaq üçün misilsiz işlər görmüş, möhkəm əsaslar yaratmışdır. Bu qələbə o böyük insanın arzularına uyğun bu hadisədir. Bu qələbəyə Heydər Əliyevin həmişə xalqımızın başı üstündə dolaşan ruhu hamıdan çox sevindi.

Mən bu qələbəni yarışın keçirildiyi Almaniyada izlədim. Qələbə sevinci ağrı-acılarımı ovutdu, güclü bir dərman kimi ruhuma sakitlik gətirdi. Arzu edirəm ki, hər bir qələbənin qazanılmasında belə həmrəy olaq, irili-xırdalı hər bir qələbəmizə belə sevinək.

Bu günlər dünyanın müxtəlif guşələrində yaşayan soydaşlarımız da eyni arzu və diləklə yaşayır. Hər yandan ölkəmizə təbriklər axır. Dünya boyda sevinci hamı ürəkdolusu yaşayır, səxavətlə paylaşır.

Diasporla İş üzrə Dövlət Komitəsi 56-cı "Eurovision" mahnı müsabiqəsində Azərbaycanın qələbə qazanması münasibətilə xaricdə fəaliyyət göstərən diaspor təşkilatlarını təbrik edib. Təbrikdə vurğulanır ki, Azərbaycanı bu nüfuzlu beynəlxalq müsabiqədə təmsil edən Eldar Qasımov və Nigar Camal duetinin 25 ölkənin təmsilçisi içərisində birinci yerə layiq görülməsi bütün xalqımızın, o cümlədən xaricdə yaşayan azərbaycanlıların uğurudur.

Məktubda səsvermə prosesində fəal iştirak etdiklərinə və müsabiqədə Azərbaycanın qələbə qazanması üçün göstərdikləri təşəbbüslərə görə soydaşlarımıza təşəkkür ifadə edilib. Bildirilib ki, hələ yarışmadan əvvəl diaspor nümayəndələri müxtəlif sosial şəbəkələrdə, kütləvi informasiya vasitələrində, ictimaiyyət arasında Azərbaycan təmsilçilərini təbliğ etməyə çalışırdılar.

Soydaşlarımıza müraciət bu sözlərlə bitir: "Bu nəticə, ilk növbədə, Azərbaycan dövlətinin mədəniyyətə və incəsənətə verdiyi yüksək önəmin təzahürüdür. Eyni zamanda, bu həm də xalqımızın nə qədər böyük potensiala malik olduğunu, ölkəmizdə dünya miqyaslı istedadlı gənclərin yetişdiyini təsdiq edir. Bu qələbə həm də milli birliyimizin, həmrəyliyimizin nəticəsidir. "Eurovision" mahnı müsabiqəsində Azərbaycanın qələbə qazanması bir daha göstərdi ki, biz həmrəy olanda, ən yüksək nailiyyətləri qazanmağa qadirik. Azərbaycan Respublikasının Prezidenti cənab İlham Əliyevin qeyd etdiyi kimi, "Bizim gücümüz bizim birliyimizdədir".

Tahir AYDINOĞLU

Xalq qəzeti.- 2011.- 24 may.- S. 6.