Media və cəmiyyət: fəal əməkdaşlıq yolları

Azərbaycan Respublikası Prezidenti yanında Kütləvi İnformasiya Vasitələrinin İnkişafına Dəstək Fondunun Səbail Rayon İcra Hakimiyyətinin birgə keçirdiyi konfransda "Media və cəmiyyət arasında əlaqələrin inkişaf etdirilməsi" mövzusu geniş müzakirə hədəfi oldu, dəyərli mülahizə və təkliflər səsləndi.

Məclisi giriş sözü ilə açan Səbail Rayon İcra Hakimiyyətinin başçısı Asif Əsgərov müstəqil Azərbaycan dövlətində azad jurnalistikanın formalaşması və inkişafı ilə bağlı dövlət səviyyəsində həyata keçirilmiş tədbirlərdən, ümumilli lider Heydər Əliyevin və Prezident İlham Əliyevin ölkəmizdə KİV-in problemlərinin həllinə göstərdikləri köməkdən ətraflı söz açdı. Başçı bildirdi ki, çağdaş cəmiyyətdə media demokratik proseslərin önündə gedir, azad sözün mötəbərliyi və nüfuzu gündən-günə artır. Milli jurnalistikamız ölkə daxilində uğurlarımızı və problemləri daim gündəmdə saxlayır, xaricdə Azərbaycanın müsbət imicinin yaradılması üçün ardıcıl fəaliyyət göstərir. Media quruculuq prosesində təsirli iştirakı ilə icra strukturlarının da yaxın köməkçisidir. Bugünkü görüşün əsas məqsədi də KİV redaksiyaları ilə cəmiyyətin əlaqələrini daha fəal və məzmunlu etmək yollarını müəyyənləşdirməkdir.

KİVDF-in icraçı direktoru Vüqar Səfərli bildirdi ki, rəhbərlik etdiyi qurum medianın vətəndaş cəmiyyəti quruculuğuna köməyini artırmaq üçün KİV-lərin baş redaktorları ilə bölgələrin ictimaiyyət nümayəndələri arasında görüşlər təşkil etməklə onlar arasınıda əməkdaşlığı inkişaf etdirməyə çalışır. Paytaxtın Suraxanı rayonunda keçirilən ilk konfrans məsələnin aktuallığını, hər iki tərəf üçün faydalı olduğunu bir daha sübut etdi.

KİVDF Azərbaycan mediasının inkişafının jurnalist peşəkarlığı ilə sıx bağlı olduğunu nəzərə alaraq maddi dəstək layihələri ilə yanaşı, yaradıcılıq məsələlərini də daim gündəmdə saxlayır. Jurnalistlər kütləvi auditoriyanın istək və arzularını vaxtında və həssaslıqla duyub cavablandırarsa bu, bütün cəmiyyətin xeyrinə olar.

KİVDF-in rəhbəri ötən iki ildə həyata keçirilmiş tədbirlərdən danışdı, görüş iştirakçılarını açıq, fəal diskussiyaya dəvət etdi.

Azərbaycan Mətbuat Şurasının sədri Əflatun Amaşov ölkəmizdə söz azadlığının təmin edilməsi, müstəqil jurnalistikanın inkişafı ilə bağlı əldə olunmuş tarixi uğurlardan söz açaraq bildirdi ki, bu gün kütləvi tribunadan hər kəsin və hamının istədiyi fikri səsləndirmək, səsini cəmiyyətə çatdırmaq imkanı var. 600-dək daimi fəaliyyət göstərən KİV, o cümlədən 30 gündəlik və 50 həftəlik qəzet, 20 informasiya agentliyi, 9 ümumölkə televiziyası və radio, 14 regional televiziya, 5 internet televiziyası cəmiyyətin azad, obyektiv informasiya tələbatının ödənilməsinə xidmət edir.

Artıq 13 ildir ki, Azərbaycan senzurasız jurnalistika ölkələri cərgəsindədir. Dövlət KİV-in problemlərinin həllinə dəstək verməklə azad sözün dayaqlarını möhkəmləndirir. Ölkə mediası üçün heç bir qapalı sahə və mövzu qalmamışdır.

AMŞ, KİVDF və digər media qurumları redaksiyalarla birlikdə jurnalist peşəkarlığının yüksəldilməsi məsələlərini daim diqqətdə saxlayır, bu sahədə problemlərin həllinə çalışır.

Oxucu, dinləyici və tamaşaçıların jurnalistlərdən nə gizlətdiklərini vaxtında aşkar etmək peşəkarlığı artırmağın zəruri qaynaqlarından biridir. Bu gün media rəhbərləri bu sualı cavablandırmağa gəliblər. Sonra qızğın diskussiyalar başlandı. Səbail Rayon İcra Hakimiyyətinə toplanmış ictimaiyyət nümayəndələri media ilə cəmiyyət əlaqələrinə müxtəlif bucaqlardan nəzər saldılar, jurnalistikamızın uğurlarına və qarşısında duran vəzifələrə münasibətlərini bildirdilər. Çıxış edənlər xarici ölkələrdə, beynəlxalq aləmdə Azərbaycanın layiqli imicinin yaradılması, cəmiyyətdə gedən proseslərin dərindən təhlil olunması uğurların geniş işıqlandırılması, informasiyaların obyektivliyinin və operativliyinin təmin edilməsi ilə bağlı xalqın mediadan gözləntilərini açıqladılar. KİV neqativ halları doğru-düzgün, qərəzsiz işıqlandırması, milli-mənəvi dəyərlərə həssas yanaşma, gənclərin həyatına daha çox diqqət yetirmək, vətənpərvərlik mövzusunu daim diqqətdə saxlamaq kimi məsələlər də müzakirələrdə aparıcı yer tutdu. Xaricdə yaşayan Səbail sakinləri canlı efirlə konfransın işinə qatıldılar. Rəy və təkliflərini söylədilər.

Qaldırılan məsələləri, verilən sualları "İki sahil" qəzetinin baş redaktoru Vüqar Rəhimzadə, "Azad Azərbaycan" qəzetinin baş redaktoru Hikmət Babaoğlu, "Səs" qəzetinin baş redaktoru Bəhruz Quliyev, "Olaylar" qəzetinin baş redaktoru Yunis Oğuz, "Xalq Cəbhəsi" qəzetinin baş redaktoru Elçin Mirzəbəyli və digər redaksiyaların rəhbərləri cavablandırdılar.

Konfransda media ilə əməkdaşlıq sahəsində Səbail Rayon İcra Hakimiyyətinin qazandığı müsbət təcrübədən də söz açıldı, belə görüşlərin, diskussiyaların əhəmiyyəti vurğulandı.

Tahir AYDINOĞLU

Xalq qəzeti.- 2011.-25 may.- S. 6