Prezident İlham ƏLİYEV: Elə etməliyik ki, hər bir bölgə, hər bir rayon mərkəzi, hər bir kənd abadlaşsın, gözəlləşsin

Azərbaycan Respublikasının Prezidenti İlham Əliyevin iqtisadi siyasətinin prioritet istiqamətləri olan qeyri-neft sektorunda irəliləyişin sürətləndirilməsi, iqtisadiyyatın şaxələndirilməsi, regionların tarazlı inkişafı, əlverişli biznes və investisiya mühitinin formalaşdırılması, sahibkarlığa hərtərəfli dəstək verilməsi, əhalinin maddi rifahının daha da yüksəldilməsi nəticəsində ölkənin sosial-iqtisadi tərəqqisi keyfiyyətcə yeni mərhələyə qədəm qoymuş və ötən illərdə olduğu kimi, 2011-ci ilin ötən doqquz ayında da mühüm nailiyyətlər əldə edilmişdir.

Ölkədə makroiqtisadi sabitlik, strateji valyuta ehtiyatlarının artımı və səmərəli istifadəsi, milli valyutanın sabitliyi təmin edilmiş, sahibkarlığa dövlət dəstəyi gücləndirilmiş, qeyri-neft sektorunun inkişaf sürəti neft sektorunu üstələmişdir. Uğurların əldə olunmasında görülən işlərin sistemliliyini təmin edən dövlət proqramlarının əhəmiyyətli rolu danılmazdır. Yeri gəlmişkən, burada bir məqamı qeyd etmək istərdik. Dövlətimizin başçısı İlham Əliyev ikinci regional proqramın icrasını da daim diqqət mərkəzində saxlayır, mütəmadi şəkildə yerlərdə olur, görülən işlərlə ciddi şəkildə maraqlanır, qarşılaşılan problemlərin həlli ilə bağlı konkret tapşırıqlar verir. Bu, Azərbaycan Respublikasının Prezidenti İlham Əliyevin oktyabrın 30-da Ağdaş, Ucar və Ağsu rayonlarına səfəri çərçivəsində də özünü bir daha qabarıq büruzə vermişdir. Dövlətimizin başçısı Ucar rayonuna səfəri çərçivəsində şahmat məktəbinin açılışında iştirak etmişdir.Burada dövlət başçısına məlumat verilmişdir ki, şahmat kompozisiyası formasında tikilmiş bu tədris ocağının ümumi sahəsi 820 kvadratmetrdir. Şahmat məktəbinin ərazisində yaşıllıqlar salınmış, müasir işıqlandırma sistemi quraşdırılmışdır. Birmərtəbəli məktəbdə beş tədris, bir kompyuter otağı və xidməti otaqlar vardır. Məktəbin oyun zalının sahəsi 210 kvadratmetrdir.Həmçinin bildirilmişdir ki, Heydər Əliyev Fondunun təşəbbüsü ilə müasir üslubda inşa olunan bu tədris binası bir növ fiqurlar düzülmüş şahmat taxtasına bənzədilib.Binanın girişi piyada, ətrafı top, mərkəzi hissəsi isə şah fiqurları formasındadır. Buradakı tədris otaqları məktəblilərin şahmatın sirlərinə yiyələnmələri üçün lazımi avadanlıqla təchiz olunmuşdur. Elektron biliklərin əldə olunması və müasir yeniliklərin qavranılması üçün ayrıca kompyuter otağı da yaradılmışdır.Zalda eyni vaxtda 140 şagird şahmat oynaya bilər. Burada oyunların canlı izlənilməsi üçün xüsusi monitor quraşdırılmışdır.

Prezident İlham Əliyev Ucar Şəhər Uşaq Xəstəxanasının əsaslı yenidənqurmadan sonra açılışında iştirak etmiş, Ucar Mərkəzi Rayon Xəstəxanasının yenidənqurmadan sonra istifadəyə verilmiş poliklinikasında olmuş, tikintisi davam etdirilən Ucar Mərkəzi Rayon Xəstəxanasının baş planı ilə tanış olmuşdur. Xəstəxananın əvvəlki binasının fotoşəkillərinə baxan Prezident İlham Əliyevə məlumat verilmişdir ki, 1970-ci ildə inşa olunmuş köhnə bina indiyədək təmir olunmadığından yararsız hala düşmüşdü. Yeni xəstəxana üçün 4,4 hektar torpaq sahəsi ayrılmışdır. Bu ərazinin 1,2 hektarında ikimərtəbəli 4 korpusdan ibarət kompleks tikiləcəkdir. Xəstəxananın ərazisində təcili tibbi yardım üçün də ayrıca bina inşa olunmuşdur. Bundan əlavə, rayon patoloji anatomiya və ekspertiza şöbəsinin, o cümlədən uşaq xəstəxanasının da mərkəzi rayon xəstəxanasının yaxınlığında yerləşməsi vətəndaşlara daha yaxşı və keyfiyyətli tibbi xidmətin göstərilməsinə imkan verəcəkdir. Burada ümumilikdə 350 nəfər tibbi heyət çalışacaqdır.

Ucar şəhərinin su-kanalizasiya sistemləri kompleksinin təməlqoyma mərasimində iştirak edən dövlət başçısına məlumat verilmişdir ki, Ucar şəhərində mərkəzləşdirilmiş içməli su sistemi 1970-ci illərdə tikilmiş, Göyçay rayonunun Potu kəndi ərazisində qazılmış subartezian quyulardan və suvarma kanallarından mənbə kimi istifadə olunmuşdur. Yeni layihəyə əsasən, Ağsu rayonu ərazisində yerləşən Külüllü su mənbəyi seçilmişdir. Külüllüdə drenaj tipli suqəbuledici qurğunun tikintisi, buradan Ucar şəhərinədək 400 millimetr diametrli 60 kilometr uzunluğunda özüaxımlı magistral su kəmərinin çəkilməsi planlaşdırılır. Layihədə, eyni zamanda, magistral kəmər boyunca yerləşən 15 kəndin də su təchizatı təmin olunacaqdır.

Bildirilmişdir ki, şəhərdə ümumi uzunluğu 108 kilometr olan yeni supaylayıcı şəbəkənin, iki min kubmetr həcmində yeni su anbarının tikilməsi nəzərdə tutulur. Layihəyə əsasən, Ucar şəhərində 90 kilometr uzunluğunda kanalizasiya xətləri çəkiləcək, 15 kanalizasiya nasos stansiyası tikiləcəkdir. Çirkab sularının təmizlənməsi üçün məhsuldarlığı sutkada dörd min kubmetr olan müasir qurğu inşa ediləcəkdir. Layihənin yerinə yetirilməsi ilə 2035-ci ilədək perspektiv inkişaf nəzərə alınmaqla Ucar şəhərində 20 min, 15 kənddə isə 32 min nəfərin su təchizatı və kanalizasiya xətlərindən istifadəsi əsaslı şəkildə yaxşılaşdırılacaqdır. Dövlət büdcəsi vəsaiti hesabına həyata keçiriləcək "Ucar şəhərinin su təchizatı və kanalizasiya sistemlərinin yenidən qurulması layihəsi"nin 20 aya başa çatdırılması nəzərdə tutulmuşdur.

Prezident İlham Əliyev Ağsu Regional Qaz İstismar Sahəsinin açılışında da iştirak etmişdir.Dövlət başçısına məlumat verilmişdir ki, Ağsuda Regional Qaz İstismar Sahəsi üçün yeni inzibati binanın tikintisi ətraf rayonların da qazlaşdırılması baxımından mühüm əhəmiyyətə malikdir. Binanın birinci mərtəbəsində ulu öndər Heydər Əliyevin və Prezident İlham Əliyevin ictimai-siyasi fəaliyyətlərinə həsr olunmuş fotoguşə yaradılmışdır. Binanın bütün otaqlarında müasir mebel və kompyuter avadanlığı quraşdırılmışdır.

Ağsuda mədəniyyət və istirahət parkının əsaslı bərpa və yenidənqurmadan sonra açılışında iştirak edən dövlət başçısına bildirilmişdir ki, parkın 9 metr hündürlüyündə 4 sütunlu giriş qapısı milli Azərbaycan memarlığı üslubunda inşa olunmuşdur. İlyarım ərzində başdan-başa yenidən qurulmuş parkın ərazisi 1,6 hektardır. Burada yeni quraşdırılmış fəvvarə parka xüsusi yaraşıq verir. Sakinlər üstü örtülü 6 istirahət guşəsindən istifadə edə biləcəklər. Mədəniyyət və istirahət parkında uşaqlar üçün maraqlı attraksionlar quraşdırılmış, xalq nağıllarının motivlərini əks etdirən guşə və səhnə yaradılmışdır.

Dövlət başçısına Ağsuda çörək zavodunun açılışında iştirakı zamanı məlumat verilmişdir ki, müəssisə əsas sexdən və yardımçı sahələrdən ibarətdir. Burada Rusiya və Ukraynanın bu sahə üzrə ixtisaslaşmış zavodlarında buraxılan ən müasir çörəkbişirmə sobasının, qıcqırtma avadanlığının və digər qurğuların quraşdırılması yüksək keyfiyyətli məhsul hazırlamağa imkan verir. Zavod mühəndis kommunikasiyaları ilə tam təmin olunmuşdur. Sutka ərzində əhalini 5 ton çörəklə təmin edəcək müəssisədə 12 nəfər işləyəcəkdir. Çörək məhsulları satış şəbəkəsinə xüsusi ixtisaslaşmış avtomaşınlarla daşınacaqdır.

Ağsu şəhər stadionunun açılışında iştirak edən Prezident İlham Əliyevə məlumat verilmişdir ki, bu müasir idman qurğusunun təməli 2009-cu il oktyabrın 29-da qoyulmuşdur. Stadionla tanışlıq zamanı Azərbaycan Prezidentinə bildirilmişdir ki, dörd sektorda üç min tamaşaçı yeri olan stadionun süni örtük döşənmiş meydançası müasir standartlara cavab verir. Burada yüksək səviyyəli yarışların keçirilməsi mümkündür. Tribunaların üstünə metal konstruksiyalardan ibarət örtük quraşdırılmışdır. Bundan əlavə, burada daha iki ministadion idmançıların ixtiyarına verilmişdir. Kompleksə 4 işıqlandırma lövhəsi, elektron tablo, kafe, inzibati bina və digər yardımçı obyektlər daxildir.

Ağsuda "Az-Granata" MMC-nin şirə və şərab emalı zavodunun açılışında müəssisənin texnoloji prosesi ilə tanışlıq zamanı dövlət başçısına məlumat verilmişdir ki, zavodun istehsal bölmələrində 15 növ meyvə şirəsi istehsal olunur. Burada iki milyon paket hazır məhsul saxlamaq üçün anbar da vardır. Zavod öz məhsullarını respublikamızın şəhər və rayonları ilə yanaşı, MDB və Avropa ölkələrinə də göndərəcəkdir. İlkin mərhələdə 180 nəfərin çalışacağı müəssisədə sonradan işçilərin sayı 350-yə çatacaqdır.

Müəssisənin fəaliyyəti məhsul istehsalı ilə məhdudlaşmır. Şamaxı və Ağsu rayonları ərazisində müəssisənin balansında 1000 hektar yararlı torpaq sahəsi vardır. Həmin sahələrin 700 hektarında üzüm və nar bağları salınmışdır. Bağlarda hazırda 500 işçi çalışır. Gələcəkdə salınacaq bağlar üçün daha 600 hektar sahənin ayrılması nəzərdə tutulur. Ümumiyyətlə, zavodda və ona məxsus bağlarda yaxın gələcəkdə 1500-1800 nəfərin işlə təmin olunması gözlənilir. Üzüm və nar bağlarında əkin və becərmə işləri aparmaq üçün xüsusi texnika alınmışdır. Bütün bu amillər ixrac qabiliyyətli yüksək keyfiyyətli məhsul istehsalına təminat verir. Ən başlıcası isə bu müəssisə rayonda əhalinin məşğulluğunun təminatında əhəmiyyətli rol oynayacaqdır.

Zavodla tanışlıqdan sonra dövlət başçısı müəssisənin kollektivi və rayon ictimaiyyətinin nümayəndələri ilə görüşmüşdür.Azərbaycan Prezidenti İlham Əliyev demişdir: - Ağsu indi Azərbaycanın ən qabaqcıl rayonlarından biridir və bu, məni çox sevindirir. Çünki son illər ərzində Ağsuda gedən quruculuq-abadlıq işləri rayonun potensialını böyük dərəcədə gücləndirə bilmişdir. Mən bu gün yeni müəssisələrin açılışında iştirak etmişəm. Yeni gözəl, böyük futbol stadionu açılıbdır, uşaqlar artıq orada məşq edirlər. Yadımdadır, iki il bundan əvvəl stadionun tikintisi ilə bağlı məlumatı dinləyərkən demişəm ki, Ağsuda futbol komandası yoxdur. Stadion tikiləcəksə, gərək mütləq futbol komandası olsun. Bu gün mənə verilən məlumata görə, artıq komanda da yaranıb, uşaqlar da cəlb olunub. Digər məsələlər də həll olunur.

Görüşdə dövlət başçımız Azərbaycanda regionların inkişafı haqqında da ətraflı danışmışdır.Bildirmişdir ki, regionların inkişafı, infrastruktur layihələrinin icra edilməsi, yolların çəkilişi, elektrik stansiyaları, qazlaşdırma, su xətlərinin çəkilişi, sahibkarlığa göstərilən diqqət, fermerlərə güzəştli şərtlərlə yanacağın, gübrənin verilməsi, subsidiyaların təşkil edilməsi, Sahibkarlığa Kömək Milli Fondunun xəttilə böyük həcmdə kreditlərin verilməsi, bu reallıqları təmin edir.

Ölkə Prezidenti daha sonra demişdir ki, bu zavodun fəaliyyətə başlamasına xüsusi diqqət göstərirəm və xüsusi qiymət verirəm. Çünki biz bu zavodun fəaliyyətə başlamasında son illər ərzində görülən işlərin nəticələrini əyani şəkildə görürük. Həm yeni istehsalat sahələri yaradılır, iş yerləri təmin edilir, ölkəyə, ölkə iqtisadiyyatına şöhrət gətirən keyfiyyətli məhsullar istehsal olunur və dünya bazarlarına çatdırılır. Biz növbəti illərdə çalışmalıyıq ki, ixracımızın coğrafiyasını genişləndirək. Bunu etmək üçün biz yeni bazarlara çıxırıq. Mən Nazirlər Kabinetinin sonuncu toplantısında bu məsələ ilə bağlı xüsusi tapşırıqlar vermişəm ki, həm bizim üçün ənənəvi olan bazarlara daha da geniş şəkildə çıxmalıyıq, həm də yeni bazarları aşkar etməliyik. Xüsusilə nəzərə almalıyıq ki, bizim üçün dost olan ölkələrdə məhsullarımıza ehtiyac vardır.

Prezident İlham Əliyev Ağsu rayonundan qayıdarkən Şamaxıdakı "Şərədil" istirahət mərkəzi ilə tanış olmuşdur.Bildirilmişdir ki, son illərdə Azərbaycanda turizm infrastrukturunun yaradılması istiqamətində dövlətimiz tərəfindən ardıcıl addımlar atılır. Bu baxımdan "Azərbaycan Respublikasında 2007-2016-cı illər üçün turizmin inkişafına dair Dövlət Proqramı"nın qəbul edilməsi, 2011-ci ilin "Turizm ili" elan olunması ölkəmizin tezliklə dünyanın turizm mərkəzlərindən birinə çevrilməsi üçün geniş imkanlar açmışdır.Xatırladılmışdır ki, mərkəzin 25 hektar ümumi sahəsi vardır. Mərkəzin ərazisindəki 20 kottecdən 11-i üç, digərləri isə ikiotaqlıdır. Burada dördü ikiotaqlı, dördü isə birotaqlı olmaqla 8 nömrədən ibarət otel də vardır. Bundan başqa, mərkəzdə qolf və voleybol meydançaları, tennis kortu, uşaq əyləncə guşəsi fəaliyyət göstərir.

Prezident İlham Əliyev inşa ediləcək "Şamaxı-Qrand" otelinin layihəsi ilə də tanış olmuşdur. Tikintisinə 2010-cu ildə başlanılan otelin gələn il istifadəyə verilməsi nəzərdə tutulur.Oteldə 95-i standart, 19-u isə lüks olmaqla ümumilikdə 114 nömrə turistlərin istifadəsinə veriləcəkdir. Oteldə hər biri 500 nəfərlik üç konfrans zalı yaradılacaqdır. Burada müxtəlif idman meydançalarının tikintisi də nəzərdə tutulmuşdur.

Prezident İlham Əliyev Ağdaş rayonuna səfəri çərçivəsində Ağdaş-Ləki avtomobil yolunun 12 kilometrlik hissəsinin açılışında iştirak etmişdir. Dövlətimizin başçısı yolun texniki-iqtisadi göstəricilərini, təmirdən əvvəlki və sonrakı vəziyyətini əks etdirən stendlərə baxmışdır.Nəqliyyat naziri Ziya Məmmədov Prezident İlham Əliyevə Ağdaş-Ləki avtomobil yolunun 12 kilometrlik hissəsində görülmüş işlər barədə məlumat vermışdir. Bildirmışdir ki, yol "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"na uyğun olaraq dövlətimizin başçısının 2009-cu il 14 aprel tarixli fərmanı ilə təsdiq edilmiş Tədbirlər Planı çərçivəsində inşa olunmuşdur. Qeyd edilmişdir ki, əsaslı şəkildə bərpa olunmuş Ağdaş-Ləki avtomobil yolu Bakı-Ələt-Qazax-Gürcüstan dövlət sərhədi avtomobil yolunun 267-ci kilometrini Bakı-Şamaxı-Yevlax avtomobil yolunun 238-ci kilometri ilə birləşdirir. Tamamilə yeniləşən, müasir görkəm alan və keyfiyyəti ilə seçilən bu yol respublikamızın şimal-qərb bölgəsi ilə cənub və cənub-qərb bölgələri arasında nəqliyyat əlaqəsinin yaxşılaşması baxımından mühüm əhəmiyyətə malikdir. Məlumat verilmışdir ki, asfalt-beton örtüklü yolun yatağının eni 12, ikizolaqlı hərəkət hissəsinin eni isə 7 metrdir. Cari ilin iyulunda başlanan bərpa işləri oktyabrda başa çatdırılmışdır.

Azərbaycan Prezidenti İlham Əliyev Ağsu rayonundan qayıdarkən Bakı-Şamaxı-Yevlax avtomobil yolunun Muğanlı-Yevlax hissəsinin əsaslı şəkildə yenidən qurulması ilə bağlı görülən işlərlə tanış olmuşdur. Nəqliyyat naziri Ziya Məmmədov məlumat vermişdir ki, hazırda ölkəmizdə icra olunan çoxsaylı yol-nəqliyyat infrastrukturu layihələrindən biri dövlətimizin başçısının tapşırığı ilə Bakı-Şamaxı-Yevlax avtomobil yolunun Muğanlı-Yevlax hissəsinin əsaslı şəkildə yenidən qurulmasıdır. Ölkəmizin mühüm regionlarını birləşdirməsi baxımından əhəmiyyət daşıyan bu yol uzun müddət əsaslı təmir edilmədən istismarda olmuşdur. Buna görə də Prezident İlham Əliyevin tapşırığı ilə 2010-cu ilin martından yolun əsaslı şəkildə yenidən qurulmasına başlanmışdır.Bildirilmişdir ki, layihə dəyəri 404 milyon dollar olan yolu fərqləndirən cəhət bəzi yerlərdə çətin dağlıq ərazidən və sürüşmə zonalarından keçməsidir. Xüsusilə mürəkkəb relyefə malik Ağsu aşırımında tez-tez baş verən sürüşmələrin magistrala ziyan vurmasının qarşısını almaq və nəqliyyatın təhlükəsiz hərəkətini təmin etmək üçün ərazidə daha geniş bərkitmə və torpaq işləri aparılır.

Ölkədə bazar iqtisadiyyatı prinsiplərinin tam bərqərar olması, xarici investisiyaların qeyri-neft sektoruna, xüsusən də regionların inkişafına yönəldilməsi, əlverişli sahibkarlıq və biznes mühitinin formalaşdırılması, işsizlik probleminin həlli, əhalinin maddi rifah halının yaxşılaşdırılması məsələləri bu gün Prezident İlham Əliyevin yeritdiyi iqtisadi siyasətin prioritet istiqamətləri kimi diqqəti cəlb edir. İdarəetmə sisteminə dinamizm və müasirlik çalarları gətirən dövlət başçısı İlham Əliyev hökumətin həyata keçirməli olduğu tədbirlərin əhatə dairəsini və vaxtını dəqiq müəyyənləşdirməklə onların icra prosesini şəxsi nəzarətdə saxlayır, habelə ölkənin strateji resurslarını milli inkişafa təkan verən qlobal layihələrin reallaşdırılması yönündə səfərbər edir. Bu baxımdan son illərdə qeyri-neft sektorunun inkişafı naminə həyata keçirilən tədbirlər öz müsbət nəticələrini vermişdir.

Vaqif BAYRAMOV

Xalq qəzeti.- 2011.- 2 noyabr.- S. 4.