Bizim qüdrətli ordumuz, cəsur əsgərlərimiz var

Azərbaycanda ordu quruculuğu məsələsinə ölkə Prezidenti, Silahlı Qüvvələrin Ali Baş Komandanı tərəfindən ardıcıl olaraq daim xüsusi önəm verilməsi müvafiq sahədə ümumi işin günün tələbləri səviyyəsində qurulmasına rəvac vermişdir. Əslində Azərbaycanın real perspektivlərinə və uzaq gələcəyinə hesablanmış son dərəcə strateji xarakter daşıyan uğurlu dövlət siyasəti və bu siyasətin ana xəttində ölkənin milli maraqlarının, müstəqillik və ərazi bütövlüyünün dayanması, heç şübhəsiz, ordu mənsublarının üzərinə ciddi məsuliyyət qoyur. Məhz bütün bunların nəticəsidir ki, bu gün inamla sivil dövlətlər cərgəsinə doğru addımlayan Azərbaycan öz dinamik inkişafı ilə dünyanın ən aparıcı ölkələrinin diqqət mərkəzindədir. Müvafiq istiqamətdə daha çox uğur əldə olunan sahə isə, şübhəsiz, ordu quruculuğudur.

İlk növbədə onu vurğulayaq ki, Azərbaycan Silahlı Qüvvələri Təhlükəsizliyin Dəstəklənməsi üzrə Beynəlxalq Qüvvələrin tərkibində sülhməramlı əməliyyatlarda uğurla iştirak etməklə müxtəlif beynəlxalq və NATO qoşunları komandanlıqlarının daim diqqət mərkəzində olmuşdur. Kosovoda, Əfqanıstanda və İraqda sülhməramlılarımızın nümunəvi xidməti onlara göstərilən etimadın gündən-günə artması, müxtəlif strateji əhəmiyyətli obyektlərin mühafizəsinin məhz azərbaycanlı hərbçilərə etibar edilməsi ilə müşahidə olunmuşdur. Bu barədə Müdafiə Nazirliyi rəhbərliyinin ünvanına göndərilən müxtəlif məzmunlu təşəkkür məktublarını həyəcansız oxumaq mümkün deyil. Bu gün sülhməramlılarımızın sinəsini bəzəyən beynəlxalq və NATO komandanlıqlarının ali təltifləri - orden və medallar, fəxri fərmanlar da ordu mənsublarının peşəkarlığını birbaşa təsdiq edən əsas cəhətlərdəndir.

Ümumiyyətlə, regiondakı mürəkkəb hərbi-siyasi vəziyyət Azərbaycan Respublikası üçün öz suverenliyini və ərazi bütövlüyünü qorumaq, işğal olunmuş əraziləri azad etmək məqsədilə Silahlı Qüvvələrin döyüş imkanlarını artırmağı bütün dövrlərdə zərurətə çevirmişdir. Bu mənada müdafiə sisteminin və Silahlı Qüvvələrin idarə edilməsinin kompleks şəkildə bütün səviyyələrdə təkmilləşdirilməsi strateji əhəmiyyət daşıyır. Məhz bu səbəbdən vahid idarəetmə, nəzarət, rabitə və avtomatlaşdırılmış idarəetmə sisteminin tətbiqi də günün ən vacib məsələsi kimi daim ön planda saxlanılmışdır. Hər il müdafiə nazirinin təsdiq etdiyi plana uyğun olaraq müvafiq tədris illəri üzrə birlik və birləşmələrdə keçirilən komanda-qərargah təlimləri ordumuzun mövcud imkanlarının qiymətləndirilməsində və döyüş hazırlığının daha da artırılmasında xüsusi rol oynayan əhəmiyyətli tədbirlərdəndir.

Dövlətin Silahlı Qüvvələrə göstərdiyi hərtərəfli qayğının ildən-ilə artırılması bu gün ordumuzun ən müasir silah-sursat və texniki avadanlıqlarla təmin olunmasında önəmli rol oynamışdır. Belə ki, strateji və taktiki səviyyədə pilotsuz uçuş aparatları, radio-kəşfiyyat və radio-elektron mübarizə, gecə-gündüz uzaqməsafəli müşahidə, o cümlədən, qoşun və xüsusi təyinatlı bölmələrdə kəşfiyyatçıların fərdi gecəgörmə vasitələri ilə təmin olunması şəxsi heyətin manevr imkanlarını ikiqat artırmışdır.

Ötən illər ərzində Silahlı Qüvvələrin ayrı-ayrı qoşun növlərinə təqdim olunmuş müasir silah və texnika, o cümlədən yaylım atəşli reaktiv sistemlər ordumuzda döyüş hazırlığı sahəsində yeni keyfiyyət göstəricilərinin əldə olunması ilə nəticələnmişdir. Təkcə onu demək kifayətdir ki, yaylım atəşli reaktiv sistemlərin köməkliyi ilə bu gün hərbçilərimiz düşmənin yaxın və uzaq məsafələrdə yerləşən bütün hərbi hədəflərini böyük bir ərazidə məhv emək imkanı qazanmışlar. Şəxsi heyətin istifadəsinə verilən müasir tipli meteoroloji stansiyalar isə artilleriya atəşlərini yüksək dəqiqliklə yerinə yetirməyə əsas verir. Yeri gəlmişkən, Azərbaycan ordusunun ayrı-ayrı hərbi hissə və bölmələrinin optik hesablama cihazları və radiolokasiya stansiyaları ilə təchiz olunması son illərin uğurlarındandır. Bütün bunlar düşmənin hərəkətsiz və hərəkətli hədəflərinin qısa zaman kəsiyində aşkarlanmasını və atəşlə zərərvurma vasitələrinə ötürülməsini tam təmin etmişdir. Müasir tipli optik gündüz və gecəgörmə nişangahları, müşahidə cihazları isə istismarda olan silahların döyüş imkanlarını ikiqat artırmışdır. Bundan əlavə, zirehli texnikalar üzərində aparılan modernləşdirmə işlərinin uğurla yekunlaşdırılması, atəşin və döyüşün müasir tipli idarəetmə sistemlərinin tam quraşdırılması və istifadəyə verilməsi ordumuzun maksimal uzaqlıqda yerləşən düşmən hədəflərini hava şəraitindən asılı olmayaraq, gecə və gündüz məhv etməsi üçün geniş imkan yaratmışdır.

Bu gün Silahlı Qüvvələrimiz Ermənistanın bütün ərazisində yerləşən hərbi hədəfləri məhv etməyə qadirdir. Bütün bunlar Azərbaycan dövlətinin ordu quruculuğu işinə verdiyi böyük önəmin nəticəsidir. Təsadüfi deyil ki, son bir neçə il ərzində orduya ayrılan vəsaitin həcmi 14 dəfədən çox artırılmışdır.

Lakin heç kəsə sirr deyil ki, müasir texnika müasir dünyagörüşünə və düşüncə tərzinə malik insanlar tərəfindən idarə olunmalıdır. Müvafiq istiqamətdə də Silahlı Qüvvələrimizdə daim ciddi tədbirlər həyata keçirilir. Belə tədbirlərin yüksək səviyyədə reallaşdırılması məqsədilə hər il Azərbaycanda və xarici ölkələrdə 300-dək müxtəlif sahələr üzrə kurslar, işçi görüşləri, seminar və konfranslar, tanışlıq səfərləri, qərargah danışıqları və məsləhətləşmələr təşkil olunur ki, burada ordumuzun 1500-dək hərbi qulluqçusu iştirak edir.

Ötən müddət ərzində NATO-nun Lissabon, Brunsum və İzmirdəki Birləşmiş Qərargahının Mobil Təlim Qrupunun və Hərbi Hava Qüvvələri Qüvvə Komandanlığı Qərargahının, Quru Qoşunları Mobil təlim və ekspert qruplarının, Standartlaşma Agentliyi üzrə mütəxəssislərinin və s. Azərbaycana işgüzar səfərləri təcrübə mübadiləsi baxımından kifayət qədər məhsuldar olmuşdur. Bundan əlavə, Silahlı Qüvvələrdə hərbi təlim və təhsil sahəsinə yardım mövzusunda taktiki və əməliyyat səviyyəsində NATO-nun Beynəlxalq Qərargahı tərəfindən həyata keçirilən işçi görüşləri, Çavuş məktəbinin NATO standartlarına uyğunlaşdırılması ilə bağlı Azərbaycandan olan müəllim heyətinə ABŞ, Türkiyə, Almaniya və Latviyanın müvafiq mərkəzlərində çavuş heyətinin hazırlığı üzrə keçirilən treninqlər şəxsi heyətin müasir hərbi elmə dərindən yiyələnməsi istiqamətində mötəbər baza rolunu oynamışdır. O cümlədən Müdafiə Siyasəti və Planlaşdırılması kursları üzrə tədris modulunun tətbiq olunması və inkişaf etdirilməsi, eləcə də Silahlı Qüvvələrin Hərbi Akademiyasında mütəxəssislərin hazırlıq səviyyəsinin artırılması məqsədilə NATO-nun Beynəlxalq Qərargahı, Rumıniya və ABŞ (Milli Müdafiə Universiteti) ekspertləri ilə təşkil olunan görüşlər Azərbaycan dövlətinə dayaq ola biləcək yeni nəslin formalaşdırılması istiqamətində reallaşdırılan əhəmiyyətli tədbirlərdəndir. Bütün bunlar ordumuzun həyatında öz səmərəli nəticəsini göstərməkdədir. Silahlı Qüvvələrimizin şəxsi heyəti ixtiyarında olan silah-sursatın və hərbi texnikanın sirlərinə dərindən yiyələnməklə, əslində dövlət və xalq tərəfindən ordu mənsublarının qarşısına qoyulan taleyüklü vəzifələri ləyaqətlə yerinə yetirməyə çalışırlar. Bu gün hərbi hissə və birləşmələrdə şəxsi heyətin sərgilədiyi yüksək döyüş hazırlığı, mənəvi, psixoloji durum düşmən üzərində ən yaxın gələcəkdə qazanılacaq böyük qələbəmizə zəmin yaradır. İndi döyüş səngərlərində keşik çəkən hər bir əsgər yaxşı başa düşür ki, bizə Ali Baş Komandan tərəfindən cəsur olmaq əmri verilib.

İbrahim RÜSTƏMOV,

əməkdar jurnalist

Xalq qəzeti.- 2011.- 3 noyabr.- S. 6.