Sabunçu rayonunda 2011-ci ilin yekunları müzakirə olundu

Ölkəmizdə quruculuq işləri uğurla davam etməkdədir. Bakı şəhərinin Sabunçu rayonunda da inkişafın yeni dövrü başlanmışdır. 2011-ci ilin doqquz ayının yekunlarının müzakirəsində səslənən fikirlər bunu bir daha təsdiq edir.

Yığıncaqda rayon icra hakimiyyəti başçısının birinci müvaini Qəzənfər Həsənov geniş məruzə ilə çıxış etdi. O bildirdi ki, oktyabr ayının 24-də ölkə Prezidenti İlham Əliyevin sədrliyi ilə Nazirlər Kabinetinin 2011-ci ilin doqquz ayının yekunlarına həsr olunan iclası keçirilmiş, bu müddət ərzində qazanılmış uğurlardan, qarşıda duran vəzifələrdən danışılmışdır.

Natiq bildirdi ki, cari ilin 9 ayı ərzində Sabunçu rayonunun iqtisadiyyatı daha da inkişaf etmiş, xeyli sosial əhəmiyyətli tədbirlər həyata keçirilmişdir. Sənaye müəssisələri və idarələri tərəfindən məhsul istehsalı 20,3 faiz artaraq 124,4 milyon manat, əhaliyyə göstərilən pullu xidmətlərin həcmi 12,5 faiz artaraq 135,3 milyon manat, əsas kapitala yönəldilən investisiyaların həcmi 77 faiz artaraq 51 milyon manat təşkil etmişdir. Rayon üzrə orta aylıq əməkhaqqı ötən ilin müvafiq dövründəkinə nisbətən 30,1 faiz artaraq 358,8 manat olmuşdur.

Möhtərəm Prezidentimiz İlham Əliyevin müvafiq fərman və sərəncamlarına uyğun olaraq 267 şəhid, 8 Milli Qəhrəman, 5 nəfər 20 Yanvar faciəsi zamanı şəhid olanların ailələrinə Prezident təqaüdü, 1330 nəfərə kommunal, nəqliyyat və digər xidmətlərə görə müavinət, 6074 nəfərə sosial müavinət təyin edilərək ödənilmişdir.

Azərbaycan Respublikası Prezidentinin 4 may 2011-ci il tarixli sərəncamı ilə təsdiq olunmuş "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" çərçivəsində nəzərdə tutulmuş 16 sahəni əhatə edən 801 bənddən məhz 119 bəndi Sabunçu rayonunun qəsəbələrinə aiddir. Rayon 66 bəndin icrasına 2011-ci ildə başlanması nəzərdə tutulmuşdur ki, artıq bunlardan da 9-u üzrə işlər başa çatdırılıb, 41-i üzrə isə davam edir. 16 bənd üzrə isə layihə-smeta səndlərinin tərtibatı və digər hazırlıq işləri aparılmaqdadır. Qalan 53 bənd üzrə işlərin yerinə yetirilməsi 2012-2013-cü illərdə nəzərdə tutulmuşdur ki, artıq onların da 6-da işlərin icrasına başlanılmışdır.

Proqram üzrə Bakı Şəhər İcra Hakimiyyəti tərəfindən rayonun 22, 108, 170, 188, 209, 215 və 296 nömrəli məktəblərində əsaslı təmir işləri başa çatmış, 69 nömrəli məktəbdə idman və akt zallarının, 169, 215 və 296 nömrəli məktəblərdə isə hərəsində 15 əlavə sinif otağının tikintisi davam etdirilir.

10 və 13 nömrəli peşə məktəblərində, Nardaran qəsəbəsində 107 və 227, Bilgəh qəsəbəsində 281, Ramana qəsəbəsində 319, Sabunçu qəsəbəsində 310 nömrəli uşaq bağçalarında əsaslı təmir işləri başa çatmaq üzrədir.

Səhiyyə sahəsi üzrə nəzərdə tutulmuş 2 bənddən ibarət işlərin də icrasına başlanmış, hal-hazırda bu obyektlərdə tikinti davam etdirilir.

Proqramda rayonun bütün qəsəbələrində yeni daxili yolların tikintisi və təmiri üzrə də böyük həcmli işlərin görülməsi nəzərdə tutulmuşdur və artıq bunlardan xeyli hissəsi bir sıra qəsəbələrdə yerinə yetirilib.

Sabunçu - Bakıxanov yolunun çəkilişi ilə əlaqədar Əsədullayev, Aydınbəyov küçələrinin kəsişməsində yerləşən dəmiryolu keçidi də yeniləşdirilmiş, keçidə ikitərəfli yol açılmış, yeni çəkilən yolun ətrafı yaşıllaşdırılmışdır. Aydınbəyov küçəsinə asfalt vurularəkən burada yerləşən istirahət parkında əsaslı təmir işləri aparılaraq bütün oturacaq və avadanlıqlar dəyişdirilmiş, yaşıllaşdırma və abadlıq işləri aparılmışdır.

Rayon ərazisində ümumilikdə 246951 metr uzunluğunda müxtəlif diametrli qaz kəmərləri və 3835 ədəd "Smart-kart" tipli qaz sayğacları quraşdırılmış, 23711 ədəd köhnə qaz sayğacları "Smart-kart" tipli qaz sayğacları ilə əvəz edilmişdir.

Maştağa elektrik şəbəkəsi tərəfindən 29340 metr müxtəlif gərginlikli hava və kabel xətləri çəkilmiş, 4258 ədəd özüdaşıyan izolə edilmiş naqillər üçün dayaqlar basdırılmış və 110568 metr kabelləşmə işləri aparılmışdır.

Bütün bunlarla yanaşı Prezident İlham Əliyev cari ilin aprel ayında Sabunçu qəsəbəsində aparılan abadlıq işlərinin gedişi ilə tanış olarkən sakinlərin müraciətini nəzərə alaraq 12 saylı şəhər poliklinikasının sökülərək yerində yenisinin tikinisi üçün Prezident Fondundan 2 milyon manat vəsait ayrılmasına sərəncam vermişdir ki. Hal-hazırda bu işin də icrasına başlanmışdır.

Möhtərəm Prezidentimiz yeni dərs ilinin başlanması münasibəti ilə Bakı şəhərinin bir sıra digər məktəbləri ilə yanaşı, Sabunçu qəsəbəsində yerləşən 170 saylı məktəbdə də olmuş, burada aparılan tikinti-quraşdırma, əsaslı təmir işlərinin, eləcə də təhsilin səviyyəsi ilə tanış olmuş, görülən işlərdən razı qalmışdır. Ümumiyyətlə, o da qeyd edilməlidir ki, ölkə Prezidenti cari ilin mart- sentyabr ayları ərzində 6 dəfə rayonumuzda olmuş müxtəlif obyektlərin təməlqoyma, açılış mərasimlərində iştirak etmiş, proqramın, tapşırıqların icrası ilə yerində tanış olmuş, sakinlərlə görüşlər keçirərək onların arzu və təkliflərini dinləmişdir. Biz bütün bunları rayonumuza göstərilən diqqət və qayğının təzahürü kimi dəyərləndiririk.

Cari ilin əvvəlindən sosial-iqtisadi inkişaf planına uyğun olaraq mərkəzi dövlət orqanları, eləcə də rayonun daxili imkanları hesabına da xeyli sosial əhəmiyyətli tədbirlərin, obyektlərin, qurğuların tikinti-quraşdırma və abadlıq işlərinin aparılması təmin edilmişdir.

Pirşağı qəsəbəsində yerləşən köhnə ambulatoriya binasında yenidənqurma, əsaslı təmir işləri aparılaraq orada 36 saylı müasir tipli şəhər poliklinikası və təcili tibbi yardım stansiyası yaradılmış cari ilin fevral ayının 25-də Heydər Əliyev Fondunun prezidenti Mehriban xanım Əliyevanının iştirakı ilə sakinlərin istifadəsinə verilmişdir.

Bakıxanov qəsəbəsində Sabunçu Rayon Polis İdarəsi üçün inşa edilmiş 4 mərtəbəli, Əhalinin Sosial Müdafiəsi Mərkəzi üçün 3 mərtəbəli, Dövlət Sosial Müdafiə Fondunun Sabunçu rayon şöbəsi üçün 2 mərtəbəli inzibati binalar və Balaxanı qəsəbəsində yeni idman kompleksi inşa edilmişdir. Maştağa qəsəbəsində Milli Təhlükəsizlik Nazirliyinin Sabunçu rayon idarəsinin Maştağa bölməsi üçün 2 mərtəbəli inzibati binanın və Bakıxanov qəsəbəsində Dövlət Xəzinədarlığı Agentliyinin 10 saylı Xəzinədarlıq İdarəsi üçün də 2 mərtəbəli inzibati binanın tikintisi başa çatdırılmış, Sabunçu Rayon Mühafizə İdarəsi üçün yeni inzibati binanın tikintisi davam etdirilir.

Bakıxanov qəsəbəsində Y.Əliyev küçəsində A.Bakıxanovun heykəli qoyulmuş parkda təmir-tikinti, abadlıq işləri də başa çatdırılaraq istifadəyə verilmişdir. Sabunçu rayonu 7 saylı istilik sistemləri istismar sahəsi tərəfindən cari ilin 9 ayı ərzində 28 qazanxana, 5 istilik məntəqəsi, magistral və məhəllədaxili istilik xətləri istismar olunmaqla payız-qış aylarında 128 yaşayış binasına, 18 məktəbə, 8 uşaq bağçasına, 7 səhiyyə obyektinə və 10 digər istehlakçı obyektlərə fasiləsiz olaraq istilik verilməsi mümkün olacaqdır.

Bakıxanov qəsəbəsində 4090-94-cü məhəllədə yerləşən 3, 4, 5 saylı binaların istilikpaylama xətləri Dövlət Proqramına uyğun olaraq əsaslı təmir olunmuşdur. Əhalinin su təchizatının yaxşılaşdırılması məqsədi ilə 5200 metr müxtəlif diametrli su boruları dəyişdirilmiş, 1040 metr müxtəlif diametrli su boruları təmir edilmiş, 2 nasosxanada təmir işləri aparılmışdır. Bilgəh qəsəbəsində 1 ədəd yeni elektrik mühərriki və nasos quraşdırılmışdır. 33 ünvanda pərakəndə halda çəkilmiş su xətləri kollektorlara qoşulmuş, 43 ünvanda aşkar edilmiş qəzalar aradan qaldırılmışdır.

Əhalinin qaz təchizatının yaxşılaşdırılması, qaz itkisinin qarşısının alınması, ödəniş səviyyəsinin artırılması, əhalinin fasiləsiz olaraq təbii qazla təmin edilməsi məqsədi ilə 2011-ci ilin 9 ayı ərzində QİS və podratçı təşkilatlar tərəfindən Bakıxanov qəsəbəsi üzrə 2310 metr, Sabunçu qəsəbəsi üzrə 3420 metr, Zabrat qəsəbəsi üzrə 6100 metr, Maştağa qəsəbəsi üzrə 127610 metr, Ramana qəsəbəsi üzrə 24430 metr, Kürdəxanı qəsəbəsi üzrə 22 330 metr, Pirşağı qəsəbəsi üzrə 32620 metr, Bilgəh qəsəbəsi üzrə 18450 metr, Nardaran qəsəbəsi üzrə 1100 metr, Balaxanı qəsəbəsi üzrə 8560 metr uzunluğunda müxtəlif diametrli qaz kəmərləri quraşdırılmışdır.

Ümumi tutumu 6288 port olan geniş zolaqlı internet avadanlıqları bütün elektron ATS-də quraşdırılmaqla internet istifadəçilərinin sayı 5095-ə çatdırılmışdır.

Natiq qeyd etmişdir ki, bu müddət ərzində Zabrat və Kürdəxanı qəsəbələri, Ramana südçülük və 2 saylı Pirşağı sovxozları, eləcə də Savalan ATS yeni tipli stansiyalarla əvəz olunmuşdur. Nəticədə həmin stansiyaların nömrə tutumu 17424 ədəd artırılaraq 18880-ə çatdırılmışdır.

Cari ilin əvvəlindən Bakı-Aeroport yolunun və eləcə də Bilgəh-Sumqayıt yolunun rayon ərazisinə düşən hissələrində yolun yenidən qurulması və genişləndirilməsi işləri davam etdirilmişdir. Burada da rayon icra hakimiyyəti tikinti təşkilatlarına zəruri köməklik göstərmişdir. Həmin sahədə yolun kənarlarındakı bütün bina və obyektlərdə təmir-bərpa işləri aparılaraq, hasarlar çəkilmişdir və bu işlər indi də davam etdirilir.

2011-ci ilin 9 ayı ərzində rayon icra hakimiyyəti tərəfindən sanitar-təmizlik işlərinin aparılmasına, küçə və meydanların, istirahət parklarının, məhəllədaxili ərazilərin süpürülüb təmizlənməsinə, zibilin vaxtında daşınmasına diqqət artırılmış, bu istiqamətdə müvafiq tədbirlərin həyata keçirilməsi təmin edilmişdir.

Bütün bunların nəticəsində bu sahədə xeyli dönüş yaranmışdır. Lakin, bununla belə bəzi qəsəbə, bələdiyyə, MİS rəhbərlərinin diqqətsizliyi, etinasızlığı nəticəsində hələ də zibil vaxtında daşınmır, bəzi küçələr, yolların kənarı, istirahət parklarının ərazisi süpürülüb təmizlənmir.

Lakin dəfələrlə xəbərdarlıq edilməsinə baxmayaraq, meyvə-tərəvəz və bostan bitkilərinin qeyri-qanuni küçə ticarətinin, ət kəslib-satılmasının qarşısı hələ də alınmamışdır. Göstərilən nöqsanların hələ də aradan qaldırılmamasında birinci növbədə qəsəbə nümayəndələri, post-patrul xidmətinin əməkdaşları, eləcə də bu işlərə birbaşa cavabdehlik daşıyan və qanunsuz icazələr verən Gigiyena və Epidemiologiya Mərkəzinin, Baytarlıq sahəsinin rəhbərliyi məsuliyyət daşıyırlar.

Qəzənfər Həsənov sonda bildirdi ki, gələcəkdə də fəaliyyətimizi genişləndirərək qarşıda duran bütün vəzifələri layigincə yerinə yetirəcəyik.

Milli Məclisin deputatı Fazil Mustafa, Qaz İstismarı Sahəsinin rəisi Eldəniz Nəcəfov, Enerji İstismarı Sahəsinin baş mühəndisi Rövşən Qurbanov çıxış edərək ölkə Prezidentinin rayona göstərdiyi qayğıdan, rayonda həyata keçirilən davamlı tədbirlərdən danışdılar.

Mehdi MÜKƏRRƏMOĞLU

Xalq qəzeti.- 2011.- 4 noyabr.- S. 5.