Türkiyə mətbuatı səhifələrində

Azərbaycanlı ziyalının yaradıcılığı qardaş ölkədə yüksək qiymətləndirilir

Beynəlxalq informasiya-kommunikasiya şəbəkəsində Türkiyə domeni ilə fəaliyyət göstərən internet səhifələrinin və portalların Azərbaycana və azərbaycanlılara ayırdığı diqqət respublikamızda böyük maraqla, məmnunluqla qarşılanır. Elə bir gün olmur ki, türkiyəli mütəxəssislər Azərbaycanın hansısa uğurunu təqdir etməsinlər və ya soydaşlarımızın nailiyyətlərinin dünya miqyasına çıxarılması üçün bir addım atmamış olsunlar.

Bu münasibət ulu öndər Heydər Əliyevin söylədiyi "Bir millət, iki dövlət" ifadəsinin növbəti təsdiqi kimi qəbul edilir.Xəzərin Azərbaycan sektorunda təbii ehtiyatlarla zəngin qaz yataqlarının aşkarlanması, respublikamızın BMT Təhlükəsizlik Şurasının qeyri-daimi üzvü seçilməsi, gənc müstəqil dövlətimizin 20 illik yubileyinin qeyd olunması və digər ümumxalq və ümumdövlət əhəmiyyətli məsələlərlə yanaşı ayrı-ayrı soydaşlarımızın uğurları da türk mətbuatının daimi diqqət mərkəzindədir.

Həm yazılı mətbuatın, həm də elektron kütləvi informasiya vasitələrinin daimi müəlliflərindən olan professor İsa Kayacan, professor Xeyrəddin İvgin, türk dünyası ədəbiyyatının ən məsuliyyətli tədqiqatçılarından olan Fəyyaz Sağlam və öz ədəbi bədii yazıları və elmi məqalələri ilə bütün Avropa oxucularına yaxşı tanış olan Əminə Sevinc Oksüzoğlu Azərbaycan ədəbiyyatı barədə daha tez-tez söz açırlar. Bu müəlliflərin hər biri son üç ildə ayrı-ayrılıqda bir neçə dəfə azərbaycanlı yazıçı-filosof, müasir kəlam məktəbinin banisi Hacı Fərhad Mirzənin yaradıcılığı barədə əhatəli söz açıblar. Həmin tendensiya dövri olaraq davam etdirilir.

Elektron poçtumuza İstanbuldan gələn məlumatda bildirilir ki, azərbaycanlı yazıçı-filosof Hacı Fərhad Mirzənin Türk Dünyası Araşdırmaları Beynəlxalq Elmlər Akademiyasının xətti ilə Ankarada çap olunan "Kəlamlar" ("Özdeyişlər") kitabı Burdur Dövlət Mərkəzi Xəstəxanasının "Ruha dərman kitablar" silsiləsinə daxil edilmişdir. Xəstəxananın internet saytı ilə tanış olarkən öyrəndik ki, (www.burdudh.qov.tr) buranın əməkdaşlarının Türkiyə Səhiyyə Nazirliyinin mütəxəssisləri ilə birlikdə seçdikləri və "Ruhun ilacı" ("Ruhun dərmanı" adlandırdıqları 255 kitab arasında soydaşımız Hacı Fərhad Mirzənin "Kəlamlar" kitabının türkcə variantı özünəməxsus yer tutur. Turan Koçun "İslam estetikası", A.S.Puşkinin "Kapitan qızı", Cəlaləddin Ruminin "Seçilmiş əsərlər", Ziya Goyalpın "Qızıl işıq", Namiq Kamalın "İntibah", Turgenevin "Atalar və oğullar", Viktor Hüqonun "Notrdam kilsəsi", Maksim Qorkinin "Mənim üniversitetlərim", Servantesin "Don Kixot" və Dostoyevskinin "Cinayət və qəza" əsərləri ilə yanaşı Hacı Fərhad Mirzənin "Kəlamlar" kitabı da yer alır. Burada həmin kitabların adını sadalamağımız təsadüfi deyil. Çünki mütəxəssislər xəstəxananın kitabxanasına cəmi 255 kitab seçiblər və onların arasında 27-ci yeri bizim soydaşımızın əsəri tutur. Türkiyəli həkimlərin fikrincə "Kitab əgər ürəkdən gəlməyibsə, digər ürəklərə yol tapa bilməz".

Türkiyənin ən böyük ədəbiyyat portalı olan www.hikayeler.net internet saytı Abdullah Çağrı Elgünün "Hacı Fərhad Mirzənin Kəlamlar kitabı" adlı əhatəli bir elmi məqaləsini vermişdir. "Hacı Fərhad Mirzənin həyatı haqqında məlumat", "Kitab haqqında", "Kitabın mövzu sərlövhələri" və "Kəlamlardan seçmələr" başlıqları altında verilən yazı əslində soydaşımızın türk dünyasındakı yeri barədə əhatəli söz açır. Müəllifin fikrincə Bakıda qələmə alınmış, Azərbaycan, türk, rus və ingilis dillərində bütün dünyanı dolanmış "Kəlamlar" kitabı ilk baxışda adi çap məhsullarından biridir. Ancaq BMT yanında İctimai Təltiflər Şurasının A.S.Puşkin adına "Qızıl medalı" başda olmaqla otuza yaxın mükafat almış bu kitabın Bakıda baş vermiş bir dəhşətli yanğında yanmaması, ticarət mərkəzinin küllükləri arasından sağ-salamat tapılması ona olan marağı qat-qat artırmışdır. Hacı Fərhad Mirzə öz kitabında oxuculara təqdim etdiyi məzmun və mənaya görə üç ölkənin yazıçılar birliyinin üzvü, dörd beynəlxalq akademiyanın akademiki seçilmişdir. "Kəlamlar" kitabı eyni zamanda Kanada və Ukraynada keçirilən beynəlxalq kitab sərgi-yarmarkalarında uğurla nümayiş etdirilmişdir.

Türkiyədən başqa əksər türkdilli ölkələrdə ədəbi və ictimai-siyasi fəaliyyətlə məşğul olan şair və ədəbiyyat tədqiqatçısı, hazırda Almaniyada yaşayan Əminə Sevinc Öksüzoğlu www.birharf.net internet saytında verilmiş növbəti yazısında da Hacı Fərhad Mirzənin yaradıcılığını dərindən təhlil edir və "Kəlamlar" kitabını "Türk dünyası üçün önəmli bir ədəbiyyat nümunəsi" adlandırır. Yeri gəlmişkən, bir müddət əvvəl Hacı Fərhad Mirzə Azərbaycanda "Qızıl buta" mükafatına layiq görülmüşdü. İnternet vasitəsilə bu mükafatdan xəbər tutan türkiyəli sənət adamları həmin qiymətləndirməyə öz münasibətlərini bildiriblər. Yedditəpə Universiteti nəzdində fəaliyyət göstərən Atatürk Prinsipləri və İnqilab Tarixi İnstitutunun müdiri doktor Ədib Paşa yazır: "Qızıl Buta mükafatını Hacı Fərhad Mirzəyə verənlər haqqa xidmət etmişlər". Professor Əhməd Bəlvərənlioğlunun münasibəti isə daha maraqlıdır: "Düşüncəsi və idrakı Azərbaycan xalqı, türk dünyası və bütün insanlara xidmət edən zəkalı Azəri Xocası Fərhad Mirzənin bu mükafata layiq görülməsi hamımızın uğurudur".

Bu qəbildən olan məlumatlar onlarladır və həmin xəbərlərdən qısaca olaraq bir neçəsi barədə söz açdıq. Soydaşımıza yeni uğurlar arzulayırıq.

Natəvan İSMAYILLI

Xalq qəzeti.- 2011.- 5 noyabr.- S. 4.