"Şərq Tərəfdaşlığı" Mədəniyyət Proqramı Azərbaycanın Avropaya inteqrasiyasını sürətləndirəcək

Avropa Birliyi Azərbaycanda mədəniyyət sahəsində bir neçə proqramı reallaşdırır. "Şərq Tərəfdaşlığı" Mədəniyyət Proqramı da onlardan biridir. Bu layihə 1910-cu ildən həyata keçirilir. Bu yaxınlarda həmin proqramın reallaşması ilə bağlı dəyirmi masa keçirildi. Tədbiri proqramın Regional monitorinq və imkanların gücləndirilməsi bölməsi təşkil etmişdi. Ümumiyyətlə, bu proqramın məqsədi regionda davamlı inkişafa dəstək vermək və dövlət səviyyəsində mədəniyyət siyasətinin genişləndirilməsi və təcrübələrin bölünməsini stimullaşdırmaqdır.

Mədəniyyət Avropaya inteqrasiyanın mühüm bir hissəsini təşkil edir. Azərbaycan da bu istiqamətdə təşəbbüsləri dəstəkləyir. Bu mənada "Şərq Tərəfdaşlığı" Mədəniyyət Proqramı mühüm əhəmiyyət kəsb edir. Yeni proqram müvafiq qanunvericilik vasitəsilə mədəniyyət sahəsində təşəbbüslərin, fəaliyyətlərin gücləndirilməsini nəzərdə tutur. Bununla bağlı ölkələr arasında mədəniyyət əlaqələrini daha da genişləndirmək üçün "Şərq Tərəfdaşlığı" Mədəniyyət Proqramı iştirakçı ölkələrə çoxtərəfli bir platforma təklif edir.

Dəyirmi masada bu məsələlər barədə ətraflı söhbət aparılıb. Mədəniyyət və Turizm Nazirliyinin Beynəlxalq təşkilatlarla əməkdaşlıq və proqramlar sektorunun müdiri Vasif Eyvazzadə bildirib ki, bu proqram ölkəmizdə mədəni layihələrin reallaşdırılması üçün yeni imkanlar yaradır, Avropada mədəni proseslərin inkişafına təkan verir. Onun sözlərinə görə Azərbaycan Avropa Birliyi ilə mədəni layihələrin birgə reallaşmasına xüsusi önəm verir. O bildirmişdir ki, əməkdaşlığın başlanğıcında inkişafa yardım diqqət mərkəzində olmuş, sonrakı mərhələlərdə isə siyasi dialoq, iqtisadi inkişaf, ətraf mühitin mühafizəsi və mədəniyyət kimi sahələr də strateji tərəfdaşlığa çevrilmişdir.

Bu gün Avropa Birliyi ilə mədəniyyət sahəsində qarşılıqlı əlaqələrin də genişləndirilməsi, regional səviyyədə mədəniyyət, mədəni irs, incəsənət, mədəni turizm sahəsində siyasətin prioritet sahələrinin müəyyən edilməsi, ehtiyacların öyrənilməsi və s. məsələlərə xüsusi diqqət yetirilir.

"Şərq Tərəfdaşlığı" Mədəniyyət Proqramı Avropa İttifaqı ilə ölkəmiz arasında yeni mədəni əlaqələrin gücləndirilməsinə, Azərbaycanın Avropaya inteqrasiyasına güclü təsir göstərəcəyi şübhəsizdir.

M.MÜKƏRRƏMOĞLU

Xalq qəzeti.- 2011.- 16 noyabr.- S. 6.