Gənclərin Birinci Ümumrespublika Festivalı

Azərbaycanın Milli Qəhrəmanı Mübariz İbrahimovun xatirəsinə həsr edilən vətənpərvərlik mövzusunda Gənclərin Birinci Ümumrespublika Teatr Festivalı final mərhələsində nümayiş olunacaq 10 tamaşanın hər biri hazırdır. Bu barədə Gənclər və İdman Nazirliyində festivala həsr edilmiş mətbuat konfransında bildirilib. Festivalın ideya müəllifi, millət vəkili Jalə Əliyeva "Sağlam düşüncə" İctimai Birliyi tərəfindən həyata keçirilən layihənin əhəmiyyəti və onun yaranma səbəblərindən danışdı. Qeyd etdi ki, yaydan bəri davam edən teatr festivalını təşkil etməkdə məqsəd gənclərimizin vətənpərvərlik hisslərini daha da gücləndirməkdir. Azərbaycanın gənclər siyasətinə toxunan millət vəkili gənclərə dövlət qayğısını, bu sahənin dövlət üçün prioritet sahə olmasını vurğuladı.

Tədbirdə qeyd edildi ki, festivala İsmayıllı, Ucar, Mingəçevir, Zaqatala bölgələrindəki gənclərdən ibarət yaradıcı heyət qatılıb. Festival çərçivəsində gənclər üçün "Art kamp" təşkil ediləcək və bununla istedadlı gənclər peşəkar və tanınmış sənətkarlardan dərs ala biləcəklər.

Gənclər və İdman Nazirliyinin rəsmisi İntiqam Babayev gənclərin vətənpərvərlik tərbiyəsi və milli şüurunun formalaşmasında mədəniyyət və incəsənətin rolunun mühüm olduğunu diqqətə çatdırdı. O, festivalın davamlı olacağına ümid etdiyini bildirdi və qeyd etdi ki, hər il festival bir mövzuya həsr edilə bilər.

Tədbirdə millət vəkili Flora Qasımova, xalq artisti, Bakı Bələdiyyə Teatrının rəhbəri Amaliya Pənahova xalqımızın zəngin teatr ənənələri olduğunu, bir vaxtlar tamaşaların böyük anşlaqla keçdiyini xatırlatdılar. Qeyd edildi ki, bu festivalın keçirilməsi istedadlı gənclərin üzə çıxarılması ilə yanaşı, onların teatr salonlarına axınına da təkan verir.

"Sağlam düşüncə" İB-in rəhbəri Tafiq Sadıqov layihəni həyata keçirməkdə göstərdikləri dəstəyə görə nazirliyə təşəkkür etdi və bildirdi ki, bu festival gənclər tərəfindən maraqla qarşılanacaq və ənənə halını alacaq. Festivalın icraçı direktoru Ramil Ağasıyev bölgələrdə istedadlı yaradıcı gənclərlə görüşlər keçirdiklərini bildirdi. Qeyd etdi ki, paytaxtla yanaşı, regionlarımızda da istedadlı gənclərin olması sevindiricidir.

Festivalda nümayiş olunacaq tamaşalar xalqımızın qəhrəmanlıq salnaməsini özündə canlandırır. Gənc Tamaşaçılar Teatrında tamaşalara baxış keçiriləcək. Münsiflər heyətinin qərarı ilə qran pri, 2-ci və üçüncü yerlərin mükafatçıları müəyyən ediləcək. Festival dekabrın birində möhtəşəm qala-konsertlə başa çatacaq.

Qeyd edək ki, layihə Gənclər və İdman, Mədəniyyət və Turizm nazirliklərinin dəstəyi ilə icra olunur.

Əsfanə BAYRAMQIZI

Xalq qəzeti.- 2011.- 22 noyabr.- S. 11.