YAP mütəşəkkil və qüdrətli siyasi qüvvədir

Ölkəmizin ən aparıcı siyasi partiyası olan Yeni Azərbaycan Partiyasının 1992-ci il noyabrın 21-də Naxçıvanda keçirilən təsis konfransında Masallı ziyalısı Şirvan Əbilov da iştirak etmiş və öz çıxışında Azərbaycanı düşdüyü çətin vəziyyətdən çıxara biləcək yeganə şəxsiyyət, dünya şöhrətli siyasi xadim Heydər Əliyevə cənub bölgəsi ictimaiyyətinin ən xoş arzularını çatdırmışdır. Bundan bir qədər sonra - 1993-cü ilin fevralında birincilər sırasında Masallıda da bu partiyanın rayon təşkilatı yaradılmışdır. Hazırda ictimai-siyai həyatda, sosial-iqtisadi inkişafda fəallığı və dominant rolu ilə seçilən iqtidar partiyasının Masallıda 8 mindən artıq üzvü vardır.

Yeni Azərbaycan Partiyasının yaradılmasının 19 illiyi münasibətilə YAP Masallı rayon təşkilatı gənclər birliyinin təşəbbüsü ilə tədbir keçirilmişdir. Tədbir iştirakçıları əvvəlcə ulu öndərin abidəsini ziyarət edərək önünə gül dəstələri qoymuşlar. Sonra "dəyirmi masa" ətrafında davam edən tədbirdə rayon təşkilatı sədrinin əvəzi, Səfalı Paşayev partiyanın yaranma tarixi və ötən müddətdə fəaliyyəti ilə bağlı ətraflı məlumat vermiş, siyasi həmfikirlərini tarixi gün münasibətilə təbrik etmişdir.

Masallı Rayon İcra Hakimiyyəti başçısı aparatının ictimai təşkilatlar və siyasi partiyalarla iş şöbəsinin müdiri Seyfəddin Əliyev ölkədə ən böyük siyasi qüvvə olan YAP-ın yaranma zərurəti, ənənələri və ümumxalq partiyasına çevrilməsi barədə fikirlərini söyləmiş, cəmiyyətdə böyük nüfuzu olan insanların bu partiyada cəmləşdiyini vurğulamışdır. İqtidar partiyasının yaradıcısı olan ümummilli lider Heydər Əliyevin Azərbaycan xalqı qarşısında tarixi xidmətlərini xatırladan natiq bildirmişdir ki, hazırda ölkə Prezidenti İlham Əliyev YAP-a rəhbərlik etməklə ulu öndərin siyasi kursunu layiqinə davam etdirir.

"Dəyirmi masa"da gənclərdən Elvin Cəfərov, Sübhan Şiriyev və başqaları da çıxış edərək YAP sıralarında təmsil olunmaqdan şərəf duyduqlarını söyləmiş, Dövlət Gənclər siyasətinin onların qabiliyyətlərini göstərmələrinə, vətənə daha çox xeyir vermələrinə şərait yaratdığını bildirmişlər. Rayon rəhbərliyinin diqqət və qayğısı sayəsində Masallıda gənclərin inkişafı üçün hər cür şərait yaradılmasından razılıqla bəhs edən natiqlər hazırda rayonda müasir Olimpiya İdman Kompleksinin fəaliyyət göstərməsini, Gənclər Mərkəzinin tikilməsini, gənc mütəxəssislərin məsul vəzifələrə irəli çəkilməsini diqqətə çatdırmışlar.

Əli NƏCƏFXANLI

Xalq qəzeti.- 2011.- 22 noyabr.- S. 9.