Ağcabədi o Ağcabədi deyil...

Ölkə Prezidentinin gündəlik diqqət və qayğısı Qarabağın bu bərəkətli bölgəsini gülüstana çevirib

Ağcabədi rayonunda aparılan quruculuq-abadlıq işləri məni sevindirir. Çox şadam ki, burada işlər yaxşı gedir, böyük işlər görülür.

İlham ƏLİYEV,

Azərbaycan Respublikasının Prezidenti

Bir dəfə yazmışam, bir də yazıram. Özü də bu, sadəcə olaraq, bir jurnalist marağından irəli gəlmir. Gördüklərimdən, şahidi olduqlarımdan, eşitdiklərimdən doğan təəccüb və heyrət hissidir. Sözün həqiqi mənasında, ilk dəfə bölgəyə ayaq basan hər kəs buranın yalnız coğrafi mənada Ağcabədi rayonu olduğunun fərqindədir. Nəinki ilk dəfə, bir ay, hətta bir həftə əvvəl müsafir olanlar belə ürəkdən gələn maraq və təəccübünü gizlədə bilmirlər.

Əslində, onları qınamaq da olmaz. Ağcabədi nəinki 20-30 il əvvəlki, hətta dünənki Ağcabədi deyil. Ona görə ki, burada inkişaf və irəliləyiş aylarla, illərlə yox, həftələrlə, hətta günlərlə ölçülür. Səmimiyyətlə etiraf edirəm ki, biz jurnalistlər bəzən bu bölgədə gedən sürətli inkişaf və yüksəlişlə ayaqlaşa bilmirik.

Yaxın günlərin söhbətidir. Əslən Ağcabədidən olan yazıçı dostumla şəhəri gəzirdik. Sözün düzü, mən maşınla getməyi təklif etdim. O isə piyada gəzməyə üstünlük verdi. Zarafatla:

- Gözəlliyi duymaq üçün gərək asta keçəsən - dedi. Dostum haqlıymış. Bəlkə, hər həftə bu küçələrdən keçirəm, bu parklara, xiyabanlara, bulaq və fəvvarələrə tamaşa edirəm. Ancaq bu dəfə, elə bil ki, birinci dəfəydi görürdüm. Doğrudan da, həqiqətdi: gözəlliyi yad göz daha tez görür.

- Bir məsələ həmişə məni narahat edirdi, - dostum fərəhlə danışır: - Ağcabədi həmişə varlı, imkanlı rayon olub. Burada vaxtilə 100 min tondan çox pambıq istehsal olunurdu. Mal-qaranın, necə deyərlər, sayı-hesabı yox idi. Demək istəyirəm ki, adamlar yaxşı qazanırdı, gün-güzəran, dolanışıq da pis deyildi. Di gəl ki, mədəni sahə yaddan çıxmışdı, tikinti-abadlıq, quruculuq məsələləri heç kimi maraqlandırmırdı. Özünüz təsəvvür edin: lap bu yaxınlara kimi Ağcabədinin əksər küçələri yayda toz-torpaq, qışda palçıq olurdu. Qarğı çəpərlər, əyri-üyrü küçələr, harda gəldi qoyulan köşklər, budkalar adamın ürəyini sıxırdı. Öz-özümə düşünürdüm ki, Ağcabədi, nəhayət, şəhər görkəmini, şəhər simasını nə vaxt alacaq? Axı, bura mənim vətənimdir, doğulduğum, boya-başa çatdığım yuvamdır. Kim istəməz ki, doğma el-obası, yurd-yuvası abad, müasir, gözəl olmasın?

Müsahibimə "bəs indi?" - sulanı verməyə ehtiyac qalmadı.

- İndi Ağcabədi o Ağcabədi deyil... Adam inana bilmir ki, şəhər qısa müddət ərzində bu qədər dəyişə, müasirləşə, abadlaşa bilər. İndi Ağcabədi şəhəri dünyanın ən gözəl şəhərləri ilə müqayisə oluna bilər. Söhbət, əlbəttə, təkcə təzə tikililərdən, park və xiyabanlardan getmir. Burada hər şey yüksək zövq və müasirlikdən, estetikadan xəbər verir. Ona görə də mən tez-tez doğma şəhərimə gəlirəm. İndi özümü burada çox rahat və xoşbəxt hiss edirəm. Dərin zövq alıram və bu gözəlliyi, bu rahatlığı yaradanlara ürəkdən "sağ olun" - deyirəm.

Şəhərin mərkəzi meydanındayıq. Burada hər şey, sözün həqiqi mənasında, zərgər dəqiqliyi ilə ölçülüb-biçilib. Qəribə, rahat və gözəl bir aura dərhal səni öz ağuşuna alır. Əfrafımızdakıları, gördüklərimizi bircə cümlə ilə belə ifadə etmək olar: yüksək zövq və müasirlik. Meydanın sağ tərəfi tamamilə yenidən qurulmuş, burada Heydər Əliyev Mərkəzi yaradılmışdır. Heydər Əliyev Mərkəzi rayon sakinlərinin, eləcə də qonaqların ən çox sevdiyi, ziyarət etdikləri müqəddəs bir ünvana çevrilib. Üçmərtəbəli, zəngin arxitektura elementləri ilə başa gəlmiş binaya daxil olanda qəlbimiz qürur və iftixar hissi ilə döyünür. Öz şərəfli həyatını doğma xalqına, onun inkişafına həsr etmiş dahi insanın unudulmaz və parlaq obrazı, ölməz və həmişəyaşar ideyaları, dərin zəkası bir daha gözlərimiz önündə canlanır. Ulu öndərin həyat yolunu, mübarizə və qalibiyyətlə dolu fəaliyyətini əks etdirən zəngin sənədlərə tamaşa etdikcə Vətənə, millətə və xalqa təmənnasız xidmət etməyin tarixdən heç vaxt silinməyən əksini görürük.

Rayon icra hakimiyyətinin inzibati binasının qarşısı isə əsl mənada əlvan xalını xatırladır. Müxtəlif güllər, çiçəklər, onların təkrarsız kompozisiyasından ətrafa rahatlıq, gözəllik yayılır. Ulu öndərin əzəmətli heykəli bax, bu güllərin, çiçəklərin əhatəsindədir. Öz mərd və müdrik baxışları ilə bizi - müəllifi olduğu, qurduğu, yaratdığı Azərbaycan övladını qələbəyə, xoş və işıqlı günlərə səsləyir.

Dahi rəhbərin adını daşıyan prospektlə addımlayırıq. Tamamilə yenidən qurulmuş, genişləndirilmiş abad küçələr, səliqəli səkilər, müasir işıqlandırma sistemi, təzə tikilmiş və əsaslı şəkildə yenidən qurulmuş ictimai və yaşayış binalarının bu ümumi harmoniya ilə səsləşən görkəmi qəlbimizdə xoş duyğular oyadır. Kiçik dairənin sol tərəfində qısa müddət ərzində tikilib istifadəyə verilmiş şahmat məktəbi, müasir görkəm almış rayon təhsil şöbəsinin inzibati binası görünür. Sağ tərəfdə yerləşən bina isə rayon mədəniyyət sarayıdır. Obyekt tamamilə yenidən qurulmuş, müasir avadanlıqla təchiz edilmiş, ətrafda abadlıq işləri aparılmışdır. Üzeyir Hacıbəyov adına park zövq oxşayır. Burada dincəlmək, istirahət etmək üçün hər cür şərait yaradılmışdır. Ağcabədi Azərbaycan ədəbiyyatına, mədəniyyətinə, incəsənətinə böyük dahilər bəxş etmiş diyardır. Bu mənada burada - şəhərin mərkəzində yaradılmış Qarabağ Muğam Mərkəzi olduqca simvolikdir. Muğam mərkəzindən çal-çağır, nəğmə-musiqi səsi əskik olmur.

Ulu öndərin adını daşıyan parka gələndə isə, elə bil, başqa bir aləmə - zəngin və əsrarəngiz bir dünyaya düşürsən. Əvvəla, onu deyək ki, son illər şəhər bu istiqamətə xeyli addımlamış, yeni binalar tikilmiş, səkilər, yollar salınmış, müasir işıqlandırma sistemi quraşdırılmışdır. Rayon Maliyyə İdarəsinin, Sosial Müdafiə Fondu Rayon Şöbəsinin inzibati binaları, Qarabağ müharibəsi əlilləri, veteranlar və şəhid ailələri üçün tikilmiş 16, 36 və 24 mənzilli yaşayış binaları da bu ərazidədir. Ağcabədidə ilk dəfə tikilən və artıq son tamamlama işləri aparılan doqquzmərtəbəli yaşayış binası şəhərə xüsusi gözəllik verir.

Heydər Əliyev parkında, sözün həqiqi mənasında, ruhən zənginləşdik, gözümüz də dincəldi, könlümüz də. Burada, bəlkə də, dünyanın hər yerindən güllər, çiçəklər gətirilmiş, böyük zövq və səliqə ilə əkilmiş, təkrarsız mənzərələr yaradılmışdır. Görünür, elə buna görə də parka qədəm basan hər kəs buradan ayrılmaq istəmir, bu mənzərələrdən, bu gözəllikdən doymur. Şəhərin başqa guşələrinə baş çəkməzdən əvvəl burada - Heydər Əliyev parkında dincəlməyi, bir stəkan pürrəngi çay içməyi qərara aldıq. Özü də bunu ona görə etmədik ki, həqiqətən, bayaqdan xeyli gəzib yorulmuşduq. Ona görə burada əyləşdik ki, gördüklərimiz, müşahidə etdiklərimiz təkrarsız idi, gözəl idi və bu gözəllikdən asanlıqla ayrıla bilmirdik.

Həmin gün çox gəzdik, çox dolandıq, çox yeniliklərin, inkişaf və irəliləyişin şahidi olduq. Əlbəttə, onların hamısını qəzet səhifəsinə çıxartmaq mümkün deyil. Sadəcə olaraq, burada son vaxtlar tikilib istifadəyə verilmiş obyektlərin daha bir neçəsinin adlarını sadalamaq istəyirik: Hindarx qəsəbəsində yeni park, 82 saylı Ağcabədi Seçki Dairəsi üçün inzibati bina, qaçqın və məcburi köçkünlər üçün 10 yeni beşmərtəbəli yaşayış binaları, su-kanal idarəsi üçün inzibati bina və s.

O yerdə ki, söhbət inkişaf və yüksəlişdən gedir, orada, əlbəttə, fakt və rəqəmlərsiz ötüşmək mümkün deyil. Yaxşı deyiblər ki, həqiqət faktlardan doğur. Ağcabədinin son illərdəki iqtisadi, sosial və mədəni inkişafını əks etdirən fakt, rəqəm və göstəriciləri isə sadalamaqla qurtarmaz. Elə isə oxucuların diqqətini ən vacib məqamlar üzərində cəmləşdirməyə çalışacağıq.

Hər şeydən əvvəl, qeyd edək ki, ölkə Prezidenti İlham Əliyev son 4 ildə 2 dəfə Ağcabədiyə tarixi səfər etmiş, rayon ictimaiyyətinin nümayəndələri, ziyalılar, ağsaqqallar və gənclərlə unudulmaz görüşlər keçirmiş, bir sıra vacib obyektlərin açılışında, o cümlədən təməlqoyma mərasimində iştirak etmişdir. Həmin səfər və görüşlər bu gün də ağcabədililərin qəlbində unudulmaz bir xatirə kimi yaşamaqdadır. Ən əlamətdar cəhət isə ondan ibarətdir ki, ölkə rəhbərinin tarixi səfəri bütün sahələrdə işlərin daha sürətli gedişinə səbəb olmuş, insanlar arasında böyük ruh yüksəkliyi, sabaha dərin inam və ümid yaratmışdır. Elə buradaca Respublika Prezidentinin açılışda və təməlqoyma mərasimlərində iştirak etdiyi obyektlərin bəzilərini misal çəkmək istəyirik: uzun illərdən sonra Ağcabədiyə təbii qazın verilməsi, Qarabağ müharibəsi veteranları, əlilləri və şəhid ailələri üçün 24 mənzilli yaşayış binası, 14 min əhalinin yaşadığı 5 kəndi birləşdirən Ağcabədi - Qaradolaq - Kəbirli avtomobil yolu, Şahmat məktəbi, süd emalı zavodu, süd məhsulları kombinatı, 205 çarpayılıq mərkəzi xəstəxana və s.

Hər yerdə olduğu kimi, Ağcabədidə də "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nda nəzərdə tutulan vəzifələr ardıcıl surətdə, yüksək sürət və keyfiyyətlə yerinə yetirilir. 2011-ci ilin birinci yarısında rayon üzrə ümumi məhsul buraxılışının həcmi 92692,7 min manat olmuşdur ki, bu da 2010-cu ilin birinci yarısına nisbətən 22262,7 min manat çoxdur. Sənayedə, kənd təsərrüfatında, tikintidə, nəqliyyatda, rabitə və ticarətdə dinamik inkişaf müşahidə olunmuşdur. Əsas kapitala investisiya qoyuluşu müqayisə olunan dövrdə 20509,4 min manat çox olmuşdur. Bu müddətdə yerli büdcənin gəliri nəzərdə tutulduğundan 456,9 min manat çox təşkil etmişdir.

Ümumiyyətlə, bu gün Ağcabədidə istehsal olunan ümumi məhsulun 95 faizi özəl bölmənin payına düşür. 2006-cı illə müqayisədə ümumi daxili məhsul istehsalı 2,2 dəfə, əhalinin orta aylıq əmək haqqı 2,8 dəfə artmışdır. Bu müddətdə ət istehsalı 612 ton, süd istehsalı 696 ton, yumurta istehsalı isə 343 min ədəd çoxalmışdır. Həyata keçirilən ardıcıl və məqsədyönlü tədbirlər nəticəsində 2006-cı ildən indiyə kimi 6015 daimi, 8455 müvəqqəti iş yeri açılmışdır. Təkcə ötən il rayon üzrə 160 min ağac əkilmişdir.

2006-cı ildən başlanan və ildən-ilə geniş miqyas alan tikinti-abadlıq və quruculuq işləri eyni sürət və keyfiyyətlə davam etdirilməkdədir. Belə ki, Heydər Əliyev, Üzeyir Hacıbəyov prospektləri, S.Vurğun, T.İsmayılov, N.Nərimanov, H.Hacıyev, R.Tağıyev, Ə.Bünyadov küçələrində, Hindarx qəsəbəsində abadlıq və səliqə-sahman işləri sürətlə gedir. Heydər Əliyev prospektində 65, Üzeyir Hacıbəyov prospektində 6, S.Vurğun küçəsində 32 müasir işıqlandırma sistemi quraşdırılmışdır. Şəhərin Ü.Hacıbəyov prospekti, H.Hacıyev, R.Tağıyev küçələri boyunca hasarlar hörülmüşdür.

Təhsil, səhiyyə və mədəniyyət müəssisələrinin fəaliyyəti də daim diqqət mərkəzində saxlanılmışdır. Əsas cəhət odur ki, həmin sahələrin maddi-texniki bazası daha da möhkəmləndirilmiş, intizam və nəzarət gücləndirilmişdir. Rayon icra hakimiyyətindən bizə bir arayış verdilər. Orada son illər Ağcabədi rayonundan respublikanın ali məktəblərinə daxil olanların siyahısı göstərilib. Əgər 2006-cı ildə ali məktəblərə 65 nəfər daxil olmuşdursa, 2007-ci ildə 75 nəfər, 2008-ci ildə 89 nəfər, 2009-cu ildə 121 nəfər, 2010-cu ildə 173 nəfər, 2011-ci ildə isə 192 nəfər olmuşdur. Bizcə, bu rəqəmlər rayonda təhsilə göstərilən diqqət və qayğıdan, bu sahədə həyata keçirilən ardıcıl və məqsədyönlü tədbirlərdən xəbər verir. Daha bir maraqlı fakt: 2006-cı ildən bəri rayonda 30 yeni məktəb binası tikilib istifadəyə verilmiş, 6 məktəb binası isə əsaslı şəkildə təmir edilmişdir.

Ayrı-ayrı sahələrdən gətirdiyimiz bu fakt və rəqəmlərdən də aydın görünür ki, son illər Ağcabədidə inkişaf və dinamika həyatın bütün sahələrini əhatə etmiş, ardıcıl və sistemli xarakter daşımışdır. Ən mühüm amil isə ondan ibarətdir ki, Ağcabədinin respublikamızın ümumi inkişaf və yüksəlişinə olan töhfəsi ildən-ilə artır. Ağcabədililər öz şəhərlərini, qəsəbə və kəndlərini daha abad və gözəl görmək istəyirlər. Elə ona görə də gündən-günə vüsət alan abadlıq və quruculuq tədbirlərində fəal surətdə iştirak edir, yeni-yeni maraqlı təşəbbüslər irəli sürürlər.

Əlbəttə, burada Ağcabədi Rayon İcra Hakimiyyətinin, onun yerli strukturlarının iş üslub və metodları, təşkilat-idarəetmə məsələləri haqqında ayrıca danışmaq lazım gəlir. Bütün sahələri əhatə edən tələbkarlıq və məsuliyyət hissi möhkəm icra intizamı, insan amili, daha çox elmi münasibət, idarəetmə məsələlərində yeni, maraqlı forma axtarışları bu gün Ağcabədidə diqqəti cəlb edən ən vacib amillər bax, bunlardır. Vətəndaşların qəbulu, onların ərizə, şikayət və müraciətlərinə baxılması sahəsində toplanmış təcrübə xüsusilə maraq doğurur.

Belə ki, rayon icra hakimiyyəti başçısının müvafiq sərəncamı ilə təsdiq edilmiş qəbul qrafikinə uyğun olaraq, hər həftənin beşinci günləri və ayda 4 dəfə olmaqla, yerlərdə qəbullar keçirilir, vətəndaşların təklif, ərizə və şikayətlərinə baxılması, onları narahat edən problemlərin öyrənilməsi və həlli istiqamətində operativ tədbirlər görülür. O da maraqlıdır ki, qəbul günlərində qaldırılan məsələlər əsasən yerlərdə həll olunur. Cari ilin ötən dövründə rayon icra hakimiyyətinin başçısı tərəfindən 6519 nəfər dinlənilmişdir. Onlardan 5865 nəfər yerlərdə keçirilən səyyar qəbullarda, 654 nəfər isə aparatda qəbul olunmuşdur. Səyyar qəbullarda iştirak edənlərin sayı 2010-cu illə müqayisədə 3214 nəfər çox olmuşdur.

Biz bu yazı üzərində işləyərkən Ağcabədi Rayon İcra Hakimiyyətində, onun yerli strukturlarında, müxtəlif idarə, müəssisə və təşkilatlarda olduq, ziyalılarla, ağsaqqallarla, gənclərlə görüşdük. Gördüklərimizə, şahidi olduqlarımıza, müşahidə etdiklərimizə əsaslanıb qətiyyətlə deyə bilərik ki, bu gün Ağcabədidə sağlam mənəvi-psixoloji mühit, yaradıcı, təşəbbüskar ab-hava var. Adamlar sabaha dərin inam və ümidlə baxır, son illər həyatın bütün sahələrində əldə edilmiş dinamik inkişaf, əsaslı yüksəliş üçün ilk növbədə Prezident İlham Əliyevə öz dərin minnətdarlıqlarını bildirirlər.

Ağcabədililər xalqımızın böyük oğlu, ulu öndər Heydər Əliyevin ölməz və həmişəyaşar ideyalarına, ölkə rəhbəri İlham Əliyevin qətiyyətli, cəsarətli daxili və xarici siyasət xəttinə hədsiz sədaqətlərini konkret əməli işdə sübut edirlər.

Ziyəddin SULTANOV

Xalq qəzeti.- 2011.-9 oktyabr.- S. 4.