Müstəqilliyin bərpasının 20 illiyi Xətai rayonunda da qeyd olundu

Dünən Xətai Rayon İcra Hakimiyyətinin konfrans salonunda Azərbaycan Respublikasının dövlət müstəqilliyinin 20 illiyinə həsr olunmuş təntənəli mərasim keçirilmişdir. Mərasimi Xətai Rayon İcra Hakimiyyətinin başçısı Razim Məmmədov açaraq bildirmişdir ki, xalqımızın XX əsrdə ikinci dəfə öz dövlət müstəqilliyinə qovuşması çox böyük tarixi nailiyyətdir. Lakin unutmaq olmaz ki, keçmiş Sovetlər İttifaqının digər respublikalarından fərqli olaraq Azərbaycan bu müstəqilliyin əldə olunuması üçün çox böyük mücadilələrdən keçmişdir.

R.Məmmədov 20 illik tarixə ekskurs edərək bildirdi ki, müstəqilliyini elan etdikdən az bir müddət sonra Azərbaycanda sözün əsl mənasında böyük bir xaos yaşandı. Həm bu müstəqilliyimizlə barışmaq istəməyən xarici qüvvələr, həm erməni təcavüzü, həm də daxildə hakimiyyət nümayəndələrinin səbatsızlığı və təcrübəsizliyi müstəqilliyimiz üçün son dərəcə böyük təhlükələr yaratdı. Artıq qısa zaman içində ölkədə gedən hakimiyyət dəyişiklikləri də dərin siyasi böhranı, anarxiya və xaosu aradan qaldırmadı. Əksinə, AXC hakimiyyəti ölkəni vətəndaş müharibəsinə və fəlakətə sürükləməyə başladı.

Natiq bütün bu ağır məqamlarda xalqın köməyinə məhz ümummilli lider Heydər Əliyevin gəldiyini, müstəqilliyimizin xilası üçün son dərəcə böyük tədbirlər həyata keçirdiyini qeyd edərək, bildirdi ki, bundan sonra Azərbaycanda müstəqil dövlətçiliyin ilk təməl daşları hörülməyə başlandı. Xalqın birliyinə və mütəşəkkilliyinə nail olan ulu öndər qısa zamanda iqtisadiyyatın bərpasına, xarici münasibətlərin tənzimlənməsinə, ordu quruculuğuna başladı. Onun iti zəkasının və zəngin dövlətçilik təcrübəsinin məhsulu olan neft strategiyasına 1994-cü il sentyabrın 20-də imzalanan "Əsrin müqaviləsi" ilə start verildi.

R.Məmmədov ümummilli liderin misilsiz xidmətlərindən, Azərbaycan müstəqilliyinə verdiyi əvəzsiz tövhələrdən, sosial-iqtisadi inkişaf istiqamətində həyata keçirdiyi cəsarətli islahatlardan da ətraflı danışdı və qeyd etdi ki, onun irsi xalqımızın çox qiymətli sərvətidir. Bu irsin dəyəri bir də ondan ibarətdir ki, Azərbaycan bu gün də ulu öndərin müəyyənləşdirdiyi müstəqil inkişaf yolu ilə gedir və artıq 8 ildir ölkəmizi bu yolla ümummilli liderin varisi Prezident İlham Əliyev uğurla tərəqqiyə və yüksəlişə doğru aparır.

Tədbirdə Xətai Rayon İcra Hakimiyyəti başçısının birinci müavini Zaməddin Əkbərov məruzə ilə çıxış etdi və 20 illik müstəqillik dönəmində Azərbaycanın qazandığı uğurlardan geniş məlumat verdi. Təntənəli mərasimdə Milli Məclisin deputatları Gülər Əhmədova, Hüseynbala Mirələmov, "İki sahil" qəzetinin baş redaktoru, YAP Siyasi Şurasının üzvü Vüqar Rəhimzadə və digər iştirakçılar da çıxış edib bu qısa, lakin zəngin və şərəfli tarixin müxtəlif məqamlarına işıq saldılar.

İlqar RÜSTƏMOV

Xalq qəzeti.- 2011.- 12 oktyabr.- S. 8.