"Azərsu" ASC-də elmi-praktiki konfrans keçirilmişdir

Bu günlərdə ölkəmizin bütün idarə, müəssisə və təşkilatlarında Azərbaycan Respublikasının dövlət müstəqilliyinin bərpasının 20-ci ildönümünə həsr olunmuş silsilə tədbirlər keçirilir, ötən illərdə keçilmiş yola bir daha nəzər salınır. Həmin tədbirlərdə xalqımızın ümummilli lideri Heydər Əliyevin rəhbərliyi ilə işlənib hazırlanmış inkişaf strategiyasının uğurla davam etdirilməsinin Azərbaycanın iqtisadi qüdrətinin artırılması ilə yanaşı, dövlət müstəqilliyinin möhkəmləndirilməsi üçün də möhkəm baza, əlverişli zəmin yaratması birmənalı olaraq vurğulanır.

Dünən "Azərsu" Açıq Səhmdar Cəmiyyətində "Müstəqil Azərbaycan Respublikasının 20 il ərzində su təchizatı və tullantı suların kənarlaşdırılması sistemlərinin inkişafı" mövzusunda keçirilən elmi-praktiki konfransda da bu barədə danışıldı, ulu öndərin xalqın təkidli xahişi ilə yenidən hakimiyyətə gəlişindən sonra ölkənin su sektorunda həyata keçirdiyi məqsədyönlü tədbirlərdən ətraflı söhbət açıldı.

Elmi-praktiki konfransın plenar iclasını giriş sözü ilə açan "Azərsu" ASC-nin sədri Qorxmaz Hüseynov 1991-ci il oktyabrın 18-də tarixi müstəqilliyin bərpasından ötən hər bir ilin ölkəmiz, xalqımız üçün son dərəcə məsuliyyətli bir dövr kimi yadda qaldığını vurğulayaraq ulu öndər Heydər Əliyevin müəyyənləşdirdiyi düzgün sosial-iqtisadi strategiyanın uğurla reallaşdırılması nəticəsində Azərbaycanın sürətli inkişaf yoluna qədəm qoyduğunu diqqətə çatdırdı. Natiq qeyd etdi ki, bu strategiyanın ölkə Prezidenti cənab İlham Əliyev tərəfindən yeni dövrün reallıqlarına uyğun olaraq yaradıcı şəkildə davam etdirilməsi nəticəsində Azərbaycan hazırda dünyanın ən dinamik inkişaf edən bir dövlətinə çevrilmişdir.

Dövlət müstəqilliyinin bərpasının ölkə həyatının bütün sahələrində olduğu kimi, su təchizatı sektorunda da yeni mərhələnin əsasını qoyduğunu diqqətə çatdıran Q.Hüseynov bildirdi ki, Azərbaycanda siyasi sabitliyi qısa müddətdə təmin edən ümummilli lider Heydər Əliyevin şəxsi təşəbbüsü ilə beynəlxalq maliyyə qurumlarından adı çəkilən sahənin inkişaf üçün məqsədli kreditlərin cəlbi müsbət nəticələr vermiş, əhalinin içməli su ilə təminatı xeyli yaxşılaşdırılmışdır. Qeyd olundu ki, Azərbaycan dövlətinə ayrılmış kreditlər Ceyranbatan və Kür sutəmizləyici qurğular komplekslərində, eləcə də Bakı şəhərinin su təchizatı sisteminin istehsal sahələrində əsaslı yenidənqurma işlərinin aparılmasına, texniki təchizatın yeniləşdirilməsinə və əhaliyə verilən suyun keyfiyyətinin xeyli yaxşılaşdırılmasına imkan yaratmışdır. Ötən illər ərzində bir sıra sutəmizləyici qurğuların istifadəyə verildiyini bildirən natiq Oğuz-Qəbələ-Bakı su kəmərinin Azərbaycanın 20 illik müstəqillik tarixində su sektorunda reallaşdırılan ən iri infrastruktur layihəsi olduğunu diqqətə çatdırdı. Qeyd olundu ki, 1991-2011-ci illər ərzində ölkənin şəhər və rayonlarında su təchizatı və kanalizasiya sistemlərinin yaxşılaşdırılması üçün müxtəlif diametrli borularla 1500 kilometrdən artıq su və 600 kilometrə yaxın kanalizasiya xətləri çəkilmiş, 59 su anbarı, 30 suqəbuledici qurğu, 24 su nasos stansiyası, 20 kanalizasiya nasos stansiyası tikilmiş, 200-dən çox su quyusu qazılmışdır.

Azərbaycan Respublikasının Prezidenti İlham Əliyev tərəfindən 2011-2013- cü illərin ölkənin su təchizatında əsaslı dönüş yaradılması dövrü elan edildiyini diqqətə çatdıran "Azərsu" ASC-nin sədri dövlət başçısının göstərişi ilə artıq bir sıra şəhərlərin su təchizatı və kanalizasiya sistemlərinin yenidən qurulması işlərinə başlanıldığnı bildirdi.

Plenar iclasda "Sukanal" Elmi-Tədqiqat və Layihə İnstitutunun direktoru Oqtay Heybətov çıxış edərək rəhbərlik etdiyi qurumun müstəqillik illərində ölkənin su təchizatı sektorunun inkişafına verdiyi töhfələrdən danışdı. Ötən illər ərzində institutun qazandığı mühüm nailiyyətlərdən söhbət açan natiq bu elmi-tədqiqat müəssisəsinin Azərbaycanın su təchizatı sektoru üçün son dərəcə vacib layihələr işləyib hazırladığını diqqətə çatdırdı.

"Azərsu" ASC sədrinin baş müşaviri Telman Ağayev çıxışında dövlət müstəqilliyinin bərpasının çətin bir dövrə təsadüf etdiyini vurğulayaraq ölkənin içməli su sektorunun həmin illərdəki acınacaqlı vəziyyətinə nəzər saldı. Qeyd olundu ki, yalnız ulu öndər Heydər Əliyevin hakimiyyətə gəlişindən sonra bu sahə böhrandan xilas olaraq əsaslı yüksəliş mərhələsinə qədəm qoydu. Natiq ötən illər ərzində içməli su sektorunda həyata keçirilmiş mühüm tədbirləri konkret faktlar əsasında diqqətə çatdırdı.

"Birləşmiş Sukanal" MMC-nin sədri Etibar Məmmədov isə öz məruzəsində ötən illər ərzində ölkənin ayrı-ayrı regionlarının içməli su təchizatı və kanalizasiya sistemlərinin yenidən qurulması ilə bağlı həyata keçirilmiş konkret tədbirlərdən bəhs etdi. O qeyd etdi ki, ölkənin şəhər və rayonlarının, eləcə də kənd və qəsəbələrinin içməli su təchizatının yaxşılaşdırılması məqsədilə yeni su xətləri çəkilmiş, nasos stansiyaları tikilmiş, quyular qazılmışdır. Natiq dövlət başçısı İlham Əliyev tərəfindən təsdiq olunmuş "Azərbaycan Respublikası regionlarının 2009-2013- cü illərdə sosial-iqtisadi inkişafı Dövlət Proqramı"nın yaxın illərdə bölgələrin içməli su təchizatı və kanalizasiya sistemlərinin işinin əsaslı şəkildə yaxşılaşdırılmasına imkan yaradacağını bildirdi.

Elmi-praktiki konfrans öz işini bölmə iclaslarında davam etdirdi.

Mirbağır YAQUBZADƏ

Xalq qəzeti.- 2011.- 15 oktyabr.- S. 5.