Suraxanıda dövlət müstəqilliyinin bərpasının 20-ci ildönümü qeyd edildi

Suraxanı rayonunda müstəqilliyimizin bərpasının iyirminci ildönümü münasibətilə Azərbaycan Respublikası Prezidenti yanında Dövlət İdarəçilik Akademiyası və rayon icra hakimiyyəti ilə birgə "Heydər Əliyev: Azərbaycanın dövlət müstəqilliyi bizim tarixi nailiyyətimizdir" mövzusunda elmi-praktik konfrans keçirilmişdir. Tədbirdən əvvəl iştirakçılar Heydər Əliyev parkında ulu öndərin abidəsini ziyarət etmiş, önünə tər güllər qoymuşlar.

Konfrans dövlət müstəqilliyinin bərpasının 20 illiyinə həsr olunan filmin nümayişi ilə başlamışdır.

Konfransda rayon icra hakimiyyətinin başçısı İlqar Abbasov tədbir iştirakçılarını salamlayaraq, Azərbaycanın dövlət müstəqilliyinin 20-ci ildönümünün hər bir azərbaycanlının böyük fəxrlə qeyd etdiyi bir bayram olduğunu bildirmişdir. İ.Abbasov ölkəmizin dövlət müstəqilliyinin çox mürəkkəb tarixi və siyasi şəraitdə bərpa edildiyini, yalnız xalqımızın ümummilli lideri Heydər Əliyevin hakimiyyətə qayıtmasından sonra, 1993-cü ilin iyun ayından etibarən ölkədə formalaşmağa başlayan yeni siyasi kurs nəticəsində cəbhədə atəşkəsə nail olunduğunu, vətəndaş müharibəsi təhlükəsinin, separatçılıq meyillərinin qarşısının alındığını və dövlət quruculuğu sahəsində konkret addımlar atıldığını diqqətə çatdırmışdır. Natiq eyni zamanda xatırlatmışdır ki, dahi rəhbər Heydər Əliyev ikinci dəfə Azərbaycanda hakimiyyətə gəldikdən sonra ölkəmizin müstəqil, demokratik, hüquqi, dünyəvi, qanunun aliliyinə və vətəndaş cəmiyyətinə əsaslanan dövlətə çevrilməsi məqsədilə milli dövlət quruculuğu prosesinin həyata keçirilməsi üçün zəruri işlər görülmüş, ölkə həyatının bütün sahələrini əhatə edən köklü islahatlara başlanılmışdır.

Ölkəmizdə yeni dövlət quruculuğu tarixinin son səkkiz ilinin ulu öndərin layiqli davamçısı, Azərbaycan Respublikasının Prezidenti İlham Əliyevin fədakar fəaliyyəti ilə bağlılığını qeyd edən natiq bu illər ərzində ölkəmizdə sosial - iqtisadi sahələrdə həyata keçirilən genişmiqyaslı tədbirlər, əhalinin maddi vəziyyətinin daha da yaxşılaşdırılması ilə əlaqədar reallaşdırılan islahatlar barədə tədbir iştirakçılarına geniş məlumat vermişdir. Natiq diqqətə çatdırmışdır ki, məhz Prezident İlham Əliyevin həyata keçirdiyi uğurlu strategiyanın nəticəsidir ki, dünyada maliyyə böhranı tüğyan etdiyi bir vaxtda Azərbaycanda iqtisadi artımın səviyyəsi 9,3 faiz olmuşdur. Əhalinin rifahının yaxşılaşdırılması sahəsində həyata keçirilən proqramların icrası, eləcə də Prezident İlham Əliyevin sosial təminatların, əmək haqlarının və müavinətlərin artırılması ilə bağlı imzaladığı sərəncamlar məhz bu iqtisadi inkişafın təzahürüdür.

Sonra Dövlət İdarəçilik Akademiyasının rektor əvəzi Əlikram Abdullayev çıxış edərək, ölkəmizin son 20 ildə qazandığı nailiyyətlər, iqtisadi və sosial həyatın bütün sahələrində aparılan islahatlar barədə fikirlərini bölüşmüşdür.

Tədbirdə çıxış edən Dövlət İdarəçilik Akademiyasının "Geostrateji Araşdırmalar Mərkəzi"nin müdiri, AMEA-nın müxbir üzvü Əli Nuriyev, kafedra müdiri, dosent Rəfrəddin Nağıyev, 279 saylı tam orta məktəbin müəllimi, tarix elmləri namizədi İlqar Niftəliyev, kafedra müdiri Firdovsiyyə Əhmədova Azərbaycanın müstəqilliyinin bərpası tarixi barədə ətraflı məlumat vermiş, ulu öndər Heydər Əliyevin və onun siyasi varisi Prezident İlham Əliyevin ölkəmizin dünya dövlətləri arasında layiqli yer tutması üçün həyata keçirdiyi işlərdən danışmışdır.

Sonda Heydər Əliyev parkında Bakı Şəhər Mədəniyyət və Turizm İdarəsi və rayon icra hakimiyyəti ilə birgə təşkil edilən kitab sərgisinə, habelə məktəblilərin əl işlərinə və qalib inşa yazılarına baxış keçirilmişdir.

Axşam isə Heydər Əliyev parkında rayondakı mədəniyyət saraylarının və tanınmış incəsənət ustalarının iştirakı ilə bayram konserti olmuşdur.

V.BAYRAMOV

Xalq qəzeti.- 2011.- 15 oktyabr.- S. 8.