Qəbələdə dövlət müstəqilliyinin 20 illiyi silsilə tədbirlərlə qeyd olunur

Azərbaycanın öz dövlət müstəqilliyini bərpa etməsinin 20 illiyi ölkənin hər yerində olduğu kimi Qəbələ rayonunda da xeyli müddətdir ki, silsilə tədbirlərlə qeyd olunur. Rayon İcra Hakimiyyəti Aparatında təsdiq olunmuş Tədbirlər Planının əsas bəndi olan ümumrayon konfransının iştirakçıları öncə ulu öndər Heydər Əliyevin rayon mərkəzindəki abidəsi önünə tər çiçək dəstələri düzmüş, Şəhidlər Xiyabanını ziyarət etmişlər. Sonra Heydər Əliyev Muzeyi ilə tanış olan tədbir iştirakçılarına ulu öndərin titanik siyasi xidmətini əks etdirən çoxsaylı tarixi sənədlər təqdim olunmuşdur. Qeyd olunmuşdur ki, ümummilli liderin siyasi hakimiyyətə qayıdışı təkcə vətəndaş müharibəsinin bir addımlığında olan ölkəmizə nicat gətirməmişdi, həm də Azərbaycanın dövlət müstəqilliyinin əbədiləşdirilməsinə zəmin yaratmışdı.

Rayon mərkəzindəki Heydər Parkında Qəbələnin son 20 ildə keçdiyi inkişaf yolunu əks etdirən sərgiyə baxış təşkil olunmuşdur. Qəbələnin sənaye və kənd təsərrüfatı müəssisələrində istehsal olunmuş məhsullar tədbir iştirakçılarının böyük marağına səbəb olmuşdur. Rayon məktəblilərinin əl işlərindən ibarət sərgi isə daha böyük məmnunluq yaratmışdır. Rayonun tarixinə, mədəniyyətinə və təbiətinə həsr olunmuş istənilən eksponat diqqət çəkirdi.

"Qafqaz" Otelində keçirilən "Müstəqilliyin 20 illiyi" konfransında rayon icra hakimiyyətinin başçısı Səbuhi Abdullayev geniş məruzə ilə çıxış edərək gənc müstəqil dövlətimizin keçdiyi şanlı yolun bütün detalları barədə əhatəli söz açmışdır. Natiq qeyd etmişdir ki, Azərbaycan xalqı bir əsrdə ikinci dəfə dövlət müstəqilliyinə qovuşanda misilsiz bir xoşbəxtlik hissi yaşayırdı. Ancaq müstəqilliyin ilk illərində ölkəyə rəhbərlik edənlərin siyasi diletantlığı və təcrübəsizliyi ucbatından ölkə vətəndaş müharibəsi həddinə gətirilmiş, paytaxt başda olmaqla bütün şəhər və rayonlarda xaos və anarxiya mühiti formalaşmış, müstəqilliyin əldən getmək təhlükəsi yaranmışdı. Bütün bunları günün reallığı kimi qiymətləndirməyi bacaran xalqın öndə gedən ziyalıları çıxış yolunu ulu öndər Heydər Əliyevi Naxçıvandan Bakıya dəvət etməkdə görürdülər. Heydər Əliyevin xalqın təkidli tələbləri ilə reallaşan siyasi qayıdışı ölkədə vətəndaş müharibəsinin qarşısını aldı, xaos və anarxiya son qoyuldu, xalqın dövlətə inamı bərpa edildi və ən başlıcası dövlət müstəqilliyimizin ikinci dəfə əldən getməsi təhlükəsi sovuşdu. Bir sözlə, ulu öndər Heydər Əliyev Azərbaycan xalqına Qurtuluş, milli dövlətçiliyimizə isə nicat gətirdi. Bu gün cənab Prezident İlham Əliyev ulu öndərin siyasi kursunu böyük prinsipiallıq və ardıcıllıqla davam etdirir.

Natiq qeyd etdi ki, geridə qalan 20 ildə təkcə Qəbələ rayonu deyil, bütövlükdə respublikamız mükəmməl bir inkişaf yolu keçmişdir. Dövlətin yeritdiyi sosial yönümlü daxili siyasət ölkə əhalisinin rifah halını gündən-günə yaxşılaşdırır, respublikamız beynəlxalq aləmdə özünəməxsus nüfuz qazanır.

Milli Məclisin Qəbələdən seçilmiş deputatı, el ağsaqqalı Fəttah Heydərov öz çıxışında müstəqilliyin qorunub saxlanılmasında ulu öndər Heydər Əliyevin tarixi xidmətlərindən bilavasitə özünün şahidi olduğu konkret faktlar əsasında söz açdı. O qeyd etdi ki, Heydər Əliyevin xalqımız qarşısındakı böyük xidmətlərindən biri məhz Prezident İlham Əliyev kimi dünya miqyaslı siyasətçinin yetişdirilməsi idi: "Heydər Əliyevin ən böyük əsərləri Azərbaycanın dövlət müstəqilliyi və müstəqil Azərbaycanın bugünkü Prezidentidir".

Bayram tədbirində çıxış edən natiqlərin hamısı Azərbaycanın hərtərəfli inkişafından söz açdılar, müstəqilliyin xalqımıza bəxş etdiyi xoşbəxtlikdən danışdılar. Yubiley tədbiri böyük bayram konserti və atəşfəşanlıqla başa çatdırıldı.

İlqar HƏSƏNOV

Xalq qəzeti.- 2011.-15 oktyabr.- S. 8.