Masallıda turizm sərgisi

Bakı-Astara magistral avtomobil yolunun 230 kilometrliyində yerləşən Masallı rayonu relyefinə və təbiətinə görə ölkəmizin səfalı guşələrindən sayılır. Bir tərəfi Talış dağları və meşələri ilə, bir tərəfi isə Xəzər dənizi ilə əhatə olunub. Bütün bunlar Masallıda turizmin inkişafına gözəl zəmin yaradır. Məhz dövlət müstəqilliyimiz bərba edildikdən sonra rayonda bu imkan geniş şəkildə gerçəkləşdirilməyə başlayıb.

Tarixən yaxın və uzaq ellərdən Masallıya qonaq gələn insanlar burada yerin təkindən çıxan möcüzəli isti sudan müalicə məqsədilə istifadə ediblər. Bu gün Masallı beynəlxalq standartlara cavab verən turizm xidməti şəbəkəsinə, yerli və xarici qonaqları layiqincə qəbul etmək imkanına malikdir. Ümumilikdə rayonda 31 turizm, istirahət və əyləncə mərkəzi fəaliyyət göstərir. Onlardan 26-nın xüsusi lisenziyası var. Rayonda fəaliyyət göstərən turizm obyektləri eyni vaxtda 1100-ə yaxın turistə xidmət edə bilər. Bu obyektlərdə mövcud olan 1040 nömrədən 70-i lüks dərəcəli, 660-ı birinci dərəcəli, 310-u isə turist dərəcəli nömrələrdir. İstirahətə gələn turistlərə 3 marşrut üzrə turlar təklif olunur. Rayonun görməli yerlərinə, tarixi abidələrinə, ziyarətgahlara, muzeylərə, Yardımlı şəlaləsinə və Lənkərana səyahətlər təşkil edilir.

Bu ilin 9 ayı ərzində rayona ümumilikdə 14300-ə yaxın turist gəlib. Onlardan 500 nəfəri xarici turistlər olub.

Bu günlərdə Masallı şəhərinin mərkəzindəki "Dövlət Bayrağı" Meydanında Dövlət müstəqilliyinin bərpasının 20 illiyi və "Turizm ili" çərçivəsində maraqlı turizm sərgisi təşkil edilib. Sərgidə rayonun turizm, istirahət və əyləncə obyektləri öz xidmətlərini və bölgə mətbəxinin ləziz təamlarını nümayiş etdiriblər. Turizm mərkəzlərinin reklamı baxımından da sərginin önəmi böyük olub.

Eyni zamanda, sərgidə el sənətkarlarının əl işləri, rayonun Hişkədərə kəndində yerləşən R.Tağıyev adına Masallı Tarix-diyarşünaslıq muzeyinin nadir eksponatları sərgilənib. Bölgənin özəl nemətləri də özünəməxsus bir tərzdə təqdim olunub.

Tədbirdə turizm sahəsində səmərəli fəaliyyətinə görə bir neçə turist obyekti Masallı Rayon İcra Hakimiyyətinin başçısı Qəzənfər Ağayev tərəfindən fəxri fərman və qiymətli hədiyyələrlə mükafatlandırılıblar.

Minlərlə rayon sakininin və qonaqların iştirak etdiyi sərgidən sonra maraqlı konsert proqramı təqdim olunub. Rayon mədəniyyət evinin özfəaliyyət kollektivləri, dünya şöhrətli "Halay" folklor ansamblı və veteranlardan ibarət rəqs qrupları rəngarəng musiqi nömrələri ilə çıxış ediblər. Tədbir ona qatılanların hamısına əsl bayram ovqatı bəxş edib.

Əli NƏCƏFXANLI

Xalq qəzeti- 2011.- 16 oktyabr.- S. 8.