Sabunçu rayonunda müstəqilliyimizin bərpasının 20 illiyi təntənə ilə qeyd olundu

Azərbaycanın müstəqilliyinin bərpa olunmasından 20 il ötür. İndi ölkəmizin hər yerində bu münasibətlə tədbirlər keçirilir, ötən illər qazanılmış nailiyyətlərdən söhbət açılır.Sabunçu rayonunda da bununla bağlı təntənəli mərasim keçirilmişdir.

Tədbirdə Sabunçu Rayon İcra Hakimiyyətinin başçısı Əlibaba Əliyev geniş məruzə ilə çıxış etdi. Ə. Əliyev bildirdi ki, xalqımız hələ 1918-ci ildə müsəlman Şərqinin ilk demokratik respublikasını - Azərbaycan Xalq Cümhuriyyətini yaratmışdır. Təəssüf ki, bir sıra obyektiv səbəblər üzündən cümhuriyyət cəmi 23 ay müddətində mövcud olmuşdur. Azərbaycan xalqının tarixində Heydər Əliyev dövrü isə müstəqilliyə doğru böyük dönüş və milli oyanış dövrü kimi yadda qalmışdır

Dövlət müstəqilliyinin ilk illərində ölkəmizdə aparılan quruculuq işləri həyatımızın bütün sahələrində uğurla davam etdirilərək daha da geniş miqyas aldı.

Natiq müstəqillik illərində ölkədə, o cümlədən Sabunçu rayonunda həyata keçirilən quruculuq işlərindən ətraflı bəhs etdi. O bildirdi ki, ümummilli lider Heydər Əliyevin Azərbaycanın müstəqilliyinin möhkəmlənməsi sahəsindəki misilsiz xidmətlərindən biri də özündən sonra dövlətçilik irsinin əbədiliyini təmin edəcək qüdrətli varis və lider yetişdirməsidir. Ötən 8 ildə ulu öndərin müəyyənləşdirdiyi strategiyanı uğurla davam etdirən Prezident İlham Əliyevin ölkəyə rəhbərlik fəaliyyətini diqqətlə nəzərdən keçirdikdə isə onun xalqına və dövlətinə qəlbən bağlı lider olduğu bir daha aydın görünür. O, daha sonra dedi:- Rayonumuzun inkişafından danışarkən fəxrlə qeyd etməliyəm ki, bu tərəqqinin əsl müəllifi Prezidentimiz cənab İlham Əliyevdir. Respublika rəhbərinin sahibkarlığın inkişafı, işsizliyin aradan qaldırılması, yeni iş yerlərinin açılması ilə bağlı proqram tapşırıqlarının həyata keçirilməsi rayonumuzun inkişafı ilə bağlı prioritet istiqamətlərdən olmuşdur.

Son illər Sabunçu rayonunda cənab Prezidentin birbaşa təşəbbüsü və himayəsi sayəsində bir sıra mühüm obyektlərin tikintisinin təməli qoyulmuş və inşası uğurla davam etdirilir. Bunlara misal olaraq Balaxanı qəsəbəsi ərazisində "Bərk tullantılar" poliqonunun yeniləşdirilməsi və orada müasir standartlara cavab verən zavodun inşasını, Sabunçu qəsəbəsi ərazisində regionda ən böyük stadionun tikintisini, Bakı-Aeroport və Sumqayıt dairəvi yolunun Sabunçu rayonu ərazisindən keçən hissəsində müasir tipli yolun inşasını, ətrafda aparılmış yenidənqurma və abadlıq işlərini göstərmək olar ki, bütün bunlar şəhərin, eləcə də rayonumuzun görünüşünü əsaslı şəkildə dəyişmişdir.

Müstəqilliyinin bərpasından keçən 20 il ərzində rayon ərazisində onlarca sosial obyektlərin tikintisi aparılmış, təhsil, səhiyyə, mədəniyyət və idman qurğuları inşa edilmişdir. Şəhid ailələri və Qarabağ əlilləri üçün Bakıxanov qəsəbəsində beşmərtəbəli 2 bina, Zabrat qəsəbəsində 9 mərətəbəli 81 mənzilli bina tikilib istifadəyə verilmiş, Maştağa Olimpiya Mərkəzi, Nardaran qəsəbəsində idman zalı, Kürdəxanı-Pirşağı və Balaxanı qəsəbələri ərazisində idman kompleksləri inşa edilmişdir.

Bu illər ərzində 7182 şagird yerlik 9 yeni məktəb tikilmiş, 14 məktəbdə 4040 şagird yerlik əlavə tədris korpusları, üç məktəbəqədər uşaq müəssəsi istifadəyə verilmiş, 9-da əsaslı təmir işləri aparılmışdır, həmçinin 4 peşə liseyində əsaslı təmir işləri görülmüşdür.

Bu gün biz böyük minnətdarlıq hissi ilə qeyd etməliyik ki, Sabunçu rayonu ərazisində onlarca sosial yönümlü yeni müəssisələr tikilmiş və ya əsaslı təmir olunmuşdur, yüzlərlə aztəminatlı rayon sakini fondun failiyyətindən bəhrələnərək sağlamlığını bərpa etmiş və sosial-məişət problemlərini həll etmişdir. Onu da nəzərinizə çatdırmaq istəyirəm ki, Heydər Əliyev Fondu xeyirxah işlərinin davamı olaraq hazırda Pirşağı qəsəbəsində 112 saylı orta məktəb və 226 saylı uşaq bağçasının köhnə binalarını sökərək yerində müasir tipli 3 mərtəbəli məktəb binasının və uşaq bağçasının tikintisinə başlamışdır.

Bildiyiniz kimi, əvvəllər qəbul edilmiş və uğurla hayata keçirilən sosial yönümlü dövlət proqramlarının davamı kimi möhtərəm Prezident İlham Əliyevin 4 may 2011-ci il tarixli sərəncamı ilə təsdiq edilmiş "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı" çərçivəsində ümumən nəzərdə tutulmuş 16 sahəni əhatə edən tədbirlərin həyata keçirilməsinə başlanmışdır.

Biz bütün bunları rayonumuza göstərilən diqqət və qayğının təzahürü kimi qiymətləndirir və fürsətddən istifadə edərək bütün rayon sakinləri adından cənab Prezidentimizə dərin minnətdarlığımızı bildiririk. Prezidentimizi əmin edirik ki, biz bundan sonrada bu və ya digər dövlət proqramlarının həyata keçirilməsində yaxından iştirak edərək Müstəqil Azərbaycanımızın daha da qüdrətlənməsinə öz əməli töhfələrimizi verəcəyik.

Sonra YAP Sabunçu rayon təşkilatının sədri M.Abbasquliyeva,"Neftqazmaş"ASC-nin sədri V.Hacıyev və Milli Məclisin deputatı E.Quliyev çıxış edərək müstəqillik illərində həyata keçirilən islahatlardan, ölkəmizin beynəlxalq aləmdə qazandığı nüfuzdan danışdılar.

M.MÜKƏRRƏMOĞLU

Xalq qəzeti.- 2011.- 16 oktyabr.- S. 7.