Su təsərrüfatı işçilərinin təltifolunma mərasimi keçirilmişdir

Azərbaycan Prezidenti İlham Əliyevin Ceyranbatan Su Kəmərləri İdarəsininin 50 illiyi ilə əlaqədar 2011-ci il sentyabrın 7-də imzaladığı sərəncamlarla "Azərsu" Açıq Səhmdar Cəmiyyətinin fəxri ad və medallarla təltif olunmuş əməkdaşlarının təltifolunma mərasimi keçirilmişdir.

Tədbiri giriş sözü ilə açan "Azərsu" ASC-nin sədri Qorxmaz Hüseynov ölkə Prezidenti İlham Əliyevin su təsərrüfatı işçilərini fəxri ad və medallarla təltif etməsini, eləcə də bu il sentyabr ayının 8-də yeni ultrasüzgəcli sutəmizləyici qurğunun təməlqoyma mərasimində iştirak etməsini kollektivə göstərilən yüksək diqqət və qayğının parlaq təzahürü olduğunu vurğulamışdır. Q.Hüseynov bütün bunların kollektivin məsuliyyətini daha da artırdığını diqqətə çatdıraraq cənab Prezidentin su təsərrüfatı işçilərinin qarşısına qoyduğu tapşırıqların vaxtında və keyfiyyətlə icra edilməsi üçün bundan sonra da səylə çalışacaqlarını və göstərilən etimadı doğruldacaqlarını bildirmişdir.

Sonra "Ə.Ş.Məmmədova "Əməkdar mühəndis" fəxri adı verilməsi" və "Azərsu" Açıq Səhmdar Cəmiyyətinin işçilərinin "Tərəqqi" medalı ilə təltif edilməsi haqqında" Azərbaycan Respublikası Prezidentinin sərəncamları oxunmuş, səhmdar cəmiyyətinin əməkdaşlarına vəsiqə və medallar təqdim edilmişdir.

Fəxri ad və medalla təltif olunan "Azərsu" ASC-nin işçiləri Prezident İlham Əliyevə dərin təşəkkürlərini bildirmiş və bu etimadı doğrultmaq üçün daha əzmlə çalışacaqlarını söyləmişlər.

Xatırladaq ki, ölkə Prezidentinın sözügedən sərəncamları ilə "Azərsu" ASC-nin Sukanal Elmi-Tədqiqat Layihə İnstitutunun direktor müavini Əhməd Məmmədov "Əməkdar mühəndis" fəxri adı, 5 nəfər əməkdaş isə "Tərəqqi" medalı ilə təltif olunmuşlar.

M.YAQUBZADƏ

Xalq qəzeti.- 2011.- 20 oktyabr.- S. 5.