"Şəhər (Rayon) Mədəniyyət Mərkəzlərinin yaradılması" pilot layihəsinin icrasına başlanıldı

Qədim və zəngin Azərbaycanın qeyri-maddi mədəni irsinin müasir standartlara cavab verə biləcək formada qorunması, bərpası və istifadəsinin təşkili, o cümlədən onun infrastrukturunu təşkil edən klub müəssisələrinin fəaliyyətinin yenidən qurulması məqsədilə Azərbaycan Respublikasının Mədəniyyət və Turizm Nazirliyi tərəfindən qabaqcıl mədəni-siyasi texnologiyalara və müsbət beynəlxalq təcrübəyə əsaslanan bir sıra konseptual proqram və layihələrə start verilmişdir.

Belə ki, Azərbaycanın qeyri-maddi mədəni irs sahəsinin (diyarşünaslıq, folklor və sənətkarlıq) dəstəklənməsinin təminat mexanizmlərinin monitorinqi zamanı qeyri-maddi mədəni irs sahəsi üzrə bu vaxta qədər mövcud olan Azərbaycan Respublikasının qanunları, müvafiq normativ-hüquqi sənədlər, beynəlxalq konvensiyalar, dövlət büdcəsindən sahənin inkişafına ayrılmış maliyyə vəsaitləri, təşkil olunmuş və iştirak edilmiş milli və beynəlxalq konfrans, sərgi, seminar və sair tədbirlər, nəşr edilmiş kitablar və çəkilmiş filmlər, mədəniyyət evləri, klub, park və müvafiq mərkəzlər şəbəkəsində aparılan işlər və sair barədə toplanmış məlumatlar əsasında sahənin mövcud vəziyyəti təhlil edilmişdir.

Monitorinqin nəticələri nəzərə alınmaqla, "Şəhər (Rayon) Mədəniyyət Mərkəzlərinin yaradılması" pilot layihəsinin icrasına start verildi. Pilot layihə Lənkəran şəhərində və İsmayıllı rayonunda Azərbaycan Respublikası Mədəniyyət və Turizm Nazirliyinin sisteminə daxil olan klub müəssisələrinin ilk müasir Mədəniyyət Mərkəzlərinin yaradılmasını nəzərdə tutur. Müvafiq klub müəssisələrinin bazasında yerləşəcək və müasir avadanlıqlarla təchiz ediləcək Mədəniyyət Mərkəzləri yerli ziyalıları və mədəniyyət xadimlərini cəlb edərək müvafiq şəhər və rayon mədəniyyət və turizm şöbələrinin fəaliyyətinə dəstək olacaq.

Nazirliyin mətbuat xidmətinin verdiyi məlumatda bildirilir ki, bu məqsədə nail olmaq üçün iki vəzifə icra olunmalıdır: Birincisi, Azərbaycan qeyri-maddi mədəni irsinin infrastrukturunun yerlərdə optimal şəkildə idarə edilməsini təmin etmək məqsədilə Lənkəran şəhər, İsmayıllı rayon mədəniyyət və turizm şöbələrinin şəbəkəsində olan klub müəssisələrinin şəhər (rayon) səviyyəsində mərkəzləşdirilməsi, ikincisi, Azərbaycan qeyri-maddi mədəni irsinin diyarşünaslıq, folklor və sənətkarlıq istiqamətlərinin yerlərdə ünvanlı inkişafı məqsədilə Lənkəran şəhər, İsmayıllı rayon mədəniyyət və turizm şöbələrinin şəbəkəsi daxilində olan klub müəssisələrinin profilləşdirilməsi.

Öz fəaliyyətini beynəlxalq təcrübəyə əsaslandıran, müvafiq xarici qurumlarla təcrübə və layihə mübadiləsi aparan Mədəniyyət Mərkəzlərinin əsas fəaliyyəti yerli biznes və ictimai qurumların iştirakı ilə yerlərdə qeyri-maddi mədəni irsin, xalq yaradıcılığının dəstəklənməsi, turizmin inkişafına şərait yaradılması ilə bağlı olmalıdır.

Mədəniyyət Mərkəzlərinin təsis edilməsi Azərbaycan Respublikası Mədəniyyət və Turizm Nazirliyi tərəfindən həyata keçirilən daxili mədəniyyət siyasəti sistemində dönüş üçün təkan verərək, mədəniyyətin idarə olunmasında desentralizasiya, demonopolizasiya və demokratikləşmə istiqamətində aparılan islahatların sürətləndirilməsi, regionların inkişafı və yerli təşəbbüslərin oyadılması, turistlərin cəlb olunması, yoxsulluğun azaldılması üzrə aparılan dövlət siyasəti ilə üst-üstə düşərək səmərəli mexanizmin yaradılması ilə nəticələnməlidir.

"Qeyri-maddi mədəni irsin qorunmasına dair" YUNESKO Konvensiyasının tövsiyələrinə əsasən və qeyri-maddi mədəni irs sahəsində beynəlxalq təcrübədən, o cümlədən Avropa Şurasının "Avropada mədəniyyət siyasəti və təmayüllərinin Kompendiumu" kimi beynəlxalq layihələrdən bəhrələnərək hazırlanmış pilot layihəsinin icra müddəti 6 aydır. Növbəti mərhələdə pilot layihənin nəticələri və mümkün nöqsanları nəzərə alınmaqla, təcrübənin respublika üzrə tətbiq olunması planlaşdırılır.

M.MÜKƏRRƏMOĞLU

Xalq qəzeti.- 2011.- 22 oktyabr.- S. 7.