"Mən Azərbaycanın xoşbəxt gələcəyinə inanıram"

31 oktyabr 2003-cü ildə Azərbaycan Respublikasının Prezidenti İlham Heydər oğlu Əliyevin andiçmə mərasimi olmuşdur

Mən Azərbaycanın xoşbəxt gələcəyinə inanıram. Əminəm ki, ölkəmiz bundan sonra da inkişaf edəcək, daha da güclənəcəkdir. Azərbaycanda demokratiya daha da inkişaf edəcək, siyasi plüralizm, söz azadlığı təmin olunacaqdır. Ölkəmiz müasir dövlətə çevriləcəkdir. Bütün bunları etmək üçün Azərbaycanda çox işlər görmək lazımdır.

İlham ƏLİYEV,

Azərbaycan Respublikasının Prezidenti

Səkkiz il əvvəl Azərbaycan Respublikasının Prezidenti İlham Əliyevin andiçmə mərasimində səsləndirdiyi fikirlər bu gün ölkəmizin bütün sahələrində özünü göstərir. İndi dünyanın tanınmış ictimai-siyasi xadimləri, ekspertləri və görkəmli xadimləri də etiraf edirlər ki, 2003-cü ildə Azərbaycanın tarixində yeni inkişaf mərhələsinin əsası qoyuldu. Ötən səkkiz il ərzində Azərbaycanın iqtisadi, siyasi və mədəni sahələrində əsaslı dönüş yaradılmış və ölkəmiz dünyanın inkişaf etmiş qüdrətli dövlətləri sırasına qoşulmaqdadır. İndi regionda Azərbaycanın iştirakı olmadan hər hansı iri infrastruktur layihəsinin reallaşdırılması qeyri-mümkündür. Bu, ölkəmizin nüfuzunun, iqtisadi gücünün və qüdrətinin yüksək səviyyədə olmasından xəbər verir.

2003-cü ildə prezident seçkilərinin keçirildiyi dövrün özünəməxsus reallıqları mövcud idi. Ölkədə demokratik şəraitin inkişafı, azad, ədalətli, şəffaf seçkilərin keçirilməsi üçün hər cür şərait yaradıldığından mübarizənin gərgin keçəcəyi bəlli idi. Siyasi mənsubiyyətindən asılı olmayaraq, hər bir namizəd seçiciləri ilə heç bir maneə, süni əngəl olmadan görüşür, platformasını açıqlayırdı. Bu da Azərbaycanda hüquqi, sivil, dünyəvi, demokratik dövlətin bərqərar olmasından irəli gəlirdi. Ölkəmizin siyasi, iqtisadi, mədəni həyatında baş verən yeniliklər irəliləyişin sonrakı uğurlu davamiyyəti üçün xalqın məhəbbətinin kiminlə olması ilə şərtlənirdi.

Seçki ərəfəsində Azərbaycanda nə iqtidarda, nə də müxalifətdə olanlar, həmçinin prezident seçkisini böyük maraqla izləyən beynəlxalq qurumların nümayəndələri şübhə etmirdilər ki, prezidentliyə namizədlər arasında İlham Əliyev milli müstəqilliyin gələcəyi, habelə dövlətçiliyimizin inkişafı, Azərbaycanın beynəlxalq aləmdə böyük nüfuz qazanması üçün böyük işlər görə bilər. Xalq çox yaxşı dərk edirdi ki, prezidentliyə namizəd İlham Əliyev böyük siyasi xadim, Heydər Əliyev siyasi məktəbinin yetirməsidir. Bu bir həqiqətdir ki, İlham Əliyevin gücünün miqyası böyükdür, bu güc hakimiyyət və xalq arasında həmrəyliyin ifadəsidir.

Prezidentliyə ən şanslı namizəd İlham Əliyevin biliyinin, siyasi uzaqgörənliyinin, təcrübəsinin müəyyən hissəsi gendən gəlib. Axı, o, Heydər Əliyev kimi dünya şöhrətli dövlət xadiminin siyasi məktəbində yetişmişdir. Onun təcrübəsinin qalan hissəsi isə fərdi planda qazandığı biliyin, bacarığın nəticəsi idi. Ulu öndər Heydər Əliyev 2003-cü il oktyabrın 1-də xalqa müraciətində də bunu xüsusi vurğulayaraq demişdir: "İlham Əliyev yüksək intellektli, praqmatik düşüncəli, müasir dünya siyasətini və iqtisadiyyatını gözəl bilən, enerjili və təşəbbüskar bir şəxsiyyətdir... İnanıram ki, mənim axıra çatdıra bilmədiyim taleyüklü məsələləri, planları, işləri sizin köməyiniz və dəstəyinizlə İlham Əliyev başa çatdıra biləcək. Mən ona özüm qədər inanıram və gələcəyinə böyük ümidlər bəsləyirəm".

2003-cü il oktyabrın 15-də seçicilərin mütləq əksəriyyəti qəti mövqeyini ortaya qoyarkən ilk növbədə dayanıqlı və təhlükəsiz gələcək, firavan həyat, güclü, qüdrətli, demokratik Azərbaycanda yaşamaq arzusunu, istəyini bildirdi. Bütün bunlar ulu öndər Heydər Əliyev siyasi kursuna olan inamdan, etibardan irəli gəlirdi.

Azərbaycan Prezidenti İlham Əliyev 2003-cü il oktyabrın 31-də andiçmə mərasimində bu məsələni xüsusi vurğulayaraq dedi: "Oktyabrın 15-də Azərbaycan xalqı seçki məntəqələrinə gələrək Heydər Əliyev siyasətinə səs veribdir. Sülhə, əmin-amanlığa, tərəqqiyə, inkişafa, quruculuğa, sabitliyə səs veribdir. Bu siyasətə Azərbaycanda alternativ yoxdur. Heydər Əliyevin siyasəti Azərbaycana böyük uğurlar gətiribdir. Bütün sahələrdə Azərbaycan inkişaf edir, uğurlar qazanır. Beynəlxalq aləmdə Azərbaycan yüksəlir, uğurlar qazanır. Azərbaycan beynəlxalq aləmdə özünə layiq yerini tuta bilibdir, Azərbaycanın nüfuzu artıbdır. İndi Azərbaycanla hesablaşırlar, Azərbaycana hörmət edirlər. Regionda bütün beynəlxalq miqyaslı layihələr Azərbaycanın iştirakı ilə, onun milli maraqlarının nəzərə alınması ilə həyata keçirilir".

Heydər Əliyev siyasi məktəbinin öncül prinsiplərinə yaradıcılıqla yanaşan möhtərəm Prezidentimiz İlham Əliyev 2003-cü il oktyabrın 31-də Prezident kimi təntənəli and içəndən dərhal sonra Azərbaycanı ümummilli liderin yolu ilə irəli aparacağını bildirmişdir.

Azərbaycan Prezidenti İlham Əliyev imzaladığı ilk fərman və sərəncamlarla sübut etdi ki, bu istiqamətdə aydın, geniş və ölçülüb-biçilmiş fəaliyyət proqramına malikdir. Bu proqrama uyğun olaraq ilk növbədə əhalinin sosial durumu diqqət mərkəzində saxlanılmış, minimum əmək haqqı və pensiyalar artırılmış, ölkəmizin beynəlxalq aləmdəki nüfuzunun yüksəldilməsi, mövqelərinin möhkəmləndirilməsi. əlaqələrinin daha da genişləndirilməsi istiqamətində qətiyyətli addımlar atmışdır.

2003-cü ildən başlayaraq, Azərbaycanın sosial-iqtisadi inkişafında keyfiyyətcə yeni mərhələnin əsası qoyuldu. İqtisadi strategiyanın yeni prioritetləri və inkişaf perspektivləri müəyyən edildi. Ölkədə sosial-iqtisadi inkişafın davamlı dinamikasını təmin etmək üçün qeyri-neft sektorunun sürətlə inkişaf etdirilməsi, infrastruktur obyektlərinin beynəlxalq standartlara uyğun yenidən qurulması əsas vəzifə kimi qarşıya qoyuldu. Ölkədə əlverişli investisiya mühiti və yeni iş yerləri yaratmaq üçün digər sahələrlə yanaşı, azad sahibkarlıq fəaliyyətinin inkişafını təmin etmək, sahibkarlıq strukturlarının dövlət köməyi vasitəsilə daha da təkmilləşdirilməsi prioritet vəzifələrdən idi. Çünki özəl sektorun inkişafı ilə ölkə iqtisadiyyatını daha da möhkəmləndirmək mümkün idi. Azərbaycan Prezidenti andiçmə mərasimində bu məsələni də diqqətə çatdıraraq demişdir: "Azərbaycanda özəl sektor uğurla inkişaf edir. Çox sevindirici haldır ki, ümumi daxili məhsulun formalaşmasında özəl sektorun payı 70 faiz təşkil edir. Sahibkarlıq sinfi yaranır. Genişmiqyaslı özəlləşdirmə proqramı həyata keçirilir. Torpaq islahatı aparılıbdır və torpaq artıq kəndlilərin özəl mülkiyyətinə verilibdir. Bunun nəticəsində kənd təsərrüfatı istehsalı artır. Bütün bunlar onu göstərir ki, Azərbaycanda Heydər Əliyevin rəhbərliyi altında aparılan iqtisadi islahatlar öz gözəl nəticələrini verməkdədir".

Azərbaycan Prezidenti İlham Əliyev Azərbaycan Respublikası regionlarının sosial-iqtisadi inkişafı "Dövlət Proqramı"nı (2004-2008-ci illər) təsdiq etməklə regionlarda mövcud olan əmək ehtiyatlarından, təbii və iqtisadi potensialdan səmərəli istifadə etmək, iqtisadiyyatın qeyri-neft sektorunun inkişafını sürətləndirmək və aqrar sektorda islahatları dərinləşdirmək, əhalinin məşğulluğunu artırmaq, yoxsulluğun səviyyəsini azaltmaq, müasir tipli müəssisələr, yeni iş yerləri yaratmaq istiqamətində sistemli tədbirlərin həyata keçirilməsi üçün hüquqi baza yaratdı. Dövlət Proqramının qarşıya qoyduğu vəzifələrin həyata keçirilməsi özünü bütün sahələrdə göstərdi. Regionlarda dünya standartlarına cavab verən istehsal və sənaye müəssisələri yaradıldı. İş axtarmaq üçün xarici ölkələrə gedən soydaşlarımız Vətənə qayıtdılar. Son 8 ildə ölkədə 950 mindən çox yeni iş yerinin yaradılması Prezidentin andiçmə mərasimində verdiyi vədə yüksək səviyyədə əməl etməsindən xəbər verir.

"Bakı şəhərinin qəsəbələrinin 2006-2007-ci illər üzrə sosial-iqtisadi inkişafının sürətləndirilməsinə dair Dövlət Proqramı"nın "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın həyata keçirilməsi ilə Azərbaycanın bütün regionlarında əsaslı dönüş yaradılmış, insanların yaşayış tərzləri daha da yaxşılaşdırılmış, yollar əsaslı təmir olunmuş, yeni parklar salınmış, abadlıq və yenidənqurma işləri geniş vüsət almışdır. Dövlət proqramlarının uğurlu icrası ölkədə qeyri-neft sektorunun inkişafının sürətləndirilməsi, tarazlı regional və davamlı sosial-iqtisadi inkişafa, əhalinin həyat səviyyəsinin daha da yaxşılaşdırılmasına böyük təkan vermişdir.

Prezident İlham Əliyev Bakı-Tbilisi-Ceyhan əsas ixrac neft və Bakı-Tbilisi-Ərzrum qaz kəmərlərinin inşasının uğurla davam etdirilməsinə nail oldu. Ardınca Bakı-Tbilisi-Qars dəmir yolunun tikintisi ətrafında müzakirələr başlandı. Möhtərəm Prezidentimizin iqtisadiyyatın daha da inkişaf etdirilməsi istiqamətində yeritdiyi siyasət Bakı-Tbilisi-Ceyhan əsas ixrac neft və Bakı-Tbilisi-Ərzrum qaz kəmərlərinin həyata vəsiqə alması ilə reallaşdı. Bu iri infrastruktur layihələrin gerçəkləşdirilməsindən sonra Azərbaycan dünya miqyasında həmin sahədə böyük təcrübəsi olan dövlət kimi tanındı. Hazırda ABŞ, Böyük Britaniya, Fransa, İtaliya, Hollandiya, Belçika, Türkiyə, Yaponiya, Norveç, Almaniya, Çin və digər inkişaf etmiş dövlətlər Azərbaycanla neft və qeyri-neft sahəsində mühüm iqtisadi layihələrdə iştirak edirlər. Belə layihələrin reallaşdırılması ölkəmizin beynəlxalq aləmə inteqrasiyasına güclü dəstək verir. Hazırda Bakı-Tbilisi-Qars dəmir yolunun tikintisi davam etdirilir. İri layihələrin reallaşdırılmasında böyük təcrübə qazanmış Azərbaycan bu layihənin də həyata vəsiqə alması istiqamətində işləri sürətləndirib.

Azərbaycan Prezidentinin daxili və xarici siyasət sahəsində həyata keçirdiyi tədbirlər inkişaf etmiş xarici dövlətlərin və mötəbər beynəlxalq təşkilatların da diqqətindən yayınmadı. Ona görə də Azərbaycanla faydalı əməkdaşlıq qurmaq istəyən dövlətlərin sayı getdikcə artdı. Aparıcı dövlətlərin Azərbaycan Prezidenti İlham Əliyevin həyata keçirdiyi siyasəti dəstəkləmələri Ermənistan-Azərbaycan, Dağlıq Qarabağ münaqişəsinin nizamlanması prosesində də özünü büruzə verdi. Prezidentlik fəaliyyəti dövründə İlham Əliyevin düzgün müəyyənləşdirilmiş xarici siyasəti Ermənistanı dünyada işğalçı dövlət kimi tanıtdı. Azərbaycan isə beynəlxalq hüquq norma və prinsiplərinə böyük hörmətlə yanaşan, sülh tərəfdarı olan dövlət kimi tanınır.

Bu gün Azərbaycanın dünya birliyində nüfuzunun artması, yüksək tribunalar qazanması da dövlət başçımızın verdiyi vədlərə sadiqliyinin nəticəsidir. Azərbaycan Prezidenti İlham Əliyevin rəhbərliyi altında ölkəmizin müstəqil siyasət aparması və bu siyasətin xalqımızın maraqlarına xidmət etməsi daha bir parlaq qələbəyə imza atdı. Məlum olduğu kimi, BMT Baş Məclisinin bu il oktyabrın 24-də keçirilmiş plenar iclasında Azərbaycan 2012-2013-cü illərdə Şərqi Avropa bölgəsini bu təşkilatın Təhlükəsizlik Şurasında təmsil edəcək yeni qeyri-daimi üzv seçilmişdir. Bu, ölkəmizin 20 illik müstəqillik tarixində qazandığı ən parlaq qələbələrdəndir.

Bu gün Azərbaycan dünya siyasətini müəyyən edən ölkələrdən birinə çevrilib. Ölkəmizin daxili və xarici siyasət sahəsində qazandığı uğurlar bir daha təsdiqləyir ki, dövlətimizin başçısı İlham Əliyev andına sadiq Prezidentdir.

Əliqismət BƏDƏLOV

Xalq qəzeti.- 2011.- 30 oktyabr.- S. 3.