Vətən torpağı uğrunda mübarizənin ön sırasında

Azərbaycan Respublikasının Prezidenti İlham Əliyev istər ölkə ictimaiyyətinin nümayəndələri, istər xarici ölkələrin dövlət başçıları ilə görüşlərində, istərsə də ayrı-ayrı beynəlxalq təşkilatlardakı çıxışlarında dönə-dönə vurğulayıb ki, Dağlıq Qarabağ münaqişəsi beynəlxalq hüquq normaları, Azərbaycanın ərazi bütövlüyü çərçivəsində həll olunmalıdır. Bu, Azərbaycanın birmənalı və dəyişməz mövqeyidir, Azərbaycanın ərazi bütövlüyü məsələsi hər hansı danışığın mövzusu ola bilməz. Hazırda Ermənistanın ölkəmizə təcavüzü nəticəsində yaranmış bu münaqişənin həlli istiqamətində ATƏT-in Minsk qrupunun vasitəçiliyi ilə danışıqlar davam etdirilir və sülh prosesi açıq-aşkar Azərbaycanın mövqe üstünlüyü şəraitində aparılır.

Amma bir həqiqət də var ki, məhz bu məqsəd - Azərbaycanın ərazi bütövlüyü və suverenliyinin qorunub saxlanması uğrunda birinci Qarabağ müharibəsi illərində xalqımızın ən qeyrətli, ən mübariz oğulları canlarını fəda ediblər. Doğrudur, erməni təcavüzünün başlandığı ilk günlərdən başlayaraq atəşkəs razılaşmasının əldə olunduğu 1994-cü ilin mayınadək bütün Ermənistan-Azərbaycan cəbhəsi boyu Vətənimizin sadiq keşikçiləri düşmənə cəsarətlə müqavimət göstəriblər, ancaq təəssüf ki, müharibənin birinci mərhələsi torpaqlarımızın 20 faizinin Ermənistanın işğalı altına düşməsi ilə nəticələnib. Özünün güclü havadarlarına arxalanan, yeri gəldikcə onların ən müasir hərb maşınının köməyindən istifadə edən nankor və xəyanətkar ermənilər Dağlıq Qarabağı və onun ətrafındakı yeddi rayonumuzu zəbt etməyə nail olublar.

Dövlət müstəqilliyini yenicə bərpa etmiş, hələ ordu quruculuğu məsələlərinə lazımınca diqqət yetirə bilməmiş Azərbaycan Respublikası isə Qarabağ cəbhəsində dişinə qədər silahlanmış amansız və qəddar düşmənlə üz-üzə qalsa da, müqavimət əzmini sındırmayıb. Azərbaycanın vətənpərvər oğulları doğma torpaqların müdafiəsinə qalxıblar. İlk mərhələdə könüllülərdən ibarət hərbi dəstələr şəklində formalaşmış Milli Ordumuz bir sıra cəbhələrdə düşmənə layiqli cavab verib, hətta bütün Dağlıq Qarabağ ərazisini yağılardan təmizləməyə az qala müvəffəq olub. Təəssüf ki, müxtəlif səbəblər üzündən sonradan bir çox mövqelər yenidən düşmənə təslim edilib, arada çoxlu şəhidlər verməli olmuşuq.

Azərbaycan torpaqlarının bütövlüyü uğrunda şəhid olmuş vətənpərvər oğullarımızdan biri də Nəsib Mikayıl oğlu Məlikovdur. O, 1994-cü il sentyabrın 11-də qəhrəmancasına həlak olub. Bu il şəhidin ölümündən 17 il keçir. Anası Lətifə Xəlilova, demək olar ki, hər gün oğlunun Şəhidlər Xiyabanında olan məzarına baş çəkir, hər il oğlunun ölüm günündə onun xatirəsini yad etməyi özünə borc bilir.

Nəsib Məlikov 1969-cu il yanvarın 8-də Bakıda anadan olub. 1988-1990-cı illərdə keçmiş SSRİ ordusunda hərbi xidmətdə olub. Sonrakı həyatını da hərb işinə bağlamaq istəyərək Azərbaycan Müdafiə Nazirliyinin Bakı ətrafındakı hərbi hissələrindən birində kiçik komandir kimi xidmətə başlayıb. Bu günlərdə redaksiyamızda olan anası Lətifə xanım bildirdi ki, Nəsib fiziki cəhətdən sağlam, uca boylu, enli kürəkli, eyni zamanda, mənəvi cəhətcə mətanətli, cəsur bir gənc olub. Elə bu xüsusiyyətlərinə görə Müdafiə Nazirliyi 1992-ci ildə onu hərbi təhsilini davam etdirmək üçün qardaş Türkiyə Respublikasına göndərib. Nəsib Məlikov Ankara Hərbi Akademiyasında mükəmməl hərbi təhsil alıb, türk hərbçilərindən hərb elminin sirlərini öyrənib. Akademiyanı müvəffəqiyyətlə başa vuraraq Azərbaycana qayıdıb və doğma Vətənində xidmətini davam etdirib.

Nəsibin hərbi xidmətinin əsas dövrü Ermənistan-Azərbaycan cəbhəsində qızğın döyüşlərin getdiyi zamana təsadüf edib. Azərbaycan Prezidenti Heydər Əliyevin hakimiyyətə ikinci dəfə qayıdışından sonra ordumuzun əsgərləri düşmənə qarşı daha böyük inamla döyüşürdülər. Hətta cəbhənin bəzi istiqamətlərində ciddi qələbələr də əldə olunub, bəzi şəhər və kəndlərimiz işğaldan azad edilib. Tükiyədə hərbi təhsil almış Nəsib Məlikov da bu və ya digər cəbhələrdə döyüşlərin fəal iştirakçısı olub.

Nəsib Qarabağın azadlığı uğunda döyüşlərə Ağdərə cəbhəsində qoşulub. Bu cəbhədə qəhrəman Azərbaycan oğulları həm düşmənin ərazilərimizin daxilinə doğru irəliləməsinin qarşısını alır, həm də ona ağır zərbələr endirirdi. Türk hərb sənətinin dərinliklərinə yaxşı bələd olan Nəsib də erməni hərbi birləşmələrinə dəfələrlə istər ağır texnika, istərsə də canlı qüvvə cəhətdən ciddi zərbələr endirib, onu ağır itkilər verməyə məcbur edib. O, özünün qorxmazlığı və şücaəti ilə bir neçə döyüşdə fərqlənib. Qazanılmış mövqeləri axıradək əldə saxlamaq, yaralanmış döyüş yoldaşlarını düşmənə əsir düşməkdən xilas etmək üçün Nəsib sinəsini sipər etməyi bacarır, eyni zamanda, bəzən fiziki imkanlarına, uca boyuna, qüvvətli qollarına güvənərək az qala ölümlə oynamaqdan qorxmurdu. Elə bu ehtiyatsızlığı üzündən döyüşlərin birində - 1994-cü ilin sentyabrında o, nankor düşmən gülləsinə tuş gəldi...

Sonradan Vətən bu cəsur oğlunun xatirəsini əbədiləşdirməyi unutmadı. Hazırda Bakının Sabunçu rayonundakı küçələrdən biri Nəsib Məlikovun adını daşıyır. Ankara Hərbi Akademiyasındakı şəhidlər lövhəsində Nəsibin də şəkli bərq vurur. Ən vacibi isə Nəsib kimi mərd oğulların Vətən yolunda candan keçərək yeni nəsillər üçün unudulmaz örnək qoymasıdır. Bu cür qəhrəmanlıq nümunələri ikinci Qarabağ döyüşlərində bizə çox lazım olacaq...

Paşa ƏMİRCANOV

Xalq qəzeti.- 2011.- 10 sentyabr.- S. 6.