"Canlanır hər qarış yer Sumqayıtda..."

Sentyabrın 16-da Sumqayıtın tarixində ilk dəfə olaraq "Şəhər günü" keçirilib. Bayrama hərtərəfli ciddi hazırlıq görülüb, təmizlik-abadlıq işləri genişlənib. Hər kəs bayrama öz töhfəsini verməyə çalışıb. Memarlar, inşaatçılar, təmirçilər, kommunal xidmət işçiləri, hətta idmançılar, musiqiçilər, rəssamlar və şairlər də "Şəhər günü"nü layiqincə qeyd ediblər.

Doğma Azərbaycanımızın böyük uğurlarla müşayiət olunan inkişaf yolunun əsası ümummilli lider Heydər Əliyev tərəfindən müəyyənləşdirildiyi birmənalıdır. Ulu öndər hələ sovet dövründə müttəfiq respublikamızı dünyaya tanıda bilmiş, müstəqillik illərinin əvvəllərindən isə gənc dövlətimizin möhkəmləndirilməsi, onun sosial-iqtisadi inkişafına nail olunması naminə məqsədyönlü addımlar atmış, əhalinin rifah halının yaxşılaşdırılması üçün həyat əhəmiyyətli qərarlar qəbul etmişdir. Ümummilli liderin arzularının, ideyalarının şəhəri olan Sumqayıt da bu diqqət və qayğıdan kənarda qalmamış, müstəqillik illərində özünün daha sürətli inkişaf mərhələsinə qədəm qoymuşdur. Respublikaya rəhbərlik etdiyi dönəmlərdə gənclik şəhərinə 16 dəfə səfər etmiş ulu öndərin atalıq qayğısı sayəsində onun "kiçik Azərbaycan" adlandırdığı Sumqayıt ildən-ilə, aydan-aya böyümüş və gözəlləşmişdir.

Azərbaycan Respublikasının Prezidenti cənab İlham Əliyev də varislik ənənəsinə sadiq qalaraq ölkənin dinamik inkişaf konsepsiyasını ardıcıl reallaşdırır, zamanın çağırışlarına adekvat olan yeni əlavələrlə zənginləşdirir. Dövlət başçısının təkcə Sumqayıt şəhərinin inkişafına göstərdiyi diqqətin miqyasları yetərincə geniş və hərtərəflidir. Hər bir sumqayıtlı doğma şəhərə gündəlik dövlət qayğısından ruhlanır və sabaha daha böyük inamla, nikbinliklə baxır.

Sumqayıtda əvvəlki dövrlərdə də abadlıq-quruculuq işləri aparılıb. Regional inkişaf üzrə Dövlət Proqramında nəzərdə tutulan tədbirlər gənclik şəhərindən yan ötməyib. Ancaq 2011-ci ilin əvvəlindən Sumqayıtda yaranan canlanma xüsusilə diqqəti cəlb edir. Quruculuq sahəsində yetərli təcrübəsi olan Eldar Əzizov şəhərə icra hakimiyyəti başçısı təyin ediləndən sonra sənayenin dirçəldilməsi, sosial sferanın təzələnməsi tədbirləri, necə deyərlər, bütün cəbhə boyu aparılmağa başlayıb. Prezidentin tapşırığı ilə bu işlər daha da sürətlənib. Bir neçə istiqamətdə çox gözəl, müasir infrastruktur layihələrin icrasına start verilib. Elektrik enerjisi, qaz, su təchizatı sahəsində əsas problemlər həllini tapır, yeni kanalizasiya sisteminin yaradılması üçün addımlar atılır. İndi şəhərdə abadlıq-quruculuq işlərinin həyata keçirilmədiyi meydan, küçə yoxdur, - desək, mübaliğə etmiş olmarıq.

Bu il iyulun 7-də Sumqayıta səfər edən Prezident İlham Əliyev Nəsimi adına dənizkənarı mədəniyyət və istirahət parkında, Heydər Əliyev parkında, Cümə Məscidində, habelə şəhərin girişində və digər ərazilərdə görülən əsaslı yenidənqurma və abadlıq işlərinin gedişi ilə tanış olmuş, 1 saylı Uşaq-Gənclər İdman Məktəbinin yenidənqurmadan sonra açılışında iştirak etmiş, "Kimyaçı" Mədəniyyət Sarayının qarşısında yaradılacaq meydana və sarayın inzibati binasına baxmış, Cənubi Qafqazın ən böyük müasir kompleksində - Sumqayıt Texnologiyalar Parkında yaradılan yeni müəssisələrdə olmuş, tapşırıq və tövsiyələrini vermişdir. Həmin gün şəhər ictimaiyyətinin nümayəndələri ilə görüşən dövlətimizin başçısı təəssüratlarını bölüşmüşdür: "...Sumqayıt sakinləri istəyirlər ki, Sumqayıt şəhəri gözəlləşsin, abadlaşsın. Mən həmişə deyirəm ki, Bakı dünyanın ən gözəl şəhərlərindən biridir. Ümid edirəm ki, vaxt gələcək, biz Sumqayıt haqqında da eyni sözləri deyə biləcəyik... Bildiyiniz kimi, mən dəfələrlə Sumqayıtda olmuşam, son illər ərzində haradasa altı-yeddi dəfə. Əlbəttə ki, biz əvvəlki dövrdə daha çox infrastruktur və şəhər təsərrüfatının inkişafı üçün vacib olan məsələlərlə məşğul idik. İlk növbədə elektrik stansiyasının tikintisi, ondan sonra sənaye müəssisələrinin işə salınması. İndi isə vaxt gəlib çatıb ki, biz şəhərin, necə deyərlər, estetik tərəfi ilə ciddi məşğul olaq və məşğul da olacağıq... Əlbəttə, mən bundan sonra daha tez-tez gələcəyəm. Əminəm ki, bu şəkillərdə göstərilən mənzərə qısa müddət ərzində reallığa çevriləcəkdir".

Qarşıya qoyulmuş vəzifələrin reallaşdırılmasından ötrü Prezident İlham Əliyevin martın 15-də imzaladığı sərəncamla onun 2011-ci il dövlət büdcəsində nəzərdə tutulmuş ehtiyat fondundan yenidənqurma, abadlıq və yaşıllaşdırma işlərinin davam etdirilməsi üçün Sumqayıt Şəhər İcra hakimiyyətinə 5 milyon manat məbləğində vəsait ayrılıb.

Azərbaycan Prezidentinin "Sumqayıt paytaxt standartlarına tam uyğunlaşdırılmalıdır" tapşırığı hazırda gənclik şəhərində əməli fəaliyyət proqramı kimi yerinə yetirilməkdədir. Şəhərin yeni rəhbərliyi bu istiqamətdə yorulmaz səylər göstərir. Parklarda yenidənqurma işləri sürətlənib, küçələr abadlaşdırılır, binalar görkəmini dəyişir, yaşıllıqlar artırılır.

Eldar Əzizov iyul ayında keçirilən şəhər fəallar yığıncağında demişdi ki, Sumqayıtda bütün işlər ölkə Prezidenti cənab İlham Əliyevin tapşırıq və tövsiyəsi ilə həyata keçirilir. İndi Azərbaycanın hər bir bölgəsində Heydər Əliyev Mərkəzi və ya muzeyi fəaliyyət göstərir. Sumqayıtda isə belə bir mərkəz yaradılmayıb. İndi bu boşluğu doldurmaqdan ötrü ulu öndərin adını daşıyan parkda Heydər Əliyev Mərkəzi yaradılacaq ki, bu da şəhərin hər bir sakininin ürəyincə olacaq.

Cari ilin yaz aylarında Sumqayıt üçün xüsusi əhəmiyyət daşıyan məsələ kimi onun simvolunun və gerbinin yenidən işlənməsi məqsədilə müsabiqə elan edilmişdi. Sözügedən yığıncaqda müsabiqənin nəticəsini açıqlayan icra başçı Sumqayıt gerbinin müxtəlif eskizlərini monitor vasitəsilə diqqətə çatdıraraq müsabiqə komissiyasının qalib saydığı nümunəni təqdim elədi. Bu gerb sülhsevər və pozitiv əhval-ruhiyyəli sahilyanı şəhərin tərəqqiyə can atması ideyasını daha inandırıcı şəkildə əks etdirir: üfüqlərdə göyərçin silueti, aşağıda mavi Xəzər və dalğalar üzərində "Sumqayıt" adı. Eskiz yekdilliklə bəyənildi. Qərara alındı ki, Sumqayıt şəhəri ilə bağlı olan bütün tədbirlərdə, burada istehsal edilən bütün məhsullarda bu gerb əks olunsun. Eyni zamanda, Sumqayıtın giriş hissəsinin, şəhər icra hakimiyyətinin yeni tikiləcək binasının, Fransanın Kann şəhərindəkinə uyğun yaradılacaq bulvarın layihələri də şəhərin daha gözəl gələcəyindən soraq verir.

Xatırlayıram ki, bir neçə ay öncə Eldar Əzizov müsahibələrinin birində Sumqayıt və sumqayıtlılar haqqında təəssüratlarını söyləyərkən demişdi: "Şəhər memarlıq baxımından Bakı və respublikanın başqa şəhərləri ilə müqayisədə daha düzgün tikilmişdir. Burada hər şeydə onu tikən memarların ruhu hiss olunur. Şəhər öz səciyyəvi üslubu, enli küçələri, geniş mikrorayonları, çoxsaylı parkları, yaşıllıqları ilə seçilir. Bu gün Sumqayıt Azərbaycanın ekoloji cəhətdən ən təmiz şəhərlərindən biridir. Sakinləri isə gülərüz və hər cəhətdən fəal insanlardır. Bu insanların öz baxışlarını və mövqelərini açıq ifadə etməsi onların fərqləndirici xüsusiyyətidir. Bu xüsusiyyət onlara rəğbət oyadır, lakin eyni zamanda, məsuliyyəti artırır".

Sumqayıtın inkişafında əsas konseptual xətt ondan ibarətdir ki, şəhər mühüm sənaye mərkəzi olmalıdır. Bu proses fəal inkişaf edir. Prezidentin təşəbbüsü ilə burada bəlkə də bütün postsovet məkanında analoqu olmayan sənaye parkı yaradılıb. Yeni müəssisələr tikilir. Bakı müəssisələrinin bir hissəsi Sumqayıta köçürülür, lakin bunlar artıq əvvəlkindən fərqli, yüksək texnologiyalara əsaslanan istehsalatlardır. Sənaye limanının inşası barədə qərar qəbul edilib. Müvafiq infrastruktur obyektləri yaradılır, yeni iş yerləri açılır. Lakin artıq orada uyğun ixtisaslara malik olan insanlar işləyə biləcəklər. Buna görə də Prezidentin tapşırığına əsasən, burada müvafiq texniki peşə məktəbləri açılır. Proseslər sürətləndikcə şəhərin əhalisi də sürətlə artacaq.

Şəhərin mövcud müəssisələrinin işində də dönüş yaranıb. Yarım ildə Sumqayıtda ümumi məhsul istehsalının həcmi 266 milyon manat, ötən ilin müvafiq dövrü ilə müqayisədə artım tempi 30,6 faiz təşkil edib. Ümumi daxili məhsulun tərkibində qeyri-dövlət sektorunun payı 63 faiz olub. Orta aylıq əməkhaqqı 230 manatdan 350 manata yüksəlib: 52 faiz artım müşahidə edilib. Kimya sənayesində məhsul istehsalı iki dəfə, metallurgiyada üç dəfə, yeyinti sənayesində 1,4 dəfə, yüngül sənayedə 1,3 dəfə artıb. Bütün maliyyə mənbələri hesabına ayrı-ayrı sahələrin inkişafına 35 milyon manatdan çox investisiya yönəldilib.

Sumqayıtda şəhərsalma və abadlaşdırma, deyildiyi kimi, Bakı standartlarına yaxınlaşdırılır. Sumqayıtın giriş yolları modernləşdirilir, mikrorayonların abadlaşdırılması üzrə sakinlərin arzuları nəzərə alınmaqla xüsusi proqram qəbul edilib. Ölkə rəhbərliyinin bu prosesə həm intellektual, həm də praktiki baxımdan rəhbərlik etməsi sumqayıtlıları daha da ruhlandırır. Prezident İlham Əliyev sumqayıtlılarla görüşündə bütün layihələrin reallaşdırılmasının konkret müddətlərini müəyyən etməklə faktiki olaraq yeni Sumqayıtın təməlini qoymuş olub.

Yeri gəlmişkən, dövlət başçısının tapşırığına əsasən, artıq bu gün resursları tükənmiş köhnə binaların sökülməsi, dövlət büdcəsinin vəsaitləri hesabına əhalinin köçürülməsi və şərti adı "Yeni Sumqayıt" olan ərazidə təzə evlərin tikintisi haqqında layihə hazırlanır. Orada ikinci dünya müharibəsindən sonrakı dövrdə tikilmiş barak tipli ikimərtəbə "qoca" evləri müasir göydələnlər əvəz edəcək.

Elə şəhərin girəcəyindən burada genişmiqyaslı abadlıq-quruculuq işlərinin aparılması diqqət çəkir. Yeni hazırlanan layihə üzrə əsas giriş qapısı son dərəcə müasir görkəmdə olacaq. Şəhərin yaxası sayılan "Sülh" küçəsi başdan-başa yenidən qurulur. Səkilər, yollar genişlənir, yöndəmsiz köşklər, mağazalar götürülür və ya yeni üslubda təzədən tikilib quraşdırılır. "Yol inşaatçısı" MMC-nin əmək adamları qoyduqları mərmər səki daşları ilə yolları zövqoxşayan nizama salır, gözəlləşdirirlər. Bu iş dəniz kənarındakı "Sülh göyərçini" kompleksinə çatana qədər davam etdiriləcək: yəni bütün küçə boyunca.

Sumqayıtın görkəminə ciddi xələl gətirən yarımçıq tikililərin, yöndəmsiz obyektlərin sökülməsi şəhəri sevən hər kəsin ürəyincədir. "Sülh" küçəsinin köhnə avtovağzal ərazisindəki yarımçıq bina neçə il idi ki, gözdağına çevrilmişdi. Ulu öndərin abidəsi olan ərazinin yaxınlığındakı bu tikili çirkab sularla, zir-zibillə dolu idi. Şəhər məhkəməsi haqlı olaraq onun sökülməsi barədə qərar verdi.

Digər ərazilərdə də tör-töküntülərin, yığılıb qalmış tullantıların daşınması və poliqonda zərərsizləşdirilməsi həyata keçirilir. Çerkassı küçəsi boyunca çoxlu söküntü aparılıb. 41-ci məhəllədən 18-ci mikrorayona qədər ərazidə bəzi sakinlər tərəfindən qeyri-qanuni salınmış bostanların, toyuq hinlərinin, heyvan damlarının, eybəcər çəpərlərin sökülməsi və həmin yerlərin təmizlənməsi tədbirlərini əksəriyyət bəyənir.

Yenidənqurmanın bir ünvanı da "Azərbaycan" prospektidir. Ölkə rəhbərinin tövsiyəsi ilə bu prospektdə - dənizkənarı parkın ətrafında yerləşən yaşayış binalarının fasadları klassik memarlıq üslubunda yenidən qurulur. Ən azı səkkiz binanın görkəmi bu qaydada dəyişdiriləcək və qədimlik koloriti ilə diqqət çəkəcək. Bu binalar bir qədər köhnə olduğuna görə əlavə işlərdən ötrü ayrıca özüllər qazılır ki, divarlara ağırlıq düşməsin.

Parka yaxın küçə və məhəllələr başdan-başa abadlaşdırılır. Daha münasib yerə köçürülmüş Nəsimi heykəlinin ətraf əraziləri səliqəyə salınır, yaşıllıq zolağı boyunca yerə naxışlı tamet plitələr döşənir. 1-ci məhəllədəki küçəyə baxan yaşayış binalarında yenidənqurma işləri sürətlə aparılır. Fransız tipli dam örtükləri uzaqdan diqqəti cəlb edir. "A+A" şirkətlər qrupu hazırda 2-ci məhəllədəki binalarda altfasadların sökülməsinə və üzlüklərin çəkilməsinə başlayıb. "Azərbaycan" prospektində yerləşən inzibati binaların, sosial və xidmət obyektlərinin yeniləşdirilməsi, ətraf ərazilərin abadlaşdırılması istiqamətində də işlər davam etdirilir. "Bələdiyyə" parkının yenidən əsl istirahət mərkəzlərindən birinə çevrilməsi üçün də güclü səylər göstərilir.

Mərkəzi poçt binasının ətrafı göz oxşayır. Ərazi başdan-başa yeni görkəmə salınıb. Naxışlı tamet plitələr, müasir işıqlandırma sistemləri, yaşıllıq zolaqları hər kəsi heyran edir. Sumqayıtda belə meydan və xiyabanların sayı sürətlə artmaqdadır.

Heydər Əliyev parkının yeni layihəsi təsdiqini tapdıqdan sonra burada işlər daha da genişlənib. Artıq parkdakı zövqsüz, primitiv üsulla tikilmiş iaşə obyektləri, çayxanalar və başqa bu kimi obyektlər sökülüb. Əraziyə mozaik daşlar döşənir, yeni oturacaqlar qoyulur, suvarma və işıqlandırma sistemləri yeniləşdirilir. Yol kənarlarına daha müasir zibil qutuları qoyulur. Parkda ucaldılacaq Heydər Əliyev Mərkəzinin sayəsində bura əsl ziyarətgaha çevriləcək.

Sakinlər də, qonaqlar da Sumqayıtın bugünkü vüsətini ürəkdən bəyənirlər. Ötən həftə "Azərikimya" İstehsalat Birliyində üçgünlük beynəlxalq ekoloji konfrans keçirilirdi. Almaniya Federal Ekoloji Nazirliyinin, Almaniya Beynəlxalq Əməkdaşlıq Cəmiyyətinin və bu ölkənin Azərbaycandakı səfirliyinin nümayəndələrinin də qatıldığı tədbir yüksək səviyyədə keçdi. Bu sətirlərin müəllifi şahiddir ki, qonaqlar Sumqayıtı gəzərkən gənc şəhərdən və burada görülən işlərdən məmnunluqlarını gizlətmirdilər.

Sentyabrın 16-da respublikanın müxtəlif şəhərlərindən və xarici ölkələrdən Sumqayıta gəlmiş qonaqlar onun sakinləri ilə birlikdə əzəmətli, maraqlı və gözəl bir mərasimin - Şəhər günü bayramının şahidi oldular. Bir gün əvvəl şəhərin bütün küçələrini və yaşayış massivlərini gəzib dolaşmış milli geyimli çaparlar dəstəsi, habelə dəvə karvanı, süvarilər, idman avtomobilləri Sumqayıt sakinlərini və qonaqları tədbirə səsləyən digər görüntülər bayram mühiti yaratmışdı.

Sumqayıt Şəhər İcra Hakimiyyətinin başçısı Eldar Əzizov, hüquq mühafizə orqanlarının, sənaye müəssisələrinin rəhbərləri, habelə ictimaiyyətin nümayəndələri ümummilli lider Heydər Əliyevin abidəsi önündəki meydanda toplaşmışdılar. Abidənin önünə tər çiçəklər qoyuldu.

Bayram qədim Corat kəndinin qala divarı qarşısından başlandı. Hazırda Sumqayıtın bir hissəsinə çevrilmiş müasir qəsəbənin improvizə edilmiş meydanında qala divarı tikilmişdir. Tamaşa burada yaradılmış bazar meydanında və böyük gəmidə göstərilirdi. Bütövlükdə bütün səhnədə 2 min ildən çox tarixi olan qədim Coratın ab-havası yaradılmışdı. Bayrama gələnlər Azərbaycanın qədim adət və ənənələri, məişət mərasimləri, xalq sənəti ustalarının nəsildən-nəslə keçən folklor nümunələri, habelə məxsusi bayram üçün uzunluğu 2,4 metr olan Corat qutabını hazırlamış aşpazların məharətinə heyran qalmışdılar.

Qədim topdan açılan atəş böyük Roma sərkərdəsi Pompeyin öz ordusu ilə birlikdə bayrama gəlməsini xəbər verdi. Ədəbi-bədii kompozisiyanın iştirakçıları bir çox maraqlı səhnələrə, o cümlədən Sumqayıt şəhərinin yaranması adının tarixindən bəhs edən səhnələrə tamaşa etdilər.

Sonra respublika hökuməti üzvlərinin, Milli Məclisin deputatlarının, Azərbaycanda akkreditə olunmuş diplomatik korpusun nümayəndələrinin, bir sıra rayonların icra hakimiyyəti başçılarının, qardaşlaşmış şəhərlərin nümayəndə heyətlərinin və başqalarının iştirak etdikləri şəhər bayramı Sumqayıtda Kimyaçıların Üzeyir Hacıbəyli adına Mədəniyyət Sarayı qarşısındakı böyük meydanda davam etdirildi.

Burada bayram yürüşü - parad oldu. Hərbi orkestrin ifa etdiyi marşın sədaları altında əsgərlər Azərbaycanın böyük dövlət bayrağını meydana gətirdilər. Motosikletçilər Federasiyası və Fövqəladə Hallar Nazirliyi nümayəndələrinin çıxışı çox maraqlı oldu. Onlar idman motosiklet texnikasının burada nümayiş etdirilən müxtəlif növləri ilə çox çevik hərəkət edirdilər. Motosikletlərdə, kartinqlərdə və kvadrosikllərdə göstərilən tryuklar, dalğalar, virajlar tamaşaçıları heyran qoydu.

Bayramın iştirakçıları Sumqayıtın idman qəhrəmanlarını gurultulu alqışlarla qarşıladılar. Dünya və Avropa çempionatlarının mükafatlarına layiq görülmüş 100-dən çox idmançı meydandan keçdi. İki dəfə paralimpiya çempionu olmuş "Şöhrət" ordenli İlham Zəkiyev, olimpiya mükafatçıları Fuad Aslanov və Şahin İmranov, dünya və Avropa çempionu Niyaməddin Paşayev və digərləri Azərbaycan idmanının şöhrətini artırmışlar.

Bayram yürüşündə qonaqlar - Sankt-Peterburqdan gəlmiş təbilçilər qrupu, Türkiyənin "Mehtep" qrupu, Dağıstanın "Ləzginka" xalq kollektivi, Qaxın "Şvidkatsa" xor kollektivi, İsmayıllı rayonunun İvanovka kəndinin folklor qrupu, Qusarın "Ləzginka" rəqs qrupu, Lənkəranın "Bacılar" folklor qrupu, Salyan rayonunun "Cəngi" xalq kollektivi, Şamaxının "Şirvan" nəfəsli alətlər ansamblı, Şəkinin "Zorxana" rəqs qrupu, Masallının "Halay" folklor qrupu da iştirak etdilər. Raritet avtomobillərin paradı oldu. Aeromenlər və böyük kuklalar uşaqların diqqətini cəlb edirdi.

"Şahin" respublika hərbi idman oyununun qalibləri olmuş məktəblilərdən, habelə şəhərin orta məktəblərinin şagirdlərindən və məktəbəqədər tərbiyə müəssisələrinin yetirmələrindən ibarət dəstələr son dərəcə gözəl görünürdü.

Bayram kütləviliyi və al-əlvanlığı ilə adamı valeh edirdi. Bütün bayram ərzində meydanın üzərində səmada ümummilli lider Heydər Əliyevin portretinin təsviri olan böyük aerostat dalğalanırdı və o, Azərbaycanın ən yeni tarixində liderin misilsiz xidmətlərini xatırladırdı.

Buradakı 100 manqalda bişirilən ətirli kabablardan bayrama gələnlərin hamısı daddı.

Axşam meydanda quraşdırılmış böyük səhnədə respublikanın və xaricdən gəlmiş incəsənət ustalarının bayram konserti oldu. Konsert "Azərbaycan Televiziya və Radio" QSC ilə canlı yayımlandı. "Şəhər günü" Sumqayıtın gecə səmasını bəzəyən son dərəcə gözəl atəşfəşanlıqla başa çatdı.

... Sumqayıt dinamik inkişaf edən bir şəhərdir. Hər gün özü ilə bu şəhərə yeni, mütərəqqi dəyişikliklər gətirir. Ötəri bir baxışla da hiss olunur ki, abadlıq, inkişaf hər hansı bir ayrıca sahədə getmir, məhz çoxcəhətli xarakterə malikdir. Sənaye, digər profilli istehsal müəssisələri, sosial sfera, infrastruktur və digər sahələrdə sürətli tərəqqi paralel şəkildə özünü göstərərək bir-birini tamamlayır. Elə bu da Sumqayıtın inkişafında hərtərəfli modernləşmənin təmin olunmasında əsas rollardan birini oynayır.

Təhsil, səhiyyə, mədəniyyət sahələrində islahatların aparılması, xidmət səviyyəsinin yüksəldilməsi də əhali tərəfindən məmnunluqla qarşılanır. Bu ildən futbol üzrə Premyer Liqada Sumqayıt da təmsil olunmağa başlayıb. Şəhər stadionunun əsaslı təmiri və yenidənqurulması məsələsi də artıq gündəmdədir. Özü də bu stadionun ölkədə ən yaxşı idman mərkəzlərindən birinə çevrilməsi hədəf götürülüb. Prezident İlham Əliyevin açılışında iştirak etdiyi 1 saylı UGİM-in dünya standartları səviyyəsində yaradılması stadionun da qeyri-adi dərəcədə gözəl olacağına inamı artırır.

Sumqayıtda dini-mənəvi dəyərlərə də hörmətlə yanaşılır. Azərbaycanın tolerantlıq ənənələri burada ciddi qorunur. Şəhərin dindarları məscidin yenidən qurulması üçün ölkə başçısına müraciət etmişdilər. Azərbaycan Prezidentinin tapşırığına əsasən, Sumqayıt Cümə Məscidində əsaslı təmir işlərinə başlanıb. Məscidin yanında 26 metrlik minarənin ucaldılması üçün qazma işləri sona yetib. Minarənin ucaldılması ilə yanaşı, məscidin binasında da yenidənqurma aparılır. Çox keçməyəcək ki, bu müqəddəs ünvan da Sumqayıtın gözəl memarlıq abidələri sırasına qatılacaq.

Sumqayıtlılar hazırda "Şəhər günü"nün xoş təəssüratlarını yaşayırlar. Bu bayram indən belə ənənə halını alacaq. İlbəil daha da maraqlı və cəlbedici olacaq. Güzəran yaxşılaşdıqca, həyat gözəlləşdikcə bayramlar da həvəslə qeyd edilir.

...Bu yaxınlarda dünyasını dəyişmiş istedadlı şair Tofiq Məmməd Sumqayıtın tanınmış ziyalılarından idi. Gözəl şeirlərində taleyini Sumqayıtla bağlayan bütün sakinlərin qəlbindən keçən duyğuları ifadə edirdi:

Məndən hünər istə, məndən iş istə,

Gör nələr, gör nələr yaratmışam mən.

Sumqayıt böyüyüb əllərim üstdə,

Onunla birlikdə boy atmışam mən.

İnanırıq ki, Sumqayıtın bugünkü tərəqqisində zəhməti olanların da beləcə öyünməyə mənəvi haqqı olacaqdır.

Əli NƏCƏFXANLI

Xalq qəzeti.- 2011.- 18 sentyabr.- S. 5.