"Turizmə dəstək" Gənclər Koalisiyasının yeni uğurları

2011-ci ilin "Turizm ili" elan olunması ilə əlaqədar dünən "Avropa" otelinin "Bakı" zalında Mədəniyyət və Turizm Nazirliyinin təşkilati dəstəyi ilə "Turizmə dəstək" Gənclər Koalisiyası "Ölkəm mənim" adlı musiqili layihəsinin və yeni web-saytının təqdimatını keçirdi.

"Turizmə dəstək" Gənclər Koalisiyası Mədəniyyət və Turizm Nazirliyinin təşkilati dəstəyi ilə 2011-ci ilin fevralında təsis edilmişdir. Turizmin inkişafına dəstək göstərmək məqsədilə proqram layihələri həyata keçirməyi planlaşdıran koalisiyanın yaradılması həm də ölkə Prezidenti İlham Əliyevin təşəbbüsünə dəstək oldu. Əsas məqsəd ayrı-ayrı dövlət, qeyri-hökumət və gənclər təşkilatlarına KİV-ləri, turizm şirkətlərini, ümumiyyətlə, müvafiq təsir imkanları olan hüquqi və fiziki şəxsləri cəlb etmək, əhali arasında maarifləndirmə tədbirləri və aksiyaları təşkil etmək, eləcə də ölkəmizin turizm potensialının üzə çıxmasına kömək olmaqdır.

Mədəniyyət və Turizm Nazirliyinin təşkilati dəstəyi, "Azpetrol" və "Mətanət A" şirkətlərinin, "Atlant" İstirahət və Turizm Mərkəzinin maliyyə dəstəyi ilə ərsəyə gələn "Ölkəm mənim" layihəsinin təşkilatçıları daxili turizmin inkişaf etdirilməsini, bu sahədə qazanılan uğurları, mədəniyyət və incəsənəti təbliğ etmək məqsədilə müvafiq klip çəkilişlərini həyata keçirərək ictimaiyyətə təqdim etdilər.

Layihənin rəhbəri "Turizmə dəstək" Gənclər Koalisiyasının baş koordinatoru Ramiz Alıyevdir. Klipin musiqisi Fidan Süleymanovaya, sözləri Həbib Azəriyə və Fuad Zəngəzura, aranjimanı isə Vüqar Camalzadəyə məxsusdur.

Maraqla qarşılanan musiqi layihəsində Nadir Qafarzadə, Bahar Lətifqızı, Rəşad İlyasov, Sevda Yəhyayeva, Fidan Süleymanova, Babək Niftəliyev, Yaşar Yusub, Malik Həsənov və Aysel İbrahimova iştirak edirdilər.

Tədbirdə Milli Məclisin deputatı Etibar Hüseynov, "Atlant" İstirahət və Turizm Mərkəzinin direktoru Tahir Qədəşov, "Mətanət A" şirkətindən Fuad Qafarlı və "Azpetrol" şirkətinin nümayəndəsi İlqar Əliyev çıxış edərək 2011-ci ilin "Turizm ili" elan olunmasının turizmin inkişafına verdiyi töhfələrdən, koalisiyanın həyata keçirdiyi tədbirlərdən danışaraq təqdim olunan yeni layihə və web-saytın açılışı münasibəti ilə bu sahədə əməyi olanları təbrik etdilər, onlara yeni-yeni uğurlar arzuladılar.

Tədbirdə dövlət və hökumət rəsmiləri, Milli Məclisin üzvləri, turizm mütəxəssisləri, turizm şirkətlərinin və gənclər təşkilatlarının rəhbərləri, QHT-lərin təmsilçiləri, turizm təhsili alan tələbələr və müvafiq qurumların nümayəndələri iştirak edirdilər.

Aida ŞÜKÜRLÜ

Xalq qəzeti.- 2011.- 20 sentyabr.- S. 10.