Azərbaycan Turizm İnstitutunda Ümumdünya Turizm Günü qeyd edilmişdir

Azərbaycan Turizm İnstitutunda Ümumdünya Turizm Günü münasibətilə geniş proqramlı tədbir keçirildi. İnstitutun turzmin təşkili və idarə edilməsi fakültəsinin dekanı, fizika-riyaziyyat elmləri namizədi, dosent Nəsir Nəsirli tədbirə toplaşanları bayram münasibətilə təbrik etdi və sonra bütün dünyada qeyd edilən günün tarixindən söz açdı.

Bildirildi ki, 1925-ci ildən bəri müxtəlif adlar altında Cenevrədə fəaliyyyət göstərən turizm təşkilatı 1970-ci il sentyabr ayının 27-də Ümumdünya Turizm Təşkilatı kimi beynəlxalq miqyaslı struktur şəklində formalaşmışdır. 1979-cu ildən baş qərargahı Madrid şəhərinə köçən təşkilat sentyabrın 27-si tarixini Ümumdünya Turizm Günü kimi təsis etmişdir. O vaxtdan etibarən 32 ildir ki, dünyanın bir çox ölkələrində bu gün əsl turizm bayramı kimi böyük təntənə ilə keçirilir.

Çıxışının sonunda Nəsir müəllim dedi: "Bizlər isə bu bayramı daha bir əlamətdar hadisə ilə, Azərbaycanda elan edilən "Turizm ili" çərçivəsində qeyd edirik. Bu il institutumuz beynəlxalq əməkdaşlığın genişləndirilməsi çərçivəsində Dünya Turizm Təşkilatına assosiativ üzv qəbul olunmuşdur".

Bayram tədbirində ATİ-nin kafedra müdiri, tarix elmləri namizədi Bahadur Bilalov çıxış edərək, Azərbaycanın turizm potensialı, iqtisadiyyatı, bu prioritet sahənin perspektivlərindən danışdı. Ölkəmizin turizm ixtisaslı kadrlara tələbatı olduğunu xüsusi vurğuladı. Turizmi təkcə gözəllik deyil, mədəniyyət prizmasından dəyərləndirdi.

Birləşmiş Millətlər Təşkilatı İctimai İnformasiya Departamentinin Azərbaycandakı nümayəndəsi Envira Selimoviç Ümumdünya Turizm Günü münasibətilə tədbir iştirakçılarını təmsil etdiyi qurumun adından təbrik etdi, yeni uğurlar arzuladı.

Ümumdünya Turizm Gününə həsr olunmuş tədbir böyük konsert proqramı ilə başa çatdı. Tədbir iştirakçıları həmçinin tələbə-fotoqrafların Azərbaycan turizminin inkişafını əks etdirən və bütün gün ərzində sərgilənən fotolarına baxdılar.

Z. BƏŞİRQIZI

Xalq qəzeti.- 2011.- 29 sentyabr.- S. 7.