C.Məmmədquluzadənin Ev-Muzeyində açıq qapı günü

"Azərbaycanda - 2011-ci il turizm ili" çərçivəsində ölkəmizdə davam edən mədəni-kütləvi tədbirlərə Cəlil Məmmədquluzadənin Ev Muzeyi də qoşulmuşdur.

İlk tədbir olaraq "Turizm - mədəniyyətləri birləşdirən körpü" devizi ilə açıq qapı günü keçirildi. Gün ərzində Bakı ictimaiyyətinin nümayəndələri və şəhərimizin qonaqları muzeyin fəaliyyəti, görkəmli ədib və ictimai xadim Cəlil Məmmədquluzadənin həyat və yaradıcılığı, onun rəhbərlik etdiyi "mollanəsrəddinçi" hərəkatın ədəbi-mədəni irsi ilə yaxından danış oldular.

Muzeyin nəzdində fəaliyyət göstərən "Gənc turistlər" dərnəyinin 45 saylı orta məktəbin şagirdləri ilə birlikdə keçirdiyi tədbirdə mədəni dəyərlərin təbliğində turizmin rolu, bu yöndə muzeylərin səmərəli fəaliyyəti diqqət mərkəzində oldu.

Muzeyin direktoru Pəri Mahmudova bildirdi ki, son illərdə müstəqil ölkəmizdə turizm hərəkatı sürətlə inkişaf edir. Azərbaycandakı siyasi sabitlik, sosial-iqtisadi yüksəliş, mədəni tərəqqi əcnəbi turistlərin ölkəmizə marağını artırmışdır. Turizmi gəlirli sahəyə çevirmək, onu Azərbaycanın zəngin təbii və mədəni potensialının tanıdılması işinə yönəltmək üçün dövlət səviyyəsində məqsədyönlü tədbirlər, proqramlar həyata keçirilir. Bu sahədə muzeylər də öz imkanlarını hərəkətə gətirir, əcnəbi qonaqların maraqlarını önə çəkirlər. Şərqdə böyük demokrat, istedadlı ədib və publisist kimi tanınmış Cəlil Məmmədquluzadənin həyat və yaradıcılığı müxtəlif ölkələrdən gələn turistlərin diqqətini çəkir. Onun sərhəd tanımayan humanist görüşləri, ictimai idealı turistləri heyran qoyur, unudulmaz təəssürat yaradır. Buna görə də muzey daim ekspozisiyasını zənginləşdirir, yeni məzmunlu təqdimatlar hazırlayır.

Muzeyin böyük elmi işçisi Yeganə Məmmədova Cəlil Məmmədquluzadə irsinin turizm hərəkatına verə biləcəyi töhfədən söz açdı, nəzərdə tutulan işlər barədə məlumat verdi.

Din Tarixi Muzeyinin direktoru Münəvvər Babayeva "Bakı şəhərinin dini abidələri" mövzusunda geniş söhbət açdı. Şagirdlər Cəlil Məmmədquluzadənin həyat və yaradıcılığı haqqında onları maraqlandıran bir sıra sualın cavabını muzeyin elmi əməkdaşı Fazilə Hümbətovanın ekspozisiya üzrə apardığı ekskursiya zamanı tapdılar.

Sonra uşaqlarla öyrəndikləri ətrafında sorğular keçirildi. 45 saylı orta məktəbin 8-ci sinif şagirdi Pərviz Bayramov cavabları ilə fərqləndi.

Açıq qapı günündə ev-muzeyinin fondlarından hazırlanmış "Cəlil Məmmədquluzadə - Molla Nəsrəddin" sənədli-səyyar sərgisi və "Salnamə" studiyasının çəkdiyi "Mirzə Cəlil ocağı" sənədli filmi nümayiş olundu. Film ulu öndər Heydər Əliyevin Cəlil Məmmədquluzadənin ev-muzeyinin açılışında iştirak etməsinə həsr edilmişdir.

Muzeyin turizm ili ilə bağlı silsilə tədbirləri davam edir.

Turanə RÜSTƏMLİ,

muzeyin əməkdaşı

Xalq qəzeti.- 2011.- 29 sentyabr.- S. 7.