Gənclər Azərbaycan həqiqətlərinin dünyaya çatdırılmasında fəaldırlar

Dünyanın hansı nöqtəsində yaşamalarından asılı olmayaraq, soydaşlarımızın qazandığı hər bir uğur həm də Azərbaycanın uğurudur. Azərbaycandan kənarda yaşayan həmvətənlərimiz elm, təhsil və digər sahələrdə çalışmaqla yanaşı, həm də olduqları ölkədə diaspor işində fəallıq göstərirlər. Bu yaxınlarda redaksiyamızın qonağı olmuş, hazırda Almaniyada Frankfurt Sülh Araşdırmaları İnstitutunun əməkdaşı, siyasi elmlər doktoru Azər Babayev də belələrindəndir.

Onunla söhbətimiz Dünya Azərbaycanlılarının Həmrəylik Günü ərəfəsində Almaniyadakı elmi fəaliyyəti, soydaşlarımızın Vətəndən uzaqda təşkilatlanması, diasporumuzun bu günü və gənclərimizin diaspor quruculuğundaki fəaliyyəti barədə oldu.

O, 2001-ci ildə Bakı Dövlət Universitetinin beynəlxalq münasibətlər fakültəsini bitirdikdən sonra təhsilini Almaniyada davam etdirib. Ayxstet İnqolştat Universitetində magistr təhsili alıb. Mannhaym Universitetində doktorluq müdafiə edərək elmi dərəcə alması onun növbəti uğurlarındandır.

Azər Babayevin sözlərinə görə, Almaniyanın müxtəlif bölgələrində yaşayan soydaşlarımızın təşkilatlanması və cəmiyyətə inteqrasiyası uğurla davam edir. Almaniya Azərbaycanlılarının Koordinasiya Mərkəzində cəmləşən diaspor təşkilatlarımız həmvətənlərimizin birgə fəaliyyətində, ölkəmizdə müxtəlif sahələrdə baş verən mühüm yenilikləri, xüsusilə də Ermənistan-Azərbaycan münaqişəsinin tarixi kökləri, Qarabağ həqiqətləri barədə bilgilərin Almaniya cəmiyyətinə çatdırılmasında fəallıq göstərirlər. Bu işdə həmçinin Azər Babayevin Avropanın nüfuzlu dərgilərində; "Şərqi Avropa", " Oriental", Adanauer Fondunun dərc etdiyi nəşrlərdə və s əcnəbi dillərdə işıq üzü görən elmi məqalələri oxucular münaqişə barədə obyektiv informasiya verir.

"Elmi məqalələrimin çoxu dünyada baş verən bir sıra müharibə və münaqişələrin təhlili ilə bağlıdır. Bunlar arasında Qarabağ münaqişəsi və onun həlli yolları, ölkəmizin müəyyən ərazilərinin işğal altında qalması faktoru, Azərbaycanın münaqişənin həllində tutduğu konstruktiv mövqedən bəhs edən məqalələr xüsusi yer tutur. Çalışıram ki, bu yazılarla Avropa ictimaiyyəti münaqişə barədə həqiqətlərdən daha ətraflı xəbərdar olsun. Qarabağ həqiqətləri ilə bağlı mühazirələrdən sonra əcnəbi ziyalıların daha çox şey öyrəndiyini hiss edirəm. Məqsədimiz ölkə həqiqətlərinin dünyaya daha dolğun çatdırılmasına nail olmaqdır."

- deyə həmsöhbətim əlavə etdi. Onun sözlərinə görə İKT Gənclər Forumunun Mədəniyyətlərarası Dialoq üzrə əlaqələndiricisi Leyla Əliyevanın rəhbərlik etdiyi və müxtəlif ölkələrdə uğurla davam edən "Xocalıya ədalət" kampaniyası Qarabağ həqiqətlərini beynəlxalq ictimaiyyətə çatdırmaq baxımından öz səmərəsini verməkdədir. Azər Babayev gənclərimizin Almaniyadakı fəaliyyətlərindən söhbət açdı. Onların bir çoxu burda müxtəlif sahələrdə, xüsusilə də tibb sahəsində təhsil alır, hərtərəfli peşəkar kadr kimi yetişirlər. Bu gənclərin Vətəndən uzaqda təşkilatlanması, cəmiyyətə inteqrasiyası, milli-mənəvi dəyərlərimizi, bayram adətlərimizi qoruyub saxlaması isə onların əsasən vahid bir birlikdə toplanması sayəsində mümkün olur. " Almaniyada 2008-ci ildə qeydiyyatdan keçmiş Azərbaycanlı tələbələrin və elm adamlarının birliyi bu işdə əlindən gələni edir. Mən eyni zamanda bu təşkilatda regional koordinator kimi fəaliyyət göstərirəm. Gənclərimiz ölkəmizi öz qabiliyyəti, fəaliyyəti və çıxışları ilə təmsil edirlər."

2010-cu il xaricdə yaşayan və fəaliyyət göstərən soydaşlarımızın, xüsusilə də gənclərin həyatında mühüm tədbirlərlə yadda qaldı. Bunlardan ən diqqətçəkəni isə Frankfurt şəhərində keçirilmiş, Azər Babayevin də iştirak etdiyi Dünya Azərbaycanlı Gənclərinin Birinci Forumu oldu. Onun sözlərinə görə, fəal gənclərin toplaşdığı bu mühüm tədbir gənclərin müxtəlif aspektlərdə fikir mübadiləsinin aparılması, gənclərin diaspor quruculuğu sahəsində fəallığının artırılması və təkliflərlə yadda qaldı. O, qeyd etdi ki, belə görüşlər gənclərimizin təşkilatlanmasında və qarşılıqlı əməkdaşlığında vacib rol oynayır.

Gələn il isə dünyanın müxtəlif bölgələrində yaşayan soydaşlarımız Dünya Azərbaycanlılarının Üçüncü qurultayında iştirak etmək üçün Bakıya toplaşacaq. Azər Babayev ümid edir ki, bu qurultay da həmvətənlərimizin fikir mübadiləsində, qarşılıqlı əməkdaşlığı sahəsində və qarşıdakı illər ərzində görüləcək işlərin müəyyən edilməsi baxımından öz töhfəsini verəcək.

İlin son günü- 31 Dekabr bütün azərbaycanlılar üçün ikiqat əlamətdar bayramdır. Həmin gün Dünya Azərbaycanlılarının Həmrəylik Günü soydaşlarımızın məskunlaşdıqları hər yerdə, eləcə də Almaniyada qeyd edilir. Həmsöhbətim bu bayramla bağlı təəssüratlarını da bölüşdü: "Həmrəylik günü bizim üçün ən önəmli günlərdən biridir. Bugün artıq Azərbaycan müstəqil bir ölkədir. Harada olsaq da, həmrəylik günü soydaşlarımız arasında müxtəlif səviyyələrdə qeyd edilir. Almaniyada da diaspor nümayəndələrimiz bu günü xüsusi qeyd edirlər. Arzum budur ki, bu həmrəylik təkcə tədbirlərlə kifayətlənməsin. İlin bütün günlərində hər kəs Vətəndə və ondan uzaqlarda yaşamasından asılı olmayaraq, həmrəy olmağa can atsın, milli mənəvi dəyərlər, Vətən təəssübkeşliyi və milli ideyalar ətrafında birləşib xalq və dövlətçiliyimizin inkişafı üçün daha səmərəli işlər görsün."

Biz də xaricdə fəaliyyət göstərən həmsöhbətimizin arzularına qoşulur, dünya azərbaycanlılarını həmrəylik günü münasibətilə təbrik edirik. Qoy 2011-ci ildə soydaşlarımız harda yaşamalarından asılı olmayaraq, daha böyük uğurlar qazansınlar.

Əfsanə BAYRAMQIZI

Xalq qəzeti.- 2011.- 1 yanvar.- S. 5.