"Jurnalistlərin dostu" mükafatı mətbuata qayğıya, 2010-cu ildə qazanılmış uğurlara və gərgin zəhmətə verilən obyektiv qiymətdir

Jurnalistika çətin sənətdir. Bunu etiraf etmək lazımdır, asan sənət deyildir. Jurnalist gərək daim cəmiyyətlə əlaqədə olsun, insanlarla əlaqədə olsun, cəmiyyətin müxtəlif təbəqələri ilə əlaqədə olsun və müxtəlif yerlərlə təmasda olsun ki, istədiyi məlumatları ala bilsin və onların əsasında istədiyi sahədə öz məqalələrini, öz əsərlərini yaza bilsin. Bu asan iş deyildir. Mən bunu bilirəm və öz fikrimi başqalarına da bildirmək istəyirəm. Ona görə də gərək biz jurnalistlərə kömək edək.

Heydər ƏLİYEV,

Ümummilli lider

Hələ eramızdan əvvəl yaşamış siyasətçilər müdrikliklə yazırdılar ki, güclü ordu, zəngin xəzinə və sədaqətli saray adamları dövlətin qüdrətini artıran əsas amillərdir. Ancaq dövləti qüdrətli, dövlət başçısını nüfuzlu edən ən əsas amil xalqın dövlətə və dövlət başçısına olan inamı, etimadıdır. Qədim romalılar etiraf edirdilər ki, dövlət başçısının qazana biləcəyi ən dəyərli sərvət məhz xalqın inamıdır. İncədən də incə olan bu həqiqəti biz kitablardan oxumuşduq. Ancaq sonralar həyatda da həmin məqamların şahidinə çevrildik.

Azərbaycan ötən əsrin 90-cı illərində öz dövlət müstəqilliyini bərpa edəndən sonra ölkəyə rəhbərlik edən şəxslərin xalqın inam və etimadından məhrum olmasının acı nəticələrinin şahidinə çevrildikcə 1993-cü ilin yayından sonra xalqın öz liderinə sevgi və sayğısının yaratdığı xarüqələrin məmnunluğunu yaşadıq. Ölkənin ilk prezidenti qüdrətli sovet güc strukturlarının verdiyi imkanlara arxayın olsa da, xalqın inamını qazana bilmədiyinə görə çıxış yolunu qaçmaqda gördü. Onu əvəz eləmiş, hakimiyyətə tankla, topla gəlmiş AXC-Müsavat iqtidarı da xalqın dövlətə inamını bərpa edə bilmədiyinə görə ölkəmizin şəhər və rayonlarının işğalının qarşısını ala bilmədi və əksinə, ölkə daxilində qardaş qanının tökülməsinə rəvac verildi. Ulu öndər Heydər Əliyevin siyasi hakimiyyətə qayıdışından sonra isə xalqla dövlət arasındakı uçurum yox edildi, ölkə əhalisi müstəqil Azərbaycan dövlətinin ən qüdrətli dayağına, dəstəyinə çevrildi. Bu gün - Heydər Əliyev siyasi kursunun böyük uğur və nailiyyətlərlə davam etdirildiyi dövrdə isə Azərbaycan dövləti öz xalqının, Azərbaycan xalqı öz dövlətinin misilsiz himayədarı kimi çıxış edir. Bunu Prezident İlham Əliyevin yeritdiyi sosial siyasətlə əlaqələndirənlər də tamamilə haqlıdırlar. Onların fikrincə ölkənin bütün regionlarının bərabər şəkildə inkişaf etdirilməsi, bütün vətəndaşlara yaşamaq, işləmək, siyasi, elmi, texniki, bədii yaradıcılıqla məşğul olmaq üçün bərabər şəraitin yaradılması, özəl bölmənin qarşısında yaşıl işıq yandırılması, söz, mətbuat azadlığının yüksək səviyyədə təmin edilməsi, istənilən seçkinin özündən əvvəlki seçkiyə nisbətən daha ədalətli və şəffaf keçirilməsi, təhsil, səhiyyə, mədəniyyət, idman sahələrində görünməmiş uğurların əldə edilməsi və digər amillər xalqın dövlətə və dövlət başçısına olan inamını gündən-günə artırır.

Ancaq bir çox ekspertlər məsələyə bir qədər fərqli prizmadan yanaşırlar. Onların fikrincə bu inamın təməlində Prezident İlham Əliyevin həyata keçirdiyi konkret tədbirlər və ya reallaşdırılan proqramlardan öncə dövlət başçısının şəxsi keyfiyyətləri, liderlik xarizması dayanır. 2003-cü ilin payızından ötən dövr sübut etdi ki, İlham Əliyev təkcə nüfuzlu siyasətçi və ya möhtəşəm idarəetmə qabiliyyətinə malik dövlət başçısı deyil, həm də qüdrətli bir liderdir. Onun liderlik keyfiyyətləri özünü Milli Olimpiya Komitəsinin prezidenti, Dövlət Neft Şirkətinin birinci vitse-prezidenti və ölkənin Baş naziri olduğu illərdə aydın şəkildə göstərmişdi. Dövlət başçısı seçiləndən sonra Azərbaycan Prezidentinin həmin liderlik məharətini bütün dünya da gördü və etiraf etdi. Xüsusən, Prezident İlham Əliyevin həyata keçirdiyi tədbirlər, atdığı addımlar onu regionun lider siyasətçisinə çevirdi. Bütün bunlar 2010-cu ildə daha geniş miqyasda dünya ictimaiyyəti qarşısında canlandı. Təsadüfi deyil ki, politoloq və ekspertlər Azərbaycanın 2010-cu ildə əldə etdiyi uğurlar barədə söz açarkən dövlət başçımızın "Jurnalistlərin dostu" mükafatına layiq görülməsini də xüsusi vurğulayırlar.

Xüsusi qeyd edilməli məqamlardan biri də odur ki, Avropada və dünyanın inkişaf etmiş bir çox ölkələrində siyasətçilərin nüfuzunu onun mətbuata münasibəti ilə müəyyən edirlər. Əksər sorğu mərkəzləri dövlət başçılarının reytinqini öyrənmək məqsədilə respondentlərə ünvanladığı suallar sırasında kütləvi informasiya vasitələrinə münasibət məsələsini də önə çəkirlər. Mətbuat vasitələrinə fəaliyyət sərbəstliyi verilməyən ölkədə dövlət başçısının reytinqi həmişə aşağı olub. Azərbaycanda isə nəinki dövlət başçısının reytinqi ildən-ilə yüksəlir, üstəlik, o, 2010-cu ilin yekunlarına görə "Jurnalistlərin dostu" mükafatına layiq görülmüşdür. Qalibi müəyyən etmək üçün ötən il dekabrın 1-dən 20-dək keçirilən sorğuda rəyi soruşulanların 81 faizi bu nominasiyaya məhz Prezident İlham Əliyevin layiq olduğunu bildirib. Nəyə görə?

Həmin sualın cavabını "RUH" Azərbaycan Jurnalistləri Müdafiə Komitəsi idarə heyətinin üzvü, Mətbuat Şurasının sədri Əflatun Amaşov dekabrın 29-da "Gülüstan" sarayında mükafatın Prezident İlham Əliyevə təqdim edilməsi mərasimindəki çıxışında vermişdi: "2010-cu ildə jurnalistikamızın həyatı əlamətdar hadisələrlə zəngin olub. Cənab Prezident, mətbuatımızın 135 illik yubileyi münasibətiylə imzaladığınız sərəncama əsasən Bakıda və bölgələrdə çoxsaylı tədbirlər keçirilmişdir. Təqribən 40 KİV-in hər birinə birdəfəlik yardımlar edilib ki, bunun da ümumi məbləği 1 milyon manata yaxındır. Dövlətimizin başçısının sərəncamları ilə 100-dən çox media təmsilçisi "Əməkdar jurnalist", "Əməkdar mədəniyyət işçisi" fəxri adlarına layiq görülmüş, "Tərəqqi" medalı ilə təltif edilmişdir. İki məsələnin üstündə xüsusilə dayanmaq istərdim. Azərbaycan Mətbuat Şurası müasir tələblərə cavab verən inzibati bina ilə təmin edilmişdir. Jurnalistlərimizin mənzil-məişət şəraitinin yaxşılaşdırılması məqsədi ilə Prezident sərəncam imzalamışdır. Bunun sayəsində çoxsaylı media təmsilçiləri yeni mənzillərlə təmin olunacaqlar. Təbiidir ki, bütün bunlar 2010-cu ilin qalibinin seçiminə təsirsiz ötüşə bilməzdi".

Mükafatın təqdimetmə mərasimində geniş nitqlə çıxış edən Prezident İlham Əliyevin söylədiyi bütün fikirlər ölkə ictimaiyyəti, xüsusən, mətbuat təmsilçiləri tərəfindən böyük maraq və minnətdarlıqla qarşılandı. Ancaq dövlət başçımızın səsləndirdiyi iki məqamı xüsusilə qeyd etmək zərurəti var. Birinci məqam mətbuat işçilərinin mənzil-məişət şəraitinin yaxşılaşdırılması istiqamətində atılan addımlarla bağlı idi: "Bu il imzaladığım sərəncam və Prezidentin Ehtiyat Fondundan ayrılmış vəsait sadəcə olaraq birinci addımdır. Mən bu gün demək istəyirəm ki, bununla biz işimizi bitmiş hesab etmirik. Gələcəkdə buna bənzər addımlar atılacaq və yenə də deyirəm, tamamilə təmənnasız atılacaqdır". Dövlət başçısı jurnalistlərin problemlərinin təmənnasız olaraq daim diqqət mərkəzində olacağını söyləyir: "Bir daha demək istəyirəm ki, aldığım bu mükafatdan asılı olmayaraq, mən bundan sonra da çalışacağam ki, Azərbaycanda bu sahədə daha da böyük addımlar atılsın... Ölkədə müasir jurnalistikanın formalaşması işində Azərbaycan dövləti və Prezident kimi mən səylərimi əsirgəməyəcəyəm".

Beləliklə, ölkədə cəmiyyət həyatının bütün sahələrində müasirləşməyə, yeniliyə, tərəqqiyə yollar açan Prezident İlham Əliyev qarşıya başqa bir vəzifə də qoyur: Müasir jurnalistikanın formalaşdırılması. Əminik ki, son 7 ildə irəli sürülən bütün ideyalar, təsdiq olunan proqramlar kimi bu məsələ də öz müsbət həllini tapacaq. Təbii ki, hamının, xüsusən, biz mətbuat işçilərinin fəal iştirakı ilə.

İttifaq MİRZƏBƏYLİ

Xalq qəzeti.- 2011.- 7 yanvar.- S. 2.