2010-cu ildə ölkədə turizmin inkişafı diqqət mərkəzində olmuşdur

Məlumdur ki, son illər Azərbaycanda turizm sahəsi inkişafımızın prioritet sahələrindən birinə çevrilmişdir. Buna Azərbaycanın gözəl təbiəti, qədim tarixi və mədəniyyət abidələrimiz, zəngin mədəni irsimiz imkan verir.

Ötən il turizm sektoru üçün ilk növbədə 2010-cu il 6 aprel tarixində "Azərbaycan Respublikasında 2010-2014-cü illərdə turizmin inkişafına dair Dövlət Proqramı"nın qəbul olunması ilə yadda qaldı. Hədəfi Azərbaycanda turizm infrastrukturunun genişləndirilməsi, turizm sahəsində xidmət səviyyəsinin yaxşılaşdırılması, ölkə turizminin dünya turizm bazarına inteqrasiyası və bu yöndə təbliğat, təşviqat işlərinin aparılması, turizm sahəsində çalışan mütəxəssislərin peşə hazırlığı səviyyəsinin artırılması və s. aktual vəzifələr olan Dövlət Proqramına müvafiq olaraq il ərzində bir sıra tədbirlər görülüb.

Ən yaddaqalan tədbirlərdən biri isə aprelin 28-30-da Heydər Əliyev adına İdman-Konsert Kompleksində təşkil edilən "AİTF" 9-cu Azərbaycan Beynəlxalq Turizm və Səyahətlər Sərgisi və ilk dəfə keçirilən 1-ci Ümumrespublika Daxili Turizm Sərgisi oldu. Daxili sərgidə Azərbaycanın bölgələr üzrə 15 şəhəri xüsusi stenddə təqdim olundu. Burada hər bölgənin tarixi-mədəni abidələri, adət-ənənələri, mətbəxi, turizm üçün cəlbedici yerləri, təbii mənzərələri və s. əksini tapmışdı. Ölkəmizin turizm potensialı dünyada layiqincə təqdim olundu. Dövlət Proqramına uyğun olaraq Mədəniyyət və Turizm Nazirliyinin həyata keçirdiyi işlərdən biri də "Azərbaycanda yeni marşrutları kəşf edək" layihəsi oldu. Bu layihə çərçivəsində turizm şirkətlərinin köməyi ilə bir neçə turizm marşrutu yaradıldı və təqdim edildi. Şəki Atçılıq Mərkəzi ilə birlikdə Şəki və Şəki ətrafında bir günlük atla turizm marşrutunun təqdimatı məqsədilə infotur təşkil edildi. Digər yeni marşrut isə ekstremal turizm həvəskarları üçün xüsusilə maraqlı oldu. Marşrut Quba rayonundan başlayaraq sərt dağlıq ərazilərdən keçməklə Şamaxıya, oradan isə Bakıyadək yolu əhatə edir.

Azərbaycanın turizm potensialının dünyada təbliği yönündə də geniş tədbirlər həyata keçirilib. Azərbaycan il ərzində müxtəlif ölkələrdə keçirilən 13 beynəlxalq sərgidə təmsil olunub.

Bu gün Azərbaycanın mövcud turizm potensialının təbliğ edilməsi məqsədi ilə dünyanın aparıcı televiziya kanallarında - "CNN", "Euronews", "Travel Channel", "BBC", "CNBC", "National Geographic" və s. verilişlər yayımlanır. "ABTA" jurnalında, "Upper Reach" və "Forbes" qəzetlərində respublikanın turizm imkanları haqqında reklam səhifələri yerləşdirilib.

Nazirliyin mətbuat xidmətindən aldığımız məlumata görə il ərzində 38 hüquqi və fiziki şəxsə turizm fəaliyyətinə dair lisenziya, 21 hüquqi və fiziki şəxsə mehmanxana fəaliyyəti ilə məşğul olmaq üçün lisenziya verilib. Hazırda respublikada 207 turizm şirkəti, 295 mehmanxana və mehmanxana tipli obyekt fəaliyyət göstərir.

Bu yaxınlarda mədəniyyət və turizm naziri Əbülfəs Qarayev turizmin inkişafı ilə bağlı jurnalistlərə verdiyi açıqlamada bildirmişdir ki, "Şahdağ" Qış-Yay Turizm Kompleksinin tikintisi davam edir. Bu qışın sonuna kimi süni qarlaşdırma sisteminin tamamlanması nəzərdə tutulur. Yay müddətində isə artıq ilk mehmanxana istifadəyə veriləcək. Nazir onu da bildirmişdir ki, eksperiment olaraq vəziyyətə baxılacaq. Gələn il qış üçün artıq ilk turistlər orada öz vaxtlarını keçirə biləcəklər. Bu, "Şahdağ" Qış-Yay Turizm Kompleksinin tikintisi ilə bağlı həyata keçirilən layihənin ilk mərhələsidir. Bütövlükdə bu, 10 il üçün nəzərdə tutulan bir layihədir.

Ümumiyyətlə, son üç ildə Azərbaycanda turizmin inkişafına xüsusi diqqət yetirilir. Bu hər şeydən əvvəl ölkə Prezidenti cənab ilham Əliyevin bu sahəyə xüsusi önəm verməsi ilə bağlıdır. Cənab Prezident İlham Əliyevin aprel (2010-cu il) ayında Bakıda keçirilən daxili turizm sərgisində şəxsən iştirak etməsi bunun əyani sübutudur.

2011-ci ildə isə daha əhəmiyyətli layihələrin həyata keçiriləcəyi gözlənilir. Bunun üçün ölkədə geniş imkanlar yaradılmışdır. Son illər inşa edilmiş müasir tipli mehmanxanalar, yaradılmış milli parklar və qoruqlar, əsaslı təmir edilmiş mədəni və tarixi abidələrimiz turizmin gələcək inkişafına əhəmiyyətli dərəcədə yardımçı olacaq.

M.MÜKƏRRƏMOĞLU

Xalq qəzeti.- 2011.- 13 yanvar.- S. 3.