Azərbaycanda müxtəlif dini baxışları olan insanlar vahid ailə kimi yaşayırlar

Xarici dairələrin dəstəyi ilə dini ekstremizm toxumu səpən radikal dindarların bəd əməlləri iflasa məhkumdur

Azərbaycan müstəqillik qazandıqdan sonra ölkədə yaranmış anarxiya, özbaşınalıq və mənəm-mənəmlik tədricən aradan qaldırıldı. 1993-cü ilin ortalarından başlayaraq ölkəmiz hüquqi, demokratik dövlət quruculuğu yoluna qədəm qoydu, ulu öndər Heydər Əliyevin uzaqgörən siyasəti və müdrikliyi sayəsində insanlar arasındakı ayrı-seçkilik aradan götürüldü. Müdrik şəxsiyyət müstəqil dövlətimizin başçısı kimi hər bir Azərbaycan vətəndaşının din, vicdan azadlığının etibarlı qarantına çevrildi.

1995-ci ildə müstəqil Azərbaycanın dünya standartlarına uyğun şəkildə ilk Konistitusiyası hazırlandı və həmin il noyabrın 12-də ümumxalq səsverməsi (referendum) yolu ilə qəbul edildi. Konstitusiyanın qəbulu ilə Azərbaycanda hakimiyyət bölgüsünün qanuni-hüquqi əsasları bəyan olundu və bu işin həyata keçirilməsinə başlanıldı. İnsanların hüquq və əsas azadlıqlarının qorunmasının geniş təsbit olunduğu Konstitusiyada dini etiqadla bağlı ayrıca maddə də öz əksini tapıb. "Din və dövlət" adlanan həmin maddədə yazılır: "Azərbaycan Respublikasında din dövlətdən ayrıdır. Bütün dini etiqadlar qanun qarşısında bərabərdir. İnsan ləyaqətini alçaldan və ya insanpərvərlik prinsiplərinə zidd olan dinlərin yayılması və təbliği qadağandır".

Azərbaycanda davamlı ictimai-siyasi sabitliyin yaradılması, ölkəmizin Avropaya və dünya birliyinə sürətli inteqrasiyası bəzi daxili və xarici ekstremist dairələrin qısqanclığına səbəb olmuşdur. Belə bəd niyyətli insanlar Azərbaycanda çaxnaşma yaratmaq, hakimiyyətin qazandığı uğurlara kölgə salmaq məqsədilə müxtəlif qanuna zidd hərəkətlərə əl atırlar. Son vaxtlar həmin dairələr yerli radikal dindarları dini sabitliyi pozmağa təhrik edir və bu işdə rəsmi dövlət qeydiyyatı olmayan Azərbaycan İslam Partiaysının sədri Mövsüm Səmədovdan vasitə kimi istifadə edirlər. Vətəndaş həmrəyliyinə xələl gətirmək, iğtişaşlar törətmək, insanları cihada təhrik etmək tapşırığı alan qeyri-legitim İslam Partiyasının sədri M.Səmədov və onun Quba rayonunda yaşayan əmisi oğlu Dəyanət Səmədov, habelə bu partiyanın bir neçə üzvü, din pərdəsi altında hakimiyyətə, dövlətçiliyə qarşı fitnə-fəsada keçmiş, hətta silah-sursat da toplamışlar.

Radikal dindarların xalqa hakimiyyət əleyhinə çağırışlar etməsi, ölkəni dinlərarası zidiyyətlər meydanına çevirmək istəkləri, müstəqil dövlətimizi sivil, demokratik inkişaf yolundan döndərmək cəhdləri Qafqaz Müsəlmanları İdarəsinin də ciddi narazılığına və narahatlığına səbəb olub. Hətta ali dini qurum bu barədə 2011-ci il yanvarın 8-də bəyanat da yaymışdır. Bəyanatda Azərbaycan İslam Partiyasının sədri Mövsüm Səmədov və onun ətrafındakı radikal dindarların xəyanətkar əməlləri kəskin pislənilir: "Hesab edirik ki, bu, xalqımıza və dövlətçiliyimizə qarşı yönəlmiş təxribatdır və bunda məqsəd milli birliyimizi sarsıtmaq, sabitiliyimizə xələl gətirmək, cəmiyyət daxilində qarşıdurma yaratmaqdır. Bu, olduqca təhlükəli təzahürdür və biz çox təəssüf edirik ki, bu hal İslam adından sui-istifadə edən üzdəniraq təəssübkeşlər tərəfindən məqsədli şəkildə yaradılır".

Təəssüf edirik ki, adını islamçı, ibadət əhli, din xadimi qoyan Mövsüm Səmədov və onun ətrafı ali dini qurum olan Qafqaz Müsəlmanları İdarəsinin tövsiyə xarakterli bəyanatından ciddi nəticə çıxarmamış və dinə zidd əməllərini davam etdirmişlər. Radikal dindarların ictimai təhlükəsizliyi pozmaq cəhdləri açıq xarakter aldığından onların qarşısı qanun çərçivəsində alınmışdır. Baş Mütəşəkkil Cinayətkarlıqla Mübarizə İdarəsi tərəfindən keçirilən əməliyyat-axtarış tədbirləri nəticəsində Mövsüm Səmədovun birgə iğtişaşlar törətməyə hazırlaşdığı Quba rayonunda yaşayan əmisi oğlu Dəyanət Səmədovun evinə və işlədiyi elektrik malları mağazasına baxış zamanı oradakı seyfin altından 3 əl qumbarası, yaşadığı evdə isə 7 avtomat patronu, içərisində dini radikalizmi təbliğ edən məlumatların olduğu elektron daşıyıcıları aşkarlanıb götürülmüşdür. Əsas silah-sursat isə D.Səmədovun və onun qaynı Firdovsi Məmmədrzayevin Quba şəhərində yaşadıqları mənzildə gizlədilibmiş.

Yanvarın 11-də həmin mənzillərdə axtarış aparılarkən aşkarlanan silah-sursat adlarını din xadimləri qoyan islamçıların daha çox silah baronları olmalarını xatırladırdı. Fikir verin, görün islamçıların evində nə qədər silah-sursat var imiş: 2 ədəd "Kalaşnikov" avtomatı, 60 ədəd avtomat patronu, 20 ədəd "F-1" əl qumbarası və onlar üçün alışdırıcılar, avtomat silah üçün 4 ədəd daraq. Firdovsi Məmmədrzayevin evindən və həyətindəki istixanadan isə 10 ədəd "F-1" əl qumbarası və onlar üçün alışdırıcılar, 40 ədəd avtomat patronu və avtomat silah üçün 1 ədəd daraq aşkar edilib götürülmüşdür. Bu qədər silah-sursat saxlayan islamçıların milli-mənəvi dəyərlərdən, adət-ənənələrdən, islam qayda-qanunlarından danışmağa mənəvi haqları çatırmı?

Dini tolerantlığın yüksək səviyyədə olduğu Azərbaycanda müxtəlif dini baxışları olan insanların vahid bir ailə kimi sülh və əmin-amanlıq içərisində yaşamaları göz önündədir. Onu da qeyd edək ki, son illər Azərbaycan dinlərarası və sivilizasiyalararası dialoqun mərkəzinə çevrilmiş, hətta Bakıda dünya dini liderlərinin sammiti keçirilmişdir. Görünür ölkəmzin dinlərarası dialoqda da beynəlxalq aləmdə böyük nüfuz qazanması bir sıra bədxahları və xəyanətkarları daha da qıcıqlandırıb. Onlar da aranı qarışdırmaq və ölkəmizin beynəlxalq adəmdəki nüfuzuna xələl gətirmək üçün yerli radikal dindarlardan bir alət kimi istifadə etməyə çalışmış, bu işdə vasitə kimi qeyri-legitim fəaliyyət göstərən Azərbaycan İslam Partiyasını və onun sədri Mövsüm Səmədovu seçmişlər.

Adını islamçı qoyan M.Səmədov və onun ətrafı unutmamalıdırlar ki, islamın müqəddəs dəyərlərini uca tutan şəxs heç bir zaman böhtan, iftira, təfriqə, təhqir kimi günahlara və zorakılığa, çağırışa yol verməz.

Radikal dindarlar Pakistanda, Əfqanıstanda və digər müsəlman ölkələrində bəlkə də çaxnaşma sala, bu ölkələri dinlərarası ziddiyyətlər meydanına çevirə bilərlər. Ancaq bunu Azərbaycanda etmək qeyri-mümkündür. Çünki bizim ölkəmizdə xalq öz Prezidentinə inanır, güvənir və onun ətrafında sıx birləşib. Dövlət başçımızın uğurlu daxili və xarici siyasəti sayəsində əhalinin həyat tərzi getdikcə daha da yaxşılaşır. Azərbaycanda vicdan və dini etiqad azadlığı tam təmin olunub.

Azərbaycan hüquqi, sivil, demokratik inkişaf yolu ilə sürətlə irəliləyən, beynəlxalq aləmdə getdikcə nüfuzu artan, əlaqələri genişlənən müstəqil bir dövlətdir. Ona görə də hansısa dini qrupların xarici havadarlarının çirkli pullarının hesabına sabitliyi pozmaq, əhali arasında çaxnaşma yaratmaq cəhdləri iflasa məhkumdur.

Əliqismət BƏDƏLOV

Xalq qəzeti.- 2011.- 15 yanvar.- S. 5.