Neft Akademiyasının alimlərinə KİV-in mükafatları təqdim olundu

Dünən Azərbaycan Dövlət Neft Akademiyasında bu ali məktəbin bir qrup aliminin Kütləvi İnformasiya Vasitələri İşçiləri Həmkarlar İttifaqının mükafatları ilə təltifedilmə mərasimi keçirildi. Mükafatları KİV İşçiləri Həmkarlar İttifaqının sədr müavini Çingiz Qurbanoğlu təqdim etdi.

Onun sözlərinə görə, ölkəmizin ali təhsil müəssisələri arasında Azərbaycan Neft Akademiyasının xüsusi yeri var. Bu ali təhsil ocağı dünyada neft ölkəsi kimi tanınan və artıq Avropanın da enerji təhlükəsizliyi sistemində mühüm rol oynayan Azərbaycan üçün mütəxəssislər hazırlayır. KİV İşçiləri Həmkarlar İttifaqının respublikanın mətbuat orqanları arasında keçirdiy rəy sorğusu nəticəsində də məlum olmuşdur ki, Neft Akademiyası ali təhsil müəssisələrimiz arasında öncül yerlərdən birini tutur. Məhz bu sorğunun nəticələri əsasında akademiyanın rektorunun və bir neçə prorektorunun mükafatlandırılması qərara alınmışdır.

Ç.Qurbanoğlu bildirdi ki, Neft Akademiyasında savadlı mütəxəssislərin hazırlanmasında və ümumiyyətlə, bu ali təhsil ocağının inkişafında xidmətlərinə görə akademiyanın rektoru, akademik Siyavuş Qarayev KİV İşçiləri Həmkarlar İttifaqının təsis etdiyi "Xalqın nüfuzlu ziyalısı" mükafatına layiq görülür. Akademik Siyavuş Qarayev, eyni zamanda, bir neçə elmi-texniki jurnalla yaxından əməkdaşlıq etdiyinə və 550-dən çox elmi məqaləsi çap olunduğuna görə təşkilatın "Qızıl qələm" mükafatı ilə təltif edildi.

Son illərdə Dövlət Neft Akademiyasının inkişafında fəal rol oynamış alimlər də KİV İşçiləri Həmkarlar İttifaqının diqqətindən yayınmayıb. Akademiyanın tədris işləri üzrə prorektoru Zaur Əliyev, eləcə də elm və texnika məsələləri üzrə prorektoru Sakit Rəsulov "Qızıl qələm" mükafatına layiq görüldülər.

Təlim-tərbiyə işləri üzrə prorektor Qasım Məmmədov, ümumi işlər üzrə prorektor Namiq Abdullayev, inzibati və təsərrüfat işləri üzrə prorektor Nuhbaba Şıxıyev və beynəlxalq əlaqəlar üzrə prorektor Rafiq Camalov KİV İşçiləri Həmkarlar İttifaqının "Azərbaycan Bayrağı" mükafatı ilə təltif edildilər.

Rektor, akademik Siyavuş Qarayev mükafatlara görə həmkarlar təşkilatına minnətdarlığını bildirdi. Onun sözlərinə görə, bu mükafatlar əslində təkcə hər bir alimin deyil, bütün akademiya kollektivinin əməyinə verilən yüksək qiymətdir. Akademiyanın tarixindən söz açan akademik əlavə etdi ki, bu ali təhsil ocağının bugünkü yüksək səviyyəyə gəlib çatmasında onların müəllimi olmuş, vaxtilə ali məktəbə rəhbərlik etmiş şəxslərin də danılmaz xidmətləri olmuşdur. Bu yaxınlarda akademiya özünün 90 illik yubileyini qeyd etmişdir. Rektor neftçi kadrlar yetirən ali məktəbə dövlətimiz, eləcə də dövlət başçısı İlham Əliyev tərəfindən daim diqqət və qayğı göstərildiyini də xüsusi olaraq qeyd etdi. Məhz bu qayğının nəticəsidir ki, bu gün Azərbaycan Neft Akademiyasının yetişdirib həyata atdığı məzunlar heç bir çətinlik çəkmədən təkcə keçmiş sovet ölkələrində deyil, dünyanın bir çox ölkələrində çalışırlar.

Prorektor Qasım Məmmədov və akademiya həmkarlar təşkilatının sədri Məzahir Babayev də kollektivin əməyinə verdikləri yüksək qiymətə görə KİV İşçiləri Həmkarlar İttifaqına minnətdarlıqlarını bildirdilər.

Paşa ƏMİRCANOV

Xalq qəzeti.- 2011.- 18 yanvar.- S. 7.