Unudulmayan tarix-20 Yanvar

Dünən Xətai Rayon İcra Hakimiyyətinin binasında Azərbaycanın azadlıq və müstəqillik mübarizəsi tarixinə qəhrəmanlıq səhifəsi kimi yazılmış 20 Yanvar faciəsinin 21-ci ildönümünə həsr olunmuş toplantı keçirildi.

Rayon icra hakimiyyətinin başçısı Razim Məmmədov toplantıda çıxış edərək bildirdi ki, 20 Yanvar hadisələri hər şeydən əvvəl, Azərbaycan xalqının milli oyanışından, azadlıq və müstəqillik mücadiləsindən xəbər verən tarixi bir gerçəklik idi. On minlərlə insanın rejimin ədalətsiz və riyakar münasibətinə etiraz əlaməti olaraq küçələrə çıxması, haqq səsini ucaltması imperiya ağalarının canına qorxu salmışdı. Məhz buna görə, respublikanın o zamankı hakimiyyətinin səriştəsizliyindən istifadə edən mərkəzi hakimiyyət 1990-cı il yanvarın 19-dan 20-ə keçən gecə Sovet Ordusunun Bakıda yerləşdirilmiş qüvvələri ilə kifayətlənməyərək, şəhərə əlavə qüvvələr cəlb etmiş və Azərbaycana sözün əsl mənasında hərbi müdaxilə etmişdir. Əliyalın xalqa tanklardan və zirehli hərbi maşınlardan, avtomat və pulemyotlardan atəş açılmış, günahsız insanlar gülləbaran edilmiş, dinc əhali amansızcasına qətliam edilmişdir.

Natiq bildirdi ki, Azərbaycana bu hərbi müdaxilənin əsas zərbəsi milli azadlıq hərəkatını boğmaq, xalqımızı yenidən əsarət altında saxlamağa yönəlmişdi. Bu qanlı cinayətin miqyası o qədər böyük idi ki, Qorbaçov hakimiyyəti heç cür onun izlərini itirmək isətəyinə nail ola bilmədi. Faciədən dərhal sonra xalqımızın dahi oğlu, ümummilli lider Heydər Əliyev DTK-nın təzyiq və hədələrinə baxmayaraq, imperiyanın baş şəhərində Azərbaycan nümayəndəliyinə toplaşmış dünya ölkələrinin mətbuat orqanlarının nümayəndələri qarşısında kəskin bəyanatla çıxış edərək bu təcavuz aktını qətiyyətlə pisləmiş və buna siyasi-hüquqi qiymət verilməsini istəmişdi.

20 Yanvar sözün əsl mənasında Azərbaycan xalqına qarşı Qırmızı Ordunun törətdiyi qətliam idi. Bu hərbi müdaxilə zamanı 147 nəfər şəhid olmuş, 744 nəfər yaralanmış, 841 nəfər qanunsuz həbs edilmişdi.

R.Məmmədov daha sonra bildirdi ki, bu qanlı faciə uzun müddət, hətta Azərbaycanın özündə belə öz siyasi-hüquqi qiymətini almamış və onu həyata keçirən insanlar cəzalandırılmışlar. Yalnız, ümummilli lider Heydər Əliyev yenidən hakimiyyətə qayıtdıqdan sonra, bu məsələ ali qanunvericilik orqanının müzakirəsinə çıxarılmış və bilavasitə ulu öndərin təşəbbüsü ilə ona hüquqi siyasi qiymət verilmişdir. 1994-cü il martın 29-da Milli Məclisin iclasında qəbul edilmiş qərarda Azərbaycan dövlətinin rəsmi mövqeyi açıqlanmış, 20 Yanvar hadisələri həm ümummxalq faciəsi, həm də milli azadlıq hərəkatının zirvəsi kimi xarakterizə edilmişdir.

Natiq daha sonra, dövlətin 20 Yanvar faciəsinin qurbanlarının xatirəsinin əbədiləşdirilməsi, 20 Yanvar əlillərinin və şəhid ailələrinin sosial müdafiəsi və digər istiqamətdə göstərdiyi diqqət və qayğıdan da ətraflı danışdı və bildirdi ki, Prezident cənab İlham Əliyev də bu insanları daim diqqətdə saxlayır.

Dövlətin və o cümlədən Xətai Rayon İcra Hakimiyyətinin göstərdiyi diqqət və qayğıdan isə bu rayonun 27 şəhid və əlil ailəsi adından, onları birləşdirən "20 Yanvar" Cəmiyyətinin sədri Şakir Azadəliyev danışdı. O bildirdi ki, xalqımızın yaddaşında ədəbiləşən bu faciə əsl qiymətini heç şübhəsiz ulu öndərimiz Heydər Əliyevin gərgin əməyi və səyi nəticəsində almışdır. Məhz bu dahinin siyasi fəallığı və yüksək dövlət idarəçiliyi sayəsində biz əlillər və 20 Yanvar şəhidləri layiq olduğumuz qiyməti aldıq və bu gün də hamı tərəfindən diqqət və qayğı görürük.

Sonda şəhid ailələrinə və əlillərə rayon icra hakimiyyətinin pul və ərzaq yardımları təqdim olundu.

İlqar RÜSTƏMOV,

Rafiq SALMANOV

Xalq qəzeti.- 2011.- 19 yanvar.- S. 7.