Prezident İlham Əliyev: Azərbaycanda sosial ədalət prinsipi həmişə yüksək səviyyədə tətbiq olunur

Azərbaycan Respublikasının Prezidenti cənab İlham Əliyevin sədrliyi ilə keçirilmiş Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ildə qarşıda duran vəzifələrə həsr olunan iclasında ölkə həyatının bütün sahələrində görülən işlər ətraflı təhlil edilmiş, qazanılan nailiyyətlərlə yanaşı, buraxılan nöqsanlar, çatışmazlıqlar da göstərilmişdir. Dövlətimizin rəhbəri iclası açarkən qeyd etmişdir ki, keçən ilin yekunlarına nəzər salsaq görərik ki, nəinki iqtisadiyyatımız 5 faiz artmışdır, makroiqtisadi vəziyyət də sabit olaraq qalmışdır.

Azərbaycanda əvvəlki illərdə olduğu kimi ötən il də makroiqtisadi sabitlik qorundu, inflyasiya cəmi 5,7 faiz təşkil etdi, əhalinin pul gəlirləri isə 12,3 faiz artdı. Bu onu göstərir ki, gəlirlər inflyasiyanı üstələyir. 2010-cu ilin yekunlarına görə, yoxsulluğun səviyyəsi daha da aşağı düşmüşdür və artıq Azərbaycanda yoxsulluq şəraitində yaşayanlar 9,1 faizdir. Bu, ölkəmiz üçün böyük nailiyyətdir. Yeddi il ərzində Azərbaycanda yoxsulluq 4-5 dəfə aşağı düşmüşdür. Bu, bir daha onu göstərir ki, dövlətin apardığı islahatlar və iqtisadi artım, ilk növbədə, Azərbaycan vətəndaşlarının rifah halının yaxşılaşdırılmasına yönəldilibdir. Bundan əlavə bu, onu da göstərir ki, Azərbaycanda enerji sektorunda aparılan işlər nəticəsində ölkə büdcəsinə daxil olan vəsait ədalətli bölünür və beləliklə, Azərbaycanda sosial ədalət prinsipi həmişə yüksək səviyyədə tətbiq olunur.

2010-cu il Azərbaycanda "Ekologiya ili" elan edilmişdi. "Ekologiya ili" çərçivəsində həm dövlət tərəfindən böyük işlər görüldü, həm də özəl sektor bu məsələyə qoşuldu. Ən sevindirici hal isə ondan ibarətdir ki, ölkə əhalisi də bu təşəbbüsə qoşularaq, ekoloji vəziyyətin yaxşılaşdırılmasına öz dəyərli töhfələrini vermiş, 6 milyondan artıq ağac əkilmişdir. Dövlət başçısı xüsusi olaraq vurğuladı ki, həmin proses bu il də davam etdiriləcəkdir. Ekoloji vəziyyətin yaxşılaşdırılması ölkəmizin uğurlu inkişafı üçün, əhalinin sağlamlığı üçün çox böyük əhəmiyyət daşıyır.

Ekoloji tədbirlər ancaq ağac əkməklə məhdudlaşmır. Çaylar boyunca yerləşən kəndlərdə təmizləyici qurğuların istifadəyə verilməsi nəticəsində artıq 300 min Azərbaycan vətəndaşı Dünya Səhiyyə Təşkilatının standartlarına uyğun içməli su ilə təmin edilibdir. Keçən ilin sonunda Oğuz-Qəbələ-Bakı su kəməri istismara verilibdir. Bir-iki aydan sonra bu kəmər tam gücü ilə işləyəcək və Bakının təmiz, keyfiyyətli içməli su ilə təmin olunması üçün əlavə böyük imkanlar yaranacaqdır. Kəmərin tikintisi sırf sosial xarakter daşıyır. Ölkə rəhbərinin təbirincə desək, bu kommersiya layihəsi deyil, lakin ona böyük vəsait qoyulubdur. Dövlət bunu ona görə edibdir ki, Azərbaycan vətəndaşları ən yüksək şəraitdə yaşasınlar. Azərbaycanda ən qabaqcıl texnologiyalar tətbiq olunur, görülən işlər məhz bu səviyyədə aparılır. Azərbaycanda istifadəyə verilmiş səhiyyə ocaqlarında ən qabaqcıl avadanlıqlar quraşdırılır, dünyanın aparıcı, inkişaf etmiş ölkələrindəki ən qabaqcıl klinikalarında olan avadanlıqlar, aparatlar gətirilir. Ölkəmiz müasirləşdirilir. Buna görə də dünyada gedən texnoloji tərəqqiyə həmişə diqqətlə yanaşılmalıdır. Gərək ölkəmizə ən qabaqcıl texnologiyalar gətirilsin ki, Azərbaycanda bütün işlər yüksək səviyyədə görülsün. Keçən il görülən işlər nəticəsində həm insanlar üçün yaxşı şərait yaradılmış, həm də ölkə daha da güclənmişdir.

2010-cu ildə bütün başqa istiqamətlərdə də böyük nailiyyətlər əldə edilmişdir. Baxmayaraq ki, təbiət də bizi sınağa çəkdi. 2010-cu ildə sellər və daşqınlar nəticəsində on minlərlə hektar torpaqlarımızda subasma halları baş vermişdi, 70 min hektardan çox ərazini su basmış, minlərlə ev uçmuş, yararsız vəziyyətə düşmüşdü. Ancaq görülən operativ və çevik tədbirlər nəticəsində dövlətimiz ona nail ola bildi ki, bir nəfər də həlak olmadı. Bütün insanlar vaxtında təhlükəsiz yerlərə köçürüldülər. Onların müvəqqəti məskunlaşdığı yerlərdə bütün lazımi şərait yaradıldı. Tezliklə, hava şəraiti imkan verən kimi təmir-bərpa işlərinə başlanıldı. Demək olar ki, 4-5 ay ərzində minlərlə ev tikildi, təmir olundu. İlin yekununa olan məlumata görə, 3 mindən artıq ev təmir edilmiş, 1500 ev yenidən tikilmişdir, təxminən 700-800 evin tikintisi isə davam edir. Bu, onu göstərir ki, Azərbaycan hökuməti bütün çətin hallara hazırdır. Bunun üçün ölkəmizdə həm texniki imkanlar, həm peşəkar kadrlar, həm də maliyyə vəsaiti var. Onu da demək olar ki, bütün bu işləri Azərbaycan öz hesabına görür, heç kimdən yardım istəmir. Yəni biz özümüzə arxalanırıq.

Bütün dünyanı ciddi sınağa çəkən təbii fəlakətlər Azərbaycandan da yan keçməmişdir. Ötən il Kür-Araz ovalığında, respublikanın başqa yerlərində subasma, torpaq sürüşməsi və başqa təbii kataklizmlər nəticəsində böyük dağıntılar olmuşdur. Yığıncaqda bunu xatırladan iqtisadi inkişaf naziri Şahin Mustafayev dedi:

- Daşqınlar nəticəsində baş vermiş fəlakətin qarşısının alınması, əhaliyə qayğı və diqqət yetirilməsinin ölkə Prezidenti üçün nə qədər vacib olduğunu bir daha göstərdi.

Sosial infrastruktur obyektləri, o cümlədən 45 səhiyyə müəssisəsi, 70-dən çox məktəb binası tikilmiş və təmir edilmişdir. Əhalinin içməli su ilə təmin edilməsi üçün iri infrastruktur layihəsi - Oğuz-Qəbələ-Bakı su kəmərinin tikintisi başa çatdırılmışdır.

Sosial sahələrin inkişafında Heydər Əliyev Fondu tərəfindən təhsil, mədəniyyət, səhiyyə və digər sahələrdə həyata keçirilən proqram və layihələr müstəsna əhəmiyyət kəsb edir.

Bu nəticələr beynəlxalq qurumlar tərəfindən də müsbət qiymətləndirilmişdir. BMT-nin İnkişaf Proqramının əhalinin rifah səviyyəsini əks etdirən İnsan İnkişafı Hesabatına əsasən, Azərbaycan son beş ildə 34 pillə irəliləyərək 169 ölkə arasında 2005-ci ildə tutduğu 101-ci yerdən 2010-cu ildə 67-ci yerə yüksəlmişdir. 2000-2010-cu illər üzrə ölkəmiz insan inkişafı indeksinin orta illik artım tempinə görə MDB məkanında birinci yerə layiq görülmüş və "Orta insan inkişafı" ölkələri qrupundan "Yüksək insan inkişafı" qrupuna keçmişdir.

Yığıncaqda çıxış edən gənclər və idman naziri Azad Rəhimov isə dedi:

- 2010-cu il ərzində daha 5 Olimpiya-İdman Kompleksi istismara verilmiş, bununla da indiyədək tikilib istifadəyə verilmiş Olimpiya komplekslərinin sayı 28-ə çatmışdır. Hazırda daha 11 kompleksin tikintisi davam etdirilir. 2011-ci ildə isə 6 kompleksin istismara verilməsi planlaşdırılmışdır.

Mingəçevir şəhərində "Kür" Olimpiya Tədris İdman Mərkəzi tikilib istifadəyə verilmişdir. Mərkəzdə MDB məkanında bənzəri olmayan avarçəkmə bazası yaradılmışdır. Bu baza nəinki idman bazası kimi, eyni zamanda, turizm obyekti kimi də yüksək səviyyəli xidmətlər göstərmək imkanına malikdir.

Son zamanlar idman komplekslərinin dünya və Olimpiya oyunlarının keçirilməsi üçün ən müasir texnoloji imkanlara malik olmasına xüsusi diqqət yetirilir. Bu tələblərə cavab verən Gimnastika Kompleksinin tikintisi davam etdirilir, Respublika İdman Tibb Mərkəzinin tikintisinə başlanılmışdır, Bakı şəhərində hovuz kompleksinin layihə-smeta sənədləri hazırlanır və tikintiyə hazırlıq işləri gedir, Şahmat Sarayının, Olimpiya Hərəkatı və İdman Muzeyinin tikintisi planlaşdırılır. Qeyd etmək istəyirəm ki, müvafiq federasiyalarla birlikdə boks, cüdo, güləş və karate idman mərkəzlərinin layihə-smeta sənədləri hazırlanır və tikintiyə hazırlıq işlərinə başlanılmışdır.

İclası yekunlaşdıran Prezident İlham Əliyev qarşıda duran vəzifələrdən danışdı, tapşırıq və tövsiyələrini verdi. Sonda böyük inamla bildirdi ki, 2011-ci il başlayıb, mən gələcəyə çox böyük nikbinliklə baxıram. Tam əminəm ki, 2011-ci il də ölkəmizin hərtərəfli inkişafı üçün uğurlu il olacaqdır. Buna nail olmaq üçün hamımız yaxşı işləməliyik, fəal işləməliyik ki, ölkəmizi daha da gücləndirək, Azərbaycanı inamla irəliyə aparaq.

Telman ƏLİYEV

Xalq qəzeti.- 2011.- 19 yanvar.- S. 6.