Xalqın hünər salnaməsi

Yanvarın 19-da Azərbaycan Turizm İnstitutunda 20 Yanvar faciəsinin 21-ci ildönümü münasibətilə "Qanlı-şanlı tariximiz" mövzusunda tədbir keçirildi.

Milli marş səsləndikdən və 1 dəqiqəlik sükutdan sonra tədbiri ATİ-nin rektoru, tarix elmləri doktoru, professor Cəfər Cəfərov açaraq dedi: "Hər bir xalqın, millətin tarixində bir dönüş nöqtəsi, özünüdərk anı olur. Bizlər bu böyük həqiqəti 21 il əvvəl yenidən gerçəkləşdirdik. İmperiyanın şər maşını bizləri islamçı qüvvələr, yad ünsürlər kimi dövlət çevrilişinə cəhddə suçlayıb gecənin qaranlığında amansızlıqla cəzalandırdı. Dünyanı inandırmağa çalışırdılar ki, əgər sovet ordusu Bakıya çağrılmasaydı, Azərbaycanda etnik zəmində qarşıdırma kəskin şəkil ala bilərdi. "Azadlıq" radiosu vasitəsilə sovet ordusunun və muzdlu erməni başkəsənlərinin dinc soydaşlarımıza qarşı vəhşilikləri barədə xəbərlər yayılırdı. Kim idi islamçı,- məktəbli Larisa? Kim idi narkoman- məktəbli İlqar? BDU-nun aspirantı Yusif, yoxsa gənc Ülvi? Şəhid və yaralılardan, itkin düşənlərdən hansılar?.. Cavabsız suallar çoxdur... Bizim vəzifəmiz tarixin bu ağrılı səhifəsini hərtərəfli araşdırmaq, gələcək nəsillərə çatdırmaq, onları xəbərdar etməkdir".

ATİ-nin kafedra müdiri, tarix elmləri namizədi İbrahim Əliyev Vətən tarixində 1990-cı ilin 20 Yanvarının şərəf günü olduğunu xüsusi qeyd etdi. İgidlik, Vətənə bağlılıq, torpaq sevgisi və qeyrəti anlamını 20 Yanvar şəhidləri ölməzlikləri ilə sübut etdilər.

İnstitutun kafedra müdiri, tarix elmləri namizədi Bahadur Bilalov fikrini belə ifadə etdi: "Bizim nəsil rus-alman müharibəsini görməyib. Amma Azərbaycanda Bakı müharibə dəhşətini gördü. 1941-45-ci illər müharibəsinin qələbə ilə başa çatmasında əhəmiyyətli rol oynayan neft Bakısı o gecə qadağan olunmuş silahlardan açılan atəşlə qan gölünə çevrildi. Rus tanklarının lüləsinə qərənfil taxan körpələrimizə, ana-bacılarımıza o silahlardan atəş açıldı. Bu atəş bütün Azərbaycanımızın ürəyinə dəydi."

Hüquqşünas Şəmsəddin Əliyev 20 Yanvarın beynəlxalq hüquqa və insanlığa zidd cinayət əməli olduğunu faktlarla isbatladı. O günlər Bakıda qırğına rəhbərlik edən SSRİ-nin güc nazirlərinin cinayətkar əməllərinə görə cavabdeh olduqlarını bildirdi.

Anım mərasiminin sonunda ATİ-nin rektoru C.Cəfərov tədbirə toplaşanlara müraciət edərək dedi: "Bizim hər birimizin borcu 20 Yanvar faciəsini, ondan sonra baş verənləri unutmamaq, tarixin daş yaddaşına həkk etməkdir. Tarix unutqanlığı sevmir".

Zərifə BƏŞİRQIZI

Xalq qəzeti.- 2011.- 20 yanvar.- S. 4.