20 Yanvar faciəsinin qurbanlarının xatirəsi yad edildi

Ölkəmizin hər yerində olduğu kimi, Qax rayonunda da müstəqillik yolunda şəhid olanların xatirəsinə həsr olunmuş silsilə tədbirlər - konfrans, dəyirmi masa, ədəbi-bədii kompozisiya, anma mərasimləri, müsabiqə və sərgilər təşkil edilmişdir.

Heydər Əliyev muzeyində keçirilmiş "Dəyirmi masa" iştirakçıları vurğulamışlar ki, 20 Yanvar faciəsi zamanı xalqımıza qarşı törədilən bu soyqırım siyasətinə, Qorbaçovun insanlığa sığmayan vəhşiliklərlə müşayiət olunan hərbi əməliyyatların keçirilməsinə rəvac verməsinə qarşı həyatını təhlükə qarşısında qoyaraq ilk etiraz səsini ucaldan ulu öndərimiz Heydər Əliyev olmuşdur. Bu hadisəyə hüquqi-siyasi qiymət verilməsi barədə parlamentdə qərar da məhz ulu öndərimizin qətiyyəti, təkidli tələbi ilə qəbul olunmuşdur.

"Dəyirmi masa"da 20 Yanvar faciəsinin qurbanlarının xatirəsinin əbədiləşdirilməsi üçün dövlətimiz tərəfindən həyata keçirilən tədbirlər də faktlarla iştirakçıların nəzərinə çatdırılmışdır.

Mərasimdə 20 Yanvar faciəsinin 21-ci ildönümü ilə bağlı rayonda təşkil olunmuş müsabiqə iştirakçılarının bu faciənin əsl mahiyyətini, xalqımızın qəhrəmanlığını əks etdirən rəsm əsərləri nümayiş etdirilmiş, şeirlər səsləndirilmiş, ədəbi-bədii kompozisiyalar göstərilmiş, bu qanlı hadisəni əks etdirən kinofilm də nümayiş etdirilmişdir.

Həmin gün Şəhidlər Xiyabanında yanvar faciəsi qurbanlarının xatirəsinə həsr olunmuş ümumrayon mitinqi də keçirilmişdir. Minlərlə rayon sakinlərinin qatıldığı izdihamlı mitinqin iştirakçıları əvvəlcə 20 Yanvar şəhidlərinin xatirəsinə ucaldılmış abidənin önünə gül-çiçik qoyaraq hörmət və ehtiramlarını bildirdilər, sonra Qarabağda torpaqlarımızın azadlığı uğrunda şəhid olanların məzarlarını ziyarət etdilər, şəhidlərin ruhuna dualar oxundu. Rayon icra hakimiyyətinin başçısı Musa Şəkiliyev ölkəmizdə 20 Yanvar şəhidlərinin xatirəsinin əbədiləşdirilməsi bu hadisənin xalqımızın qəhrəmanlıq tarixi kimi dünya ictimaiyyətinə, gələcək nəsillərə çatdırılması, ölkəmizin müstəqilliyi yolunda yanvar hadisələrində sağlamlıqlarını itirən vətəndaşlarımızın sosial-məişət şəraitinin yaxşılaşdırılması istiqamətində ulu öndərimiz Heydər Əliyev tərəfindən başlanmış tədbirlərin ölkə Prezidenti İlham Əliyev tərəfindən uğurla davam etdirilməsindən söhbət açdı. Qeyd etdi ki, qədirbilən xalqımız 20 Yanvar qurbanlarının qəhrəmanlıqlarını heç zaman unutmaycaq, daim öz qəlbində yaşadaraq gələcək nəsillərə çatdıracaqdır.

Mərasimdə rayon icra hakimiyyətinin ictimai təşkilatlar və siyasi partiyalarla iş şöbəsinin müdiri Məhərrəm Məhərrəmov "20 Yanvar qan yaddaşımızdır" mövzusunda məruzə ilə çıxış edərək bu faciənin əsl mahiyyətini, orada şəhid olmuş soydaşlarımızın xalqımızın azadlığı uğrundakı mübarizə əzmini əks etdirən faktları iştirakçıların nəzərinə çatdırdı. Qax rayon prokuroru Akif Rzayev, maliyyə şöbəsinin müdiri Rasim Məmmədov, gənclər və idman idarəsinin rəis müavini Elbrus Tağıyev, şəhid anası Sona Allahverdiyeva çıxış edərək 20 Yanvar faciəsini həm də xalqımızın qəhrəmanlıq salnaməsinin bir səhifəsi kimi qiymətləndirdilər.

Yekunda rayon mədəniyyət evinin kolektivi tərəfindən 20 Yanvar şəhidlərinin xatirəsinə, orada soydaşlarımızın qəhrəmanlıqlarına həsr olunmuş ədəbi-bədii kompozisiya nümayiş etdirilmişdir.

İlqar HƏSƏNOV

Xalq qəzeti.- 2011.- 22 yanvar.- S. 5.