2010-cu ilin uğurlu yekunları ictimaiyyətdə böyük ruh yüksəkliyi doğurur

Azərbaycan Prezidenti İlham Əliyevin sədrliyi ilə yanvarın 14-də Nazirlər Kabinetinin 2010-cu ilin sosial-iqtisadi inkişafının yekunlarına və 2011-ci ilin qarşıda duran vəzifələrinə həsr olunmuş iclasında ölkə iqtisadiyyatının tarazlı inkişafının təmin edilməsi, əhalinin həyat tərzinin yaxşılaşdırılması və iri infrastruktur layihələrinin reallaşdırılması ilə bağlı mühüm uğurların əldə olunması göstərilmişdir. Dövlət başçısının dərin məzmunlu nitqində səsləndirilmiş fikir və mülahizələr, tədbirin digər materialları ölkə ictimaiyyəti tərəfindən böyük maraqla qarşılanmışdır. Bu tədbirlə bağlı oxucularımızın bir qismi öz rəy və müraciətlərini redaksiyamıza ünvanlayıb. Bu gün onlardan bir neçəsini dərc edirik.

Mahmud MAHMUDOV, mühəndis:

- Nazirlər Kabinetinin sözügedən iclasının materiallarını çox diqqətlə oxudum. Məlumdur ki, son iki il bütün dünya iqtisadiyyatı üçün çox çətin olub. Hətta çox güclü, qüdrətli dövlətlər belə qlobal maliyyə böhranının doğurduğu fəsadları tam aradan qaldırmaqda sətinlik çəkirlər. Belə bir vaxtda Azərbaycan iqtisadiyyatının davamlı inkişaf etməsi çox əlamətdar haldır.

Düşünürəm ki, iqtisadiyyatımızın dayanıqlı inkişafını şərtləndirən bir çox amillər var. Lakin əsas amil Azərbaycanda iqtisadi sahədə düzgün idarəetmənin qurulmasıdır. Gənc, müstəqil dövlətimizin iqtisadi uğurları dünya liderləri tərəfindən də etiraf olunur.

Bəli, Azərbaycan böyük iqtisadi tərəqqi yolundadır. Ötən il ölkəmizin hərtərəfli inkişafı üçün çox əhəmiyyətli bir il olmuş, iqtisadiyyatımızın bütün sahələrində, o cümlədən qeyri-neft sektorunda nəzərəçarpan uğurlar əldə olunmuşdur. Buna necə sevinməmək olar? Əlbəttə, çox sevinirik! Respublikamızın tarixində ilk dəfə olaraq 51 milyon ton neft, 27 milyard kubmetr təbii qaz istehsal edilmişdir. Bu məqamda Azərbaycanın enerji sektorunda çalışanların fədakar əməyini qeyd etməmək insafsızlıq olar. Amma heç vaxt unutmayaq ki, bütün bu uğurların bünövrəsində ulu öndər Heydər Əliyevin müdrik neft strategiyası dayanır.

Başqa bir məqamı da qeyd etmək istəyirəm. Sevinirəm ki, ötən il ölkəmizdə təkcə neft və qaz istehsalında deyil, qeyri-neft sektorunda da parlaq qələbələr əldə olunub. 2010-cu ildə ölkəmizdə bir sıra iri infrastruktur layihələrinin uğurla həyata keçirilməsi məni çox sevindirir. Bu layihələrdən təkcə birinin - ötən ilin sonunda tikilərək istifadəyə verilmiş Oğuz-Qəbələ-Bakı su kəmərinin adını çəkmək kifayətdir ki, Azərbaycanda sosial-quruculuq işlərinin nə qədər geniş miqyas aldığını və böyük vüsətlə getdiyini təsəvvür etmək mümkün olsun.

Həsən QULİYEV, kran sürücüsü:

- Nazirlər Kabinetinin son iclası ilə bağlı mən də öz fikirlərimi bildirmək istəyirəm. Tədbirdə son illərdə ölkəmizdə vüsət alan tikinti-quruculuq, abadlıq işləri barədə də geniş söhbət açılıb. Orada söylənilən fikirlərlə tamamilə həmrəyəm.

Mən sadə bir sənət adamıyam. 30 ilə yaxındır ki, öz qaldırıcı kranımla Bakının onlarla tikinti obyektində işləmişəm. Bizim kollektiv indi paytaxtın intellektual idarəolunması layihəsinin icrası ilə məşğuldur. Şəxsən mən hazırda şəhərimizin bir sıra mərkəzi prospektlərində inşa edilən iri dayaq -lövhələrin inşası sahəsində çalışıram.

Əlbəttə, mən siyasət adamı deyiləm, amma ölkəmizin həyatında baş verən mühüm hadisələri diqqətlə izləyirəm. Hamı kimi görürəm ki, Azərbaycan dövləti xalqın rifahını yaxşılaşdırmaq üçün çox işlər görür. Heç uzağa getməyək. Bir neçə il bundan əvvəlki Bakı ilə müasir şəhərimizi müqayisə edək. Paytaxtımızda təkcə keçən il çoxlu yaraşıqlı parklar, körpülər, yol keçidləri tikilərək istifadəyə verilib. Dostlar, qonaqlar bütün bunları görüb heyrətə gəlirlər.

Bəllidir ki, hansı ölkədə davamlı inkişaf varsa, güzəran da yaxşı olur. Azərbaycanın iqtisadi uğurları artdıqca, əhalinin rifahı da durmadan yaxşılaşır. Son illər ölkəmizdə yoxsulluğun kəskin surətdə azalması da aşkar hiss olunur. Dövlət başçımızın yeni iş yerlərinin açılması naminə gördüyü gərgin işləri də bir sadə əmək adamı kimi ürəkdən alqışlayıram. Ümid edirəm ki, Azərbaycanın uğurları gələcək illərdə daha da çox olacaqdır.

Zümrüd YUSİFOVA, pedaqoq:

- Ötən ilin iqtisadi uğurları barədə məlumatlarla tanış olarkən qəlbimdə dərin qürur hissi keçirdim. Bir Çin filosofu deyib ki, hər bir insanın tam xoşbəxt olması üçün abad və zəngin dövlətdə yaşaması vacibdir. Azərbaycan dövləti, möhtərəm Prezidentimiz ölkə vətəndaşlarının zəngin bir ölkədə, rifah və bolluq içində xoşbəxt yaşamaları üçün uğurlu işlər həyata keçirir. Dövlətimiz gənclərin, imkansız ailələrin, qaçqın və məcburi köçkünlərin də qayğılarına heç vaxt biganə qalmayıb. Mən Yeni Günəşli qəsəbəsində yerləşən 2 saylı uşaq evində tərbiyəçi işləyirəm. Burada əsasən valideyn himayəsindən məhrum olan uşaqlar tərbiyə alaraq böyüyürlər. Onların sağlam böyümələri, yaxşı təhsil almaları üçün kollektivimizin bütün üzvləri əllərindən gələni edirlər. Azərbaycanın gələcəyi üçün layiqli vətəndaşlar kimi yetişdirməyə çalışdığımız bu uşaqlar onlara göstərdiyi böyük qayğıya görə Azərbaycanın birinci xanımı, YUNESKO və İSESKO-nun xoşməramlı səfiri, Milli Məclisin üzvü Mehriban xanım Əliyevadan xüsusilə razılıq edirlər. Məhz hörmətli Mehriban xanımın bir an azalmayan diqqət və qayğısı nəticəsində 2 saylı uşaq evində indi hər cür şərait yaradılmışdır.

Mən bilirəm ki, Heydər Əliyev Fondu Azərbaycandakı bütün uşaq evlərini himayə edir. Ulu öndər uşaqları sonsuz məhəbbətlə sevirdi və hər bir azərbaycanlı uşağını öz övladı hesab edirdi. Nə yaxşı ki, bu gün Azərbaycanda heç bir uşaq dövlətin himayəsindən kənarda qalmayıb.

Xuraman İSMAYILOVA, kitabxanaçı:

- Azərbaycanın ictimai-siyasi həyatında baş verən bütün uğurlar, eləcə də ötənilki iqtisadi və sosial nailiyyətlər bir vətənpərvər insan kimi məni də çox sevindirir. 2011-ci ilin Azərbaycanda "Turizm ili" elan edilməsi şəxsən mənim üçün çox əlamətdar hadisə oldu. Əminəm ki, bu sahənin inkişafı regionlarımızın daha sürətlə inkişafına, burada yeni iş yerlərinin açılmasına kömək edə bilər. Mən uzun illər mədəniyyət sahəsində çalışan bir ziyalı kimi yaxşı bilirəm ki, respublikamızın daxili turizmin inkişafı üçün imkanları olduqca böyükdür. Təbii ki, "Turizm ili"ndə biz mədəniyyət işçiləri qədim və zəngin mədəniyyətimizi daha geniş təbliğ etməyə çalışacağıq.

Ötən il mənim yaradıcılığımda da böyük uğurlarla yadda qaldı. Mədəniyyət Nazirliyinin rəhbərliyinin təşəbbüsü ilə hazırladığım "Bərdə və bərdəlilər" adlı kitabım "Nərgiz" nəşriyyatında nəfis şəkildə nəşr edilərək ötən ilin sonunda M. F. Axundov adına Milli Kitabxanada geniş ictimaiyyətə təqdim olundu. Qədim və zəngin tarixə malik olan başqa bölgələrimizin də tarixinin şanlı səhifələri, çoxsaylı maddi-mədəniyyət abidələri barədə bilgiləri gənclərimizə tanıtdıraraq sevdirmək üçün bundan sonra həvəslə çalışacağam.

Qələmə aldı: Məsaim Abdullayev

Xalq qəzeti.- 2011.- 30 yanvar.- S. 3.