Bu gün "Xalq qəzeti"nin 27000-ci nömrəsi işıq üzü gördü

"Xalq qəzeti" mənalı yaradıcılıq yolu keçmiş, özünəməxsus üslub və sənətkarlıq xüsusiyyətləri olan nəşrlərimizdəndir. Uzun müddət "Kommunist" adı ilə nəşr edilən bu qəzet bütün sovet dövrü ərzində Azərbaycanın ictimai, iqtisadi və mədəni həyatının güzgüsü olmuşdur. Respublikanın qəzetçilik ənənələrinin formalaşmasında, jurnalistikamızın inkişafında "Xalq qəzeti"nin xidmətləri xüsusi qeyd olunmalıdır... Müstəqilliyimizin qazanılmasından sonra "Xalq qəzeti" respublikanın ictimai həyatında baş verən hadisələrə cəsarətlə müdaxilə etmiş, bir çox problemlərin aşkarlanmasında mühüm rol oynamışdır".

Heydər ƏLİYEV,

Ümummilli lider

Baş redaktordan

Azərbaycan milli mətbuatının ən uzunömürlü dövri nəşri olan "Xalq qəzeti" fəaliyyətinin 93-cü ilində - 3 aprel 2012-ci ildə öz oxucuları ilə görüşə 27000-ci sayı ilə gəlmişdir.

Bu əlamətdar hadisə, bu diqqətçəkən rəqəm bir sıra önəmli dəyər və faktları yada salır. Əvvəl anadilli jurnalistikamızın 137 illik tarixində ikinci bir qəzetə bu qədər sayının işıq üzü görməsi müyəssər olmamışdır. "Xalq qəzeti" Azərbaycan dövlətçiliyinin bərpasından sonra uzun illər ərzində hakimiyyətin rəsmi orqanı olmuşdur. Son 93 ildə Azərbaycanda baş vermiş siyasi, iqtisadi, sosial və mədəni hadisələrin davamlı, əhatəli salnaməsi kimi "Xalq qəzeti" nadir mətbu tarixi mənbədir.

"Xalq qəzeti"nin 27 mininci sayının işıq üzü görməsi onun özünün də tarixinin, Azərbaycan cəmiyyətində tutduğu mövqeyin, media proseslərində oynadığı rolun bir sıra məqamlarını göz önünə gətirir. Azərbaycan Xalq Cümhuriyyətinin yaratdığı demokratik şəraitdə və mətbuat azadlığına verdiyi təminat zəminində ilk sayı 1919-cu il avqustun 29-da "Kommunist" adı ilə dərc olunmuş bu qəzetin geniş fəaliyyəti 1920-ci ilin aprel çevrilişindən sonra başlayır. Sovet Rusiyasının XI ordusunun silahlı müdaxiləsi nəticəsində hakimiyyəti ələ keçirmiş Sovet Azərbaycanının bolşevik rəhbərliyi 2 gün sonra - aprelin 30-da AXC-nin rəsmi nəşri olan "Azərbaycan" qəzetinin bazası əsasında "Kommunist" qəzetini nəşrinə qərar verir. "Azərbaycan" qəzetinin baş redaktoru işdən kənarlaşdırılsa da, yaradıcı heyət bütünlüklə saxlanılır.

Sonrakı 71 ildə "Kommunist" qəzeti hakim Kommunist Partiyasının, onun təşkil etdiyi hökumət və parlamentin rəsmi nəşri - o zaman deyildiyi kimi "orqanı" olmuşdur. 1991-ci ilin yayında Sovet imperiyasının və onun kommunist rejiminin süqutunu həlledici mərhələyə yaxınlaşdırmış "QKÇP" olayları zamanı qəzet redaksiyasının kollektivi avqustun 23-də respublikada bundan sonra da 24 gün mövcud olmuş Azərbaycan Kommunist Partiyasının orqanı olmaqdan imtina etmişdir. Yaradıcı kollektiv nəşrin təsisçiliyini öz üzərinə götürərək, xalqa və azad sözə xidmət məramı ilə 71 il Azərbaycan mətbuatının avanqardı olmuş "Kommunist"in fəaliyyətini "Xalq qəzeti" adı ilə, müstəqil ictimai-siyasi nəşr kimi davam etdirməyi qərara almışdır.

Azərbaycanın dövlət müstəqilliyinin bərpa edildiyi günlərdə xalqla respublika rəhbərliyi arasında rəsmi informasiya körpüsü olmuş "Xalq qəzeti" sonrakı 2 il yarımda baş verən siyasi təbəddülatlar, uğursuzluqlar dövründə dövlət suverenliyinə və mətbuat azadlığı prinsiplərinə sadiq qalmışdır. 1993-cü ilin böhranlı yayında kollektiv öz mövqeyi və qələmi ilə ümummilli lider Heydər Əliyevin xilaskarlıq missiyası ilə hakimiyyətə qayıdışını təkidlə tələb edən xalqımızla bir yerdə olmuşdur.

Qəzetin tarixində yeni məsul mərhələ də bununla başlamışdır. Müstəqil Azərbaycanın həqiqi lideri Heydər Əliyevin 1993 - 1995-ci illərdə həyata keçirdiyi tarixi tədbirlərə, ölkənin xaos və böhrandan çıxarılması prosesinə fəal informasiya dəstəyi verən "Xalq qəzeti" ulu öndərin etimad və himayəsi ilə 1995-ci ilin noyabrından Azərbaycan Respublikası Prezidenti İşlər İdarəsinin və redaksiya kollektivinin həmtəsisçiliyi ilə nəşr olunur. Bu statusla qəzet yeni fəaliyyətinə ümumxalq səsverməsi ilə qəbul olunmuş müstəqil Azərbaycan Respublikasının Konstitusiyasını çap etməklə başlamışdır.

"Xalq qəzeti"nin tarixində bir məsələni də vurğulamaq önəmlidir. 1920-ci ilin 30 aprelindən "Azərbaycan" qəzetinin hüququ varisi kimi "Kommunist" adı ilə çıxan qəzetin ilk və sonrakı kollektivləri Azərbaycanda rəsmi mətbuat ənənəsini davam etdirmiş və zənginləşdirmişlər. "Azərbaycan" qəzetinin milli dövlətçiliyə və xalqa xidmət məramı sonrakı 70 ildə redaksiya divarları arasında açıq və gizli şəkildə yaşadılmış, yazarların milli varlığımıza bağlılığı heç bir zaman qırılmamışdır. Təsadüfi deyil ki, "Kommunist"ə 1937-ci ilədək rəhbərlik etmiş redaktorların hamısı "milli təmayülə sədaqətə" görə millətçilik damğası ilə repressiya olunmuş, redaksiya həmişə "millətçilik yuvası" kimi təqib və nəzarət altında saxlanılmışdır.

1988-ci ildə Qarabağ münaqişəsi ilə alovlanan milli oyanış və istiqlal hərəkatı redaksiyada nəsil-nəsil qorunub saxlanan milli ruha və zəminə də pərvəriş gətirmşidir. Genişlənən xalq hərəkatına açıq rəğbət bəsləyən, torpaqlarımızın bütövlüyü uğrunda mübarizənin tərəfində olan redaksiya qısa müddətdə demokratik bir məktəb keçərək 71 ildə öz içərisində əritdiyi və qoruyub saxladığı istiqlalçılıq məfkurəsinə qovuşmuşdur. "Kommunist" qəzeti SSRİ-nin süqutundan 1 il əvvəl öz bazasında "Həyat" adlı ayrıca parlament qəzetinin yaranmasına yardımçı olmuşdur. Çox keçmədən, bu nəşr tarixi ədalətin bərpası olaraq "Azərbaycan" adlandırılmışdır və 20 ildir ki, 71 il əvvəlki missiyasını davam etdirir.

27000-ci nömrə bir neçə statistik faktı da xatırladır. "Kommunist" adı ilə 72 ildə qəzetin 21532 sayı işıq üzü görmüşdür. "Xalq qəzeti" ötən 21 ildə oxucularla 5468 dəfə görüşmüşdür. Qəzet 21572-ci sayından ölkəmizin müstəqillik epoxasına işıq salır. Ötən 93 ildə qəzetin hər mininci nömrəsi və fəaliyyətinin onillikləri mətbuat hadisəsi kimi qeyd olunmuş və redaksiyanın cəmiyyətə hesabatına çevrilmişdir.

Azərbaycan milli mətbuatının bir institut kimi formalaşmasında, demokratik jurnalistikamızın ideya və sənətkarlıq ənənələrinin yaşadılmasında, peşəkar jurnalist nəsillərinin yetişdirilməsində, ana dilimizin saflığının qorunması və zənginləşdirilməsində, qəzet-publisistika üslubunun sabitləşdirilməsində, "Xalq qəzeti"nin müstəsna xidmətləri media tarixçiləri və nəzəriyyəçilərinin daim diqqətindədir. Azərbaycan Respublikasının Prezidenti Heydər Əliyev 1993-cü ilin avqustunda qəzetin 75 illik yubileyi münasibətilə redaksiya kollektivinə göndərdiyi təbrik məktubunda bu həqiqəti bir daha təsdiqləmişdir:

"Xalq qəzeti" mənalı yaradıcılıq yolu keçmiş, özünəməxsus üslub və sənətkarlıq xüsusiyyətləri olan nəşrlərimizdəndir. Uzun müddət "Kommunist" adı ilə nəşr edilən bu qəzet bütün sovet dövrü ərzində Azərbaycanın ictimai, iqtisadi və mədəni həyatının güzgüsü olmuşdur.

Respublikanın qəzetçilik ənənələrinin formalaşmasında, jurnalistikamızın inkişafında "Xalq qəzeti"nin xidmətləri xüsusi qeyd olunmalıdır... Müstəqilliyimizin qazanılmasından sonra "Xalq qəzeti" respublikanın ictimai həyatında baş verən hadisələrə cəsarətlə müdaxilə etmiş, bir çox problemlərin aşkarlanmasında mühüm rol oynamışdır".

"Xalq qəzeti" bu yüksək qiymətə layiq olduğunu hər zaman öz fəaliyyəti ilə sübut etmişdir. Ötən əsrin 70-80-ci illərində respublikada gedən geniş quruculuq və milli-mədəni yüksəliş dövründə qəzetin kollektivi Heydər Əliyevin liderlik nümunəsindən güc almış, həmin proseslərin əhatəli xronikasını yaratmışdır. Müstəqil Azərbaycan dövlətinin rəhbəri kimi Heydər Əliyevin indiki intibah və tərəqqiyə özül olmuş tarixi fəaliyyəti də "Xalq qəzeti"nin tarixində parlaq səhifələr yaratmışdır. Ümummilli lider o günləri belə səciyyələndirirdi: "Bu gün qəzet müstəqil Azərbaycanda hüquqi və demokratik dövlət quruculuğu işində güclü səfərbəredici rol oynayır".

Qəzetin son 8 ildəki 2500-dən yuxarı sayı ulu öndərin layiqli davamçısı, yeni tipli dövlət xadimi, sınanmış lider İlham Əliyevin Azərbaycana rəhbərliyi dövründə işıq üzü görmüşdür. Bu mərhələ ölkəmizdəki hərtərəfli tərəqqinin geniş əks etdirilməsi ilə yanaşı, həm də qəzetin özünün inkişafında irəliyə doğru yeni addımlarla əlamətdardır.

Maddi-texniki bazanın, buraxılış texnologiyasının daim yeniləşməsi, söz azadlığı prinsipinin ardıcıl bərqərar olması qəzetin öz populyarlığını, mötəbər media qurumu kimi cəmiyyətdə öncüllüyünü qoruyub-saxlamasına təminat yaratmışdır.

Qəzet öz oxucuları ilə 27 mininci görüşə öz tarixinin işıqlı məqamlarından doğan öyünc hissi, azad sözə sədaqət amalı, ölkəmizin sabahına, xalqımızın firavanlığına inam duyğuları ilə gəlmişdir. "Xalq qəzeti" həmişə xalqla bir yerdə olmuşdur, bundan sonra da belə olacaq, əziz oxucular!

Həsən HƏSƏNOV

Xalq qəzeti.- 2012.- 3 aprel.- S. 5.