Azərbaycan xalqı işğal olunmuş bütün əraziləri düşməndən azad edəcək

Prezident İlham Əliyevin qətiyyəti və səyləri xalqın bu inamını gündən- günə artırır

Şuşa Azərbaycannın unikal mədəniyyət mərkəzlərindən biridir. Təbii gözəllikləri ilə seçilən bu şəhər milli memarlığımızın və orta əsrlər şəhərsalma sənətinin qiymətli abidəsidir.

(Azərbaycan Respublikasının Prezidenti İlham Əliyevin "Şuşa şəhərinin Ermənistan silahlı qüvvələri tərəfindən işğalının iyirminci ildönümü haqqında" sərəncamdan)

Bütün dünyanın bildiyi, hamıya gün kimi aydın olan, lakin bəzi qüvvələrin öz maraqları naminə müxtəlif don geydirməyə çalışdığı tarixi faktlardan biri də qədim türk- Azərbaycan torpaqları olan Dağlıq Qarabağın və ətraf rayonların Ermənistan silahlı qüvvələri tərəfindən işğal edilməsidir. Hələ bir neçə gün əvvələ- aprelin 9-na qədər bəzi yerli və əcnəbi kütləvi informasiya vasitələrində verilən cəfəng bəyanatlara və qərəzli mülahizələrə inananlar var idi. " Şuşa xəyanətin qurbanı oldu" " Şuşanı satdılar", " Biz tstəsəydik Şuşa düşmənin əlinə keçməzdi" kimi məsuliyyətsiz bəyanatlara inananlar aprelin 9-da çox mötəbər bir cavab aldılar. Azərbaycan Respublikasının Prezidenti İlham Əliyevin " Şuşa şəhərinin Ermənistan silahlı qüvvələri tərəfindən işğalının iyirminci ildönümü haqqında" Sərəncamının preambulasında bu tarixi şəhərimizin işğalının səbəbləri açıq və əsaslandırılmış şəkildə ifadə edilir:

"Dərin siyasi-iqtisadi, sosial böhran keçirən və Dağlıq Qarabağda yaranmış gərgin vəziyyətdən çıxış yolu axtaran ölkəmiz hələ öz milli ordusu formalaşmadığından yüksək hərbi- strateji əhəmiyyətli Şuşa şəhərinin müdafiəsində, yalnız, könüllü özünümüdafiə dəstələrinin yardımına ümid edirdi. Lakin onların qəhrəmancasına döyüşmələrinə və layiqli müqavimət göstrəmələrinə baxmayaraq, təpədən dırnağadək silahlanmış Ermənistan silahlı qüvvələri 1992-ci il mayın 8-də Şuşa şəhərini işğal edildi".

Diqqətli oxucu əmindir ki, dövlət başçısının 9 aprel 2012-ci il tarixli sərəncamında qeyd edilən bu açıq ifadələrdən sonra Şuşanın işğalı ilə bağlı hədyan söyləyən bəzi "politoloq" və siyasətçilərə inananlar öz peşmançılıqlarını ifadə edəcəklər. Şuşa bilavasitə gənc müstəqil Azərbaycan dövlətinin siyasi və hərbi zəifliyi nəticəsində düşmən tapdağına düşmüşdür.

Prezidentin adı çəkilən sərəncamı ilə tanış olarkən başqa bir məqamı da yada salmaq zərurəti yaranır. Belə ki, Azərbaycanın Astaradan tutmuş Xudata, Bakıdan Balakənə, Naxçıvandan Ağstafayadək istənilən guşəsi barədə söz açan tarixçi və siyasətçilər bir həqiqəti təsdiqləməli olurlar: " Bu rayonun ( və ya şəhərin) inkişafının ən yüksək mərhələsi ötən əsrin 70-80 ci illərinə ulu öndər Heydər Əliyevin ölkəmizə birinci dəfə rəhbərlik etdiyi dövrə təsadüf edirdi". Şuşa şəhəri də həmin illərdə xüsusi bir inkişaf yolu keçmişdir. Adı çəkilən sərəncamda da qeyd edildiyi kimi, 1977-ci ildə ümummilli liderimiz Heydər Əliyevin təşəbbüsü ilə " Şuşa şəhərinin tarixi hissəsini tarixi memarlıq qoruğu elan etmək haqqında" qərar qəbul edilmişdir. Məhz həmin qərarın icrası prosesində şəhərdə quruculuq işləri genişləndirilmiş, Azərbaycan mədəniyyətinin görkəmli simalarından olan Üzeyir bəy Hacıbəylinin, Xurşudbanu Natəvanın və Bülbülün ev muzeyləri yaradılmış, böyük şair Molla Pənah Vaqifin məqbərəsi ucaldılmışdır.

Xüsusilə xatırladılmalı məqamlardan biri də odur ki, Şuşanın düşmən əlinə keçməsindən sonra vəhşi işğalçıların güllələdiyi tarixi abidələr - Üzeyir bəyin, Natəvanın və Bülbülün möhtəşəm sənət əsəri olan büstləri məhz ulu öndər Heydər Əliyevin səyləri nəticəsində üçüncü ölkənin vasitəçiliyi ilə düşmən əsarətindən xilas edilmiş və Bakıya gətirilmişdi.

Yeri gəlmişkən, Prezident İlham Əliyevin adı çəkilən sərəncamında da göstərilir ki, erməni vandalları işğal vaxtı minlərlə eksponatın olduğu muzeyləri talan etdilər, yüzlərlə tarix- mədəniyyət abidəsini dağıtdılar, məbədgah və məscidləri təhqirlərə məruz qoydular, çox sayda nadir əlyazma nümunələrini məhv etdilər, təhsil və səhiyyə ocaqlarını xarabazara döndərdilər. Hətta bəzi avropalı ekspertlər də qeyd edirlər ki, indiki Ermənistan ərazisi həmin ölkədə yaşayan ermənilər üçün kifayətdir. Onsuz da əhali sürətlə azalır. Ermənistanın Azərbaycan torpaqlarını işğal etməsi təkcə yeni ərazilər qazanmaq deyil, həm də tarixi saxtalaşdırmaq məqsədi daşıyırdı. Belə ki, təkcə Qafqazın deyil, bütün Avrasiyanın ən qədim yaşayış məskənlərindən olan Azıx mağarasının, Qafqazın ən qədim mədəniyyət nümunələrindən olan Xocalı-Gədəbəy mədəniyyətinə aid arxeoloji abidələrinin, orta əsrlərdə Cənubi Qafqazın ən sivil şəhərlərindən olan Şuşanın tarixi abidələrinin ələ keçirilməsi ilə tarixi saxtalaşdırmaqda usta olan ermənilər qədim "tarix qazanmaq" istəyirdilər. Adı çəkilən ünvanların bütün tarixi nümunələri artıq beynəlxalq aləmdə erməni abidələri kimi təqdim olunur. Ancaq unudurlar ki, indi zaman başqadır və Prezident İlham Əliyev onların son 200 ildə qurduğu fitnə- fəsad torlarını məharətlə dağıdaraq, dünyanın Dağlıq Qarabağ münaqişəsi barədə həqiqəti öyrənməsinə nail olur.

Dövlət başçımızın Xocalı faciəsinin 20-ci ildönümu münasibətilə imzaladığı sərəncam, soyqırımın ildönümündə dünya ölkələrində keçirilən möhtəşəm tədbirlər, Azərbaycan və Türk diaspor qurumlarının nümayiş etdirdiyi iş birliyi, dünya siyasətçilərinin Azərbaycanın haqq işinə verdiyi dəstək hələ də ermənilərin yuxusuna haram qatmaqdadır. Həmin tədbirlər bir daha sübut etdi ki, Azərbaycan xalqının işğal olunmuş torpaqlara qayıtmaq istəyi birə-beş artıb. Ermənilər görür və dərk edirlər ki, Azərbaycan xalqının bu inamı Prezident İlham Əliyevin qətiyyətindən qaynaqlanır.

Azərbaycan dövlətinin Prezidenti İlham Əliyevin, Heydər Əliyev Fondunun, Yeni Azərbaycan Partiyasının, ölkə ziyalılarının, qeyri hökumət təşkilatlarının və bütövlükdə xalqımızın nümayiş etdirdiyi "Xocalıya ədalət" çağırışlı tədbirlərin səsi İrəvanın qulaqlarından getməmiş Şuşanın haqq səsini bütün dünyaya çatdırmaq üçün növbəti sərəncam verildi. Bu sərəncama əsasən, ölkəmizin ərazisində və respublikamızın hüdudlarından kənarda Şuşanın işğalının iyirminci ildönümü ilə əlaqədar çoxsaylı anım mərasimləri keçiriləcək, dünya ictimaiyyəti bu işğalın mahiyyəti ilə növbəti dəfə tanış olmaq imkanı qazanacaq.

Qasım bəy Zakir, Xurşudbanu Natəvan, Mir Möhsün Nəvvab, Nəcəf bəy Vəzirov, Əbdürrəhim bəy Haqverdiyev, Üzeyir bəy Hacıbəyli, Yusif Vəzir Çəmənzəminli, Firudin bəy Köçərli, Əhməd bəy Ağaoğlu və digər görkəmli şəxsiyyətlərimizin ruhunun "bizi əsirlikdən azad edin" - çağırışına təkcə Bakıda, Gəncədə, Naxçıvanda, Şəkidə, Qubada, Lənkəranda olan soydaşlarımız deyil, Təbriz, Urmiya, Marağa, Borçalı, Dərbənd başda olmaqla, bütün dünyadakı soydaşlarımız, qardaşlarımız, dostlarımız, tərəfdaşlarımız da səs verəcəklər. Bu səs daha möhtəşəm olacaq. Çünki iki ay əvvəl start verilən "Xocalıya ədalət" devizli, dünya miqyaslı tədbirlərdə mühüm təcrübə qazanmışıq. Odur ki, Şuşanın səsinin kar qulaqları açacağı, ikili standartlardan əl çəkə bilməyənləri daşı ətəyindən tökməyə məcbur edəcəyi şəksizdir.

Ən başlıcası isə ermənilər öz əməlləri və gələcəkləri barədə yenidən - soyuq başla düşünmək məcburiyyətində qalacaqlar. Çünki Şuşanın səsi daha qətiyyətli, daha kəsərli olacaq.

İttifaq MİRZƏBƏYLİ

Xalq qəzeti.- 2012.-11 aprel.- S. 3.