El şairinə ehtiram

Gəncəbasarda "Bisavad Teymur" adı ilə tanınmış Aşıq Teymur Əhmədovun anadan olmasının 110 illiyi münasibəti ilə el şairinin doğulub-yaşadığı Goranboy rayonunda yubiley mərasimi keçirilmişdir.

Goranboy Rayon İcra Hakimiyyəti başçısı Nizaməddin Quliyev xalqımızın milli-mənəvi dəyərlər sistemində el yaradıcılığının əhəmiyyətindən, sazı-sözü ilə yaddaşlarda yaşayan insanların irsinin toplanıb-qorunması ilə bağlı dövlət müstəqilliyi illərində yaranmış münbit şəraitdən söhbət açdı, Bisavad Teymurun həmyerlilərinin yaddaşında haqsevər söz ustası kimi yaşadığını vurğuladı.

Azərbaycan Aşıqlar Birliyinin katibi, professor Məhərrəm Qasımlı XX əsrdə Goranboyda yaşamış, fitri istedadı və haqq aşiqi olması ilə məşhurlaşmış Bisavad Teymurun irsinin el ədəbiyyatının dəyərli örnəkləri sırasında yer aldığını söylədi. Alim heç bir təhsil almamış, aşıq şeiri məktəbində formalaşmış Teymurun zəmanədən şikayət, həqiqətə sadiqlik ruhunda qoşduğu şeirlərin ona el sevgisi, unudulmazlıq qazandırdığını bildirdi.

Aşıqlar Birliyi Gəncəbasar bölməsinin rəhbəri, əməkdar mədəniyyət işçisi Aşıq Mais, "Azərbaycan" qəzetinin bölgə müxbiri, əməkdar jurnalist Əhməd İsayev, şair Ələsgər Əlioğlu Bisavad Teymurdan şeiriyyəti dildə-ağızda gəzən, bu yerlərdə xoş xatirələr qoyub gedən el şairi kimi söz açdılar.

Goranboy Rayon Mədəniyyət və Turizm Şöbəsinin rəisi Gündüz Hacıyev Bisavad Teymurun irsinin toplanıb çap olunması, xatirəsinin yaşadılması ilə bağlı həmyerlilərinin gördükləri işlər barədə məlumat verdi.

El şairinin oğlu Mirzə Əsgərov atasının xatirəsinə göstərilən ehtirama görə minnətdarlığını bildirdi.

Mərasimdə telli saz dilləndi, yubilyar el şairinin misraları səsləndi.

Ziyəddin SULTANOV

Xalq qəzeti.- 2012.-13 aprel.- S. 7.