Suraxanı rayonunda 2012-ci ilin birinci rübünə yekun vurulmuşdur

Suraxanı rayonunda Nazirlər Kabinetinin 2012-ci ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında Azərbaycan Respublikasının Prezidenti İlham Əliyevin nitqindən irəli gələn vəzifələrə həsr olunmuş hesabat yığıncağı keçirilmişdir. Hesabat yığıncağında Suraxanı rayonunda cari ilin birinci rübündə görülmüş işlərə yekun vurulmuş və qarşıda duran vəzifələr müzakirə olunmuşdur.

Hesabat məruzəsi ilə çıxış edən rayon icra hakimiyyətinin başçısı İlqar Abbasov məlumat vermişdir ki, qəbul edilmiş dövlət proqramlarının icrası ilə əlaqədar Suraxanı rayonunda ötən dövr ərzində xeyli iş görülmüşdür. Rayonun müəssisələri tərəfindən sözügedən dövrdə 83,9 milyon manatlıq iş yerinə yetirilmiş, bir işçinin orta aylıq əmək haqqı 497 manata çatmış, müəssisələrdə və firmalarda 773 nəfər yeni iş yerləri ilə təmin olunmuşdur.

Rayon icra hakimiyyətinin və İqtisadi İnkişaf Naziriliyinin Sahibkarlığa Kömək Milli Fondunun birgə təşkilatçılığı ilə sahibkarlar üçün növbəti kredit yarmarkası keçirilmiş, 4 sahibkara 50 min manat məbləğində güzəştli kreditlər verilmişdir.

Zığ dairəsi-Heydər Əliyev Beynəlxalq Hava Limanı avtomobil yolunun və Heydər Əliyev prospektinin Suraxanı rayonu ərazisindən keçən hissəsinin ətrafında dekorativ divarların tikilməsi, xüsusi layihə əsasında növbəti 5-ci parkın salınması işlərinə başlanılmış, yolun kənarlarının yaşıllaşdırılması və abadlaşdırılması işləri davam etdirilmişdir. Yeni Günəşli yaşayış sahəsində yeni parkın salınmasına başlanılmışdır.

Hövsan qəsəbəsinin İ.Əhlimanov, E.Qasımov və E.Məmmədov küçələrində yerləşən çoxmərtəbəli yaşayış binalarında 9 964 kvadratmetr ölçüdə dam örtüyü metal keramika ilə örtülmüşdür. "Atəşgah məbədi" tarix-memarlıq qoruğunun ətrafının abadlaşdırılması, Heydər Əliyev prospektini "Atəşgah məbədi" ilə birləşdirən S.Bəhlulzadə və V.Balandin küçələrində yerləşən qeyri-yaşayış obyektlərinin fasadlarının təmir olunaraq rənglənməsi işləri davam etdirilmişdir.

Qəsəbələrarası yollara və məhəllədaxili ərazilərə 20 min kvadratmetr asfalt örtüyü salınmış, Yeni Suraxanı qəsəbəsinin "Aşağı qəsəbə" və "Yuxarı mədən" küçələrində 2551 metr yeni kanalizasiya xətti çəkilmiş, qaz və elektrik şəbəkələrinin qurulması davam etdirilmişdir.

Natiq bildirmişdir ki, Hövsan-Binə-Dədə Qorqud-Bahar qəsəbələrinin ətrafında 300 hektar ərazidə müvafiq torpaq işlərinin görülməsi, suvarma sisteminin qurulması və ərazinin yaşıllaşdırılması, Hövsan qəsəbəsində və Hövsan kəndində əkin və həyətyanı sahələrin su təminatının yaxşılaşdırılması məqsədi ilə 215,7 kilometr uzunluğunda boru xəttinin yenidən qurulması və digər müvafiq işlərin görülməsi işlərinə başlanılmışdır. Hazırda Bülbülə qəsəbəsində 640 şagird yerlik yeni məktəb binasının, 85 saylı məktəb üçün 480 şagird yerlik əlavə tədris korpusunun tikintisi davam etdirilir. Rayonun 89, 101, 104, 279, 280, 290 saylı məktəblərin, 2 saylı uşaq evinin, 262, 273 saylı körpələr evi-uşaq bağçalarının, 12 saylı birləşmiş şəhər xəstəxanasının, 31 saylı şəhər poliklinikasının əsaslı təmirinə, 2 saylı bərpa xəstəxanası üçün yeni binanın tikintisinə başlanılmışdır.

Hövsan qəsəbəsində şəhid ailələri və Qarabağ müharibəsi əlilləri üçün 81 mənzilli 9 mərtəbəli yaşayış binası inşa edilir. Zığ dairəsi-Heydər Əliyev Beynəlxalq Hava Limanı avtomobil yolundan Qala stansiyasına və dənizin sahilinə gedən avtomobil yolu tikilir.

Ümumi sahəsi 160 hektar olan Zığ gölünün və onun ətrafında neftlə çirklənmiş torpaqların təmizlənməsi məqsədi ilə Ekologiya və Təbii Sərvətlər Nazirliyi tərəfindən layihə hazırlanmış və işlərin görülməsinə başlanılmışdır.

Başçı həmçinin diqqətə çatdırmışdır ki, göstərilən dövrdə rayonda bir çox ictimai-siyasi tədbir keçirilmiş, idarə və müəssisələrin kollektivləri, rayon sakinləri, o cümlədən gənclərlə aparılan təbliğat işləri zamanı rayonun Heydər Əliyev Mərkəzinin geniş imkanlarından istifadə edilmişdir. Vurğulanmışdır ki, ölkəmizdə idmanın inkişaf etdirilməsi, Olimpiya hərəkatının genişləndirilməsi, gənclərin müntəzəm şəkildə idmana cəlb olunması, əhalinin bütün təbəqələri arasında sağlam həyat tərzinin formalaşdırılması məqsədi ilə Azərbaycan Respublikasının Prezidenti tərəfindən 2012-ci il "İdman ili" elan edilmişdir. Hər il olduğu kimi, bu il də rayonu təmsil edən idmançılar beynəlxalq yarış və turnirlərdə mühüm uğurlar qazanırlar. Aprel ayının 8-16-da Türkiyədə keçirilmiş ağırlıqqaldırma üzrə Avropa çempionatında iştirak edən "Nəhəng" İdman klubunun yetirmələri Əfqan Bayramov birinci yerə, İntiqam Zairov isə üçüncü yerə layiq görülmüşlər. Dövlət Proqramına əsasən rayonda "Gənclər evi"nin tikintisinə başlanılmış, Bülbülə qəsəbəsində mini-futbol meydançasının, Qaraçuxur qəsəbəsində Olimpiya idman zalının, Yeni Günəşli yaşayış sahəsində Şahmat məktəbinin və süni örtüklü mini-futbol meydançasının tikintisi üçün torpaq sahəsi ayrılmış və yaxın günlərdə tikinti işlərinə başlanacaqdır.

Ölkə başçısı İlham Əliyevin tapşırıqlarına uyğun olaraq vətəndaşların problemlərinin həlli, onlara göstərilən diqqətin artırılması, aztəminatlı ailələrin sosial müdafiəsinin gücləndirilməsi işi də rayonun dövlət orqanlarının daim diqqətindədir. Rayon Məşğulluq Mərkəzinə müraciət etmiş 266 nəfərdən 150 nəfəri işlə təmin olunmuş, 32 nəfərə işsizlik müavinəti təyin edilmiş, 12 nəfər peşə hazırlığı kurslarına göndərilmişdir. Əhalinin Sosial Müdafiəsi Mərkəzi tərəfindən rüb ərzində 204 yeni sosial müavinət təyin edilmiş, ailələrə 1,278 milyon manat məbləğində ünvanlı sosial yardım, Dövlət Sosial Müdafiə Fondunun rayon şöbəsi tərəfindən 28103 təqaüdçüyə 12,54 milyon manat pensiya ödənilmişdir.

Göstərilən dövr ərzində RİH başçısı tərəfindən 195 nəfər vətəndaş qəbul olunmuş, səyyar görüşlər keçirilmiş, qaldırılan məsələlərin həlli yolları birgə müzakirə edilərək aidiyyəti idarə və təşkilatların rəhbərlərinə müvafiq tapşırıqlar verilmişdir. Görülmüş və görüləcək işlər, mövcud problemlər və onların həlli yolları barədə sakinlərə ətraflı məlumat verilməsi üçün KİV-dən, rayon ərazisində quraşdırılmış məlumat lövhələrindən və müasir informasiya köşklərindən geniş istifadə edilir.

Hesabat yığıncağında Milli Məclisin deputatı Fərəc Quliyev və digər şəxslər çıxış etmişlər.

İclasın sonunda icra hakimiyyətinin başçısı İ. Abbasov rayon sakinləri və əmək kollektivləri adından Suraxanı rayonuna daim diqqət və qayğı göstərdiyinə görə, böyük qətiyyətlə ölkəmizi irəliyə aparan Prezident İlham Əliyevə dərin minnətdarlığını bildirmiş və əmin etmişdir ki, həmişə olduğu kimi, bundan somra da dövlət başçısının ətrafında sıx birləşərək, Azərbaycanın tərəqqisi və iqtisadi qüdrətinin möhkəmləndirilməsi naminə qarşıya qoyulan vəzifələr layiqincə yerinə yetiriləcək.

Vaqif BAYRAMOV

Xalq qəzeti.- 2012.- 24 aprel.- S. 6.